Read kirikeni Fịafịa Nime 10 Bible Online

Fịafịa Nime 10 - kirikeni bible

Fịafịa Nime 10

¹Cheye gose ị́ opuma sasa, Yei Nyanaḅọ? Cheye gose ị́ ḅụ ị́ nwọ ḅọị wa ḅụfụka ḅie sime sịkị?

²Sitịḅịnyanapụma ini opuaye mịẹ-aḅẹ pịkị siḅara se igwein apụma na anga aḅẹ; ini kun ḅo ini tu koroma ḍẹịnma ḅie.

³Sitịḅịnyanaḅọ ḅe ò kuḅietọn se ọ̀ mịẹḅịa siye mị ḅụ ọ̀ tịḅị kpokoro nyanamẹ; opu tọrụmgbọlụ nyanaḅọ ḅe ọ̀ Nyanaḅọ Ḅe worisima se pịkị ọ̀ sịkịmẹ.

⁴Sitịḅịnyanaḅọ ḅe ngịsị ọ̀ sịkị nyana Nyanaḅọ Ḅe pịrịkẹ; oria opuaye mịẹḅụ ò koromamẹ na Tamụnọ Ḅe ò ye ḅụ ofori-ẹ.

⁵Sitịḅịnyanaḅọ ḅe ọ̀ mịẹye goyegoye ọ̀ ḅara sọmẹ. Ori ineda Nyanaḅọ Ḅe oria ḅẹrẹkọn mị kaịnḅo ẹkẹ; orina tarakapụma ori ini kombomẹ.

⁶Ọ̀ nwọse ọ̀ ḅụ ḅẹmẹ, “Ngịsị à ḅịkị ẹkẹ; à ḅụfụka ḅie sọ ẹkẹ ngịsị.”

⁷Oria ọkwẹịn ḅie, wori na, iruo na, ẹrẹma na ḅeinmẹ; ọ̀ sarasarama taraka na, si ọkwẹịn na kọnkọnmẹ.

⁸Ịwọ amama ḅie ori ọ̀ ḅụ ḅọịḅọịmẹ, ḅẹrẹ nemikapụ ma niniḅịa gose. Ọ̀ ḅọị se korukorumẹ ịnyọ nyanakapụma ẹnyẹ se ini ḅaaḅịa ẹrẹchị;

⁹chịrịḅa ḅọị ọkụ ọ̀ yawụma simemẹ. Ọ̀ ḅọlọlọ sime igwein apụma korumẹ; ò tu ḍẹịn ḅie ori ini kun se ini fọnọ somẹ.

¹⁰Ò kun so àrị ḅarachụa pịrịḅọ oforikapụ ma ye opuma ini laḅụ ini ḅọlọlọ waraḅẹ; opu kụrọ ini nẹngịmasam.

¹¹Sitịḅịnyanaḅọ ḅe nwọse mịnaḅụ ḅẹmẹ, “Tamụnọ Ḅe ò ye se ye chịnchịnkẹ! Ori ọ̀ tọrụmgbọlụma gbẹịnsam, se ọ̀ ḅarị ngịsị ị̀ ọrị ẹkẹ!”

¹²Yei Nyanaḅọ, fomuḅara se ini sitịḅịnyanapụma pịrị! Tọrụsiọrịarịapụma se ḅiekoroma!

¹³Nde sitịḅịnyanaḅọ ḅe ineda Tamụnọ Ḅe ḍikisimaḅịa ọkụ se nwọse ọ̀ ḅụ ḅẹmẹ na, “Ò fomuḅara se ị̀ pịrị ẹkẹ”?

¹⁴Ọkụma ị́ ọrịmẹ, ị́ pịkị ḅụfụka ma ḅụ na tọrụsiọrị ma na ḅụ elekima chụamẹ se sịkịmamgba ḅụkarakaramamẹ ḅarachụaḅịa gose. Ḅarachụa pịrịḅọ oforikaḅọ ḅe sịkịmamgba ọ̀ ḅụ se sarakoroma ị́ pịrịmẹ; mịẹḅịa ọkụ ofori apụma sịkịmamgba ị́ ḅarachụa ini pịrịpịrịmẹ.

¹⁵Sitịḅịnyanapụma na si aye mịẹ apụma na kụrọma dekisin; ini mịẹsa sima gose fomuḅara se ini pịrị ọkịmun ini ḅarị anị mịẹka sịkịla.

¹⁶Nyanaḅọ Ḅe anị ḅene-ḅene amanyanaḅọ-ẹ. Nwọ jịn oru tẹkẹ àrị apụma oria ama ḅie ngịsị ini sime ẹkẹ.

¹⁷Yei Nyanaḅọ, ḅụiderimapụma inia tẹkẹma ị́ pokiḅịa; ị́ inia kuḅie kụrọmaḅịa.

¹⁸Ini pụndarịapụma na ḍapụ na nyengiapụ na oforika awọmẹnịma na kọn àrị owuma ị́ pokiḅịa; ị́ ḅẹrẹkọn inia ḅara iḅimaḅịa, mịẹso sịkị papa oju akpakpa chụa se fịḅịa tomoni ḅarị ḅalafamaye mịẹ ẹkẹ.