Read kirikeni Job 9 Bible Online

Job 9 - kirikeni bible

Job 9

¹Iin, arịmgba à naa ḅọrọsam. Ọkụma nde tomoniḅọ ineda Tamụnọ Ḅe ḅụ ḅẹrẹ-ḅara-iḅi nyanaḅịa ọkụ?

³Nde tomoniḅọ ineda ori na ḅẹrẹpikiaḅịa ọkụ? Ori ineda ḅẹrẹ-a mẹndẹ oyiasi fịnjị gbelaḅịa nweniḅọ ḅe ineda gbọrịye sọ pẹkẹrẹḅo ẹkẹ.

⁴Tamụnọ Ḅe ori opuma yenemi pịkị kụrọ so ọkụma; ineda dadama chịẹ ọ̀ daḅịaḅọ ofori-ẹ.

⁵Ḅụnemikaḅara ḅụ ọ̀ tụndụma sinmẹ pịkị ḅụosọ ḅụ àrị kọsịmamẹ.

⁶Tamụnọ Ḅe tomonikiri mị jike se anị gẹịnpumẹ; sẹkiri mị ọlọchịẹma ịbama ori àrị imbibile sinmẹ.

⁷Ori ineda ịrụa mị kikiḅịa anị ḅarị pakama ọ̀ pịkị lolia ma sọ mịẹḅịa àrị ḅịama ḍin ḅụ.

⁸Ḅarachụa Tamụnọ Ḅe pịrị se ò so mị mịẹfinjimaḅọ anịkanịka mengi ḅie opu nama ḅe koku nangaḅọ ofori-ẹ.

⁹Tamụnọ Ḅe anị lolia ma se soḅie sụkaye-ẹ—Opu Ḅịa lolia ma na, Oraịọn lolia ma na, Plaidis lolia ma na pịkị chukuju lolia ma na.

¹⁰Ọ̀ mịẹ ḅụgbiripumaye ma wa ineda àrị kaịnḅo ẹkẹ, anịsịkị oria ḅụbuamaye ma àrị kuluma nyanakẹ.

¹¹Tamụnọ Ḅe ọ̀ nwẹngị ị̀ ḅọrọaḅẹ, ọkụma àrị ineda ori ọrịkẹ. Ọ̀ nwẹngịma mun mẹ ọkụma ị̀ ḅụ nemikẹ.

¹²Ò ḅiyeḅiye ori ọkịmẹ, pịkị ineda ò kikiḅịaḅọ ofori-ẹ; gbọrịḅọ sọ ofori-ẹ dadama ò gbela, “Ị́ cheye-ao?”

¹³Oria ịganị fafakẹ. Ḅarachụa ori na taraka mengi ḅie opu nama Rehab ḅe pịrị se ori na tụḅụrụapụma ori ini nanga dẹkịdẹkịmamẹ.

¹⁴Mịn ḅaraḅụ nde àrị ineda ọkwẹịnmgbọlụ nyana ọ̀ pẹkẹrẹḅịa ọkụ?

¹⁵À ḅẹrẹḅarasi nyanaka sọ, àrị ineda mịẹḅịaye anị Tamụnọ ị̀ya ḅẹrẹkọnḅọ ḅe ḅara ḍikiḅụgerere ḅi-ẹ.

¹⁶Anịsọnị, ò ḅereni ị̀ pịrị à ḅọrọ ọkwẹịnḅịa ọkụma, à ḅerenikẹ na ori ị̀ pokiḅịa ọkụ.

¹⁷Ori irisi fịrịmaḅo ị̀ kọsịmamẹ ḅẹrẹtịḅị ngịsị oforika ḅaraḅụ.

¹⁸Ò ḅi-ẹkẹ ị̀ya ịnyọ kiri la; ị̀ya ḍumo mgba ori akụmasam.

¹⁹À kụrọ ḅara se ọ̀ mịẹḅịa mọnọ? Kụrọ ḅara se Tamụnọ Ḅe mịẹ? Àrị ò se ḅẹrẹchiri munḅịa mọnọ? Ineda ọ̀ mịẹse ò munḅịaḅọ omi?

²⁰À nemiye ofori-ẹ, à pịkị kuḅie-se-ḅụgbana na gbẹịn mẹ, ọkụma ị̀ya ọkwẹịn ma ḅẹrẹḅarasi fieaḅẹ, pịkịna à ḍukoarịye goyegoye ḅẹrẹsi kọn ị̀ pịrịye kịkẹ aḅẹ.

²¹À nemiye ofori-ẹ, ọkụma à ḅarị ye abalakẹ. Àrị obi aḅẹ ḍumo ḅụ. Ḅẹrẹ ofori-ẹ; ḅẹrẹ ḅarasiḅọ-o, ḅẹrẹḅarasikaḅo-o, Tamụnọ Ḅe ọ̀ wa kọsịmaḅịa.

²³Ḅẹrẹtịḅị nemikaḅọ ḅe ḅụnemika ḅara ḅụ fị ọkụma, Tamụnọ Ḅe ọ̀ ḍẹrịmẹ.

²⁴Tamụnọ Ḅe sẹkiri mị se sitịḅịnyanaḅọ ḅe pịrịmẹ. Ọ̀ ḅẹrẹkọn-apụ mamgba tọrụmgbọlụma pụnmamẹ. Se Tamụnọ Ḅe anị mịẹka ọkụma, tụḅọ anị mịẹ?

²⁵Ị̀ya enema àrị mangị aḅẹ, arịa ḅụ iḅi gbọrịye sọ ofori-ẹ.

²⁶Ị̀ ḍumo mị ḅọrọarị ḅara anị mangịtẹịn arụ kịkẹmẹ, igo vuma koroḅo ịsụn kun ọkụ.

²⁷À nemikase ḍẹrịmẹ se ḅụkụrọma ị̀ya oju akụ mị se ḅieḅaramamẹ ḅẹḅẹ, ị̀ya tọrụsiọrị mamgba pịkịmaḅo ị̀ jụmẹ; à nemimẹ na Tamụnọ Ḅe ọ̀ ḅẹrẹkọn ị̀ ḅara simasam.

²⁹Ḅẹrẹ ị̀ ḅara sisa sịkị, nde à gose ị̀ ḅụ ḅụḅalaḅalamaḅịaye?

³⁰Ineda ị̀ya nwẹngị irimama sịkịrị sinḅịa saḅaị ofori-ẹ.

³¹Tamụnọ Ḅe ori ị̀ se ḅụrụaye olulu ḅie gbinsam, ị̀ya ḅụchụayema pembe, ị̀ ḍikiḅụngụngụmẹ.

³²Tamụnọ Ḅe nemikase tomoniḅọ ọkụma, àrị ineda ọ̀ pẹkẹrẹḅịa; wa ineda ḅẹrẹchiri mun mịna ḅẹrẹ kọn pẹlẹḅịa.

³³Ọkụma mịna ogboku sọpakaḅịaḅọ ofori-ẹ— ḅẹrẹkọn Tamụnọ Ḅe na ị̀rị̀ na pịrịḅịaḅọ ofori-ẹ.

³⁴Dachịẹma fomuḅara se ị̀ pịrị ḅụ, Tamụnọ! Ị́ya ḅalafamaye ma sin sikima!

³⁵Ị̀ ḅalafakẹ. Àrị ọkwẹịnḅịa anịatịḅị àrị ị̀ kuḅiemgbọlụ mị nemimẹ.