Read kirikeni Job 7 Bible Online

Job 7 - kirikeni bible

Job 7

¹Tomoniḅọ ḍumo mị kụrọ ḅara owuni kụrọ fịrị kịkẹmẹ, anị ḍumo ḅụ kụrọ-fịrịnwẹngị kịkẹmẹ,

²dein tịḅị kikima nyọ ḍọkịarị omoniḅọ kịkẹmẹ; oria gbẹịnye koru àrị fịrịnwẹngịapụ kịkẹmẹ.

³Akalụ fa akalụ paka à seni angaḅịaye ofori-ẹ; ḍin ḅọrọ ḍin sọ opu kururu anị ḅo ị̀ laye-ẹ.

⁴À ḅọlọlọ mọnọ sịkị ḍin mị ị̀ ḅụ ḅọlọmẹ; bebe ḍin mị mgba àrị imbibile nwọda, imbibile nwọda ene ḅa koruaḅẹ.

⁵Ị̀ya oju ịsọn ḅeinmẹ; obi ịtọlị ị̀ya oju gbẹịnmẹ; ị̀ya ịnọ ma ḅie ịma sarapakaḅẹ.

⁶Ị̀ya enema se ḅie kpọmaḅịaye oforika ḅara, àrị ḅọrọ aḅẹ; àrị sarasarama ḅọrọtẹịn ḅịtẹ ḍoriye nẹngịmẹ.

⁷Se ḅiekoroma, Yei Tamụnọ, ị̀ya ḍumo mị papa ọwụ-ẹ; ị̀ya ḅieḅẹlẹ gbọtụma kulumasam.

⁸Ị́ ị̀ ọrịmẹ mịọkụ, ọkụma ḅarị ọkọ ẹkẹ ngịsị. Ị́ nemikase ị̀ ḍọkịmẹ ḅẹḅẹ, à sosam.

⁹Soḅuno fa se so ọkụ anị tomoni fị se ḅarị pịkịma ḅoka ọkụ-ẹ; ini lekiriapụ mamgba ini se ḅieḅaramasam.

¹¹Ẹn-ẹn! À ḅarị gboin ẹkẹ! Ị̀ kuḅie sisam pịkị akụsam. Àrị ọkwẹịnḅịa.

¹²Cheye gose ị́ tomoni se ị̀ koru? Ị́ chịn ḅara ị̀rị̀ tọrụ mị ḅie ḅalafama ojuju?

¹³À ḅọlọlọ se ḅụkụrọma ịnyọsaramẹ; Ị̀ya ojuakụ ḅụ à dein ḍọkịmẹ.

¹⁴Ọkụma ị́rị́ — ị́rị́ ḍawọ se ị̀ ḅalafamamẹ; ị́ tẹmẹ ḅụ si-oku na si-ḍawọ na se ị̀ fịrịmamẹ

¹⁵ọkịmun ị́ ị̀ fọngọlọ ḅaa iḅitẹịn mị gulugulusa oju mị se ḍumo mị nẹngịmẹ.

¹⁶À ḅarasin sam; ị̀ ḅụ ịnyọ fasam ḍumoḅụ. Ị̀ wẹrịso. Ị̀ya ḍumo ḅarị tịḅị nyanakẹ.

¹⁷Cheye gose tomoniḅọ ḅe ị́ ḅụ yelayesọ? Cheye gose ị́ tọrụ se ọ̀ mịẹaye ma ḍiki-ao?

¹⁸Dede goyegoye ị́ ò pekele ḍikiḅịa se sịkịmamgba ị́ ọ̀ ḍaḍikiḅịa.

¹⁹Ị́ ị̀ ḅụ ị́ tọrụ sinka mun che sịkị la se àrị ị̀ ḅịpị fụla mị mịnịḅe?

²⁰Ị̀ya si mị anị ye se ị́ lama, ị́rị́ ḅe ikoliapụ ḍikiḍikiḅọ? Ị́ cheye gose ị̀ se ị́rị́ se ye ḍawọḅịa elekima mịẹ? Àrị opuma iku ị́ pụnụmaye sọ?

²¹Ị́ ineda ngịsị ḅarasin ị̀ya mịẹirima ma pịrị ẹka? Ị́ ineda à mịẹ siye ḅụ ḍikitọrụsin ẹka? Ḅọlọ ẹkẹ àrị ị̀ya iḍupu ḅie sọḅịa, se ị́ ị̀ ḍọkịḅịa sịkị à sosam.