Read kirikeni Fịafịa Nime 101 Bible Online

Fịafịa Nime 101 - kirikeni bible

Fịafịa Nime 101

¹Ị̀ya nime mị anị nyana ḅereni na karakara ḅẹrẹkọn na gbakịma mẹ, àrị anị chu se ị́ boma ḅịa, Yei Nyanaḅọ.

²Ị̀ya mịẹmịẹaye ḅụ si paka ẹkẹ. Nde sịkị ị́ ị̀ damaḅo ḅe? Àrị iḅi fịafịa ḍumo kọnḅịa ị̀ya warịḅie,

³à pịkị tọrụkụn siye pịrị ẹkẹ. Tamụnọ Ḅe ḅụ vinpịkị so apụma, à ḍikiḅụnwọnwọ nyana inia mịẹmịẹaye ma pịrịmẹ; àrị ini na mịẹgbolomaye nyana ẹkẹ.

⁴À karakaraka ḍumo kọn ẹkẹ, à pịkị si-a mịẹmịẹaye na mịẹgbolomaye nyana ẹkẹ.

⁵Miniminima jụmḅọ ḅụ siaye ḍuko ị̀ pịrịḅọ à nụḅọ ḅụ sikimaḅịa; àrị opuaye mịẹḅọ na ḅụdekichịẹmaḅọ na tọrụkụn ẹkẹ.

⁶Kuḅie se Tamụnọ Ḅe ḅụgbana apụma, àrị ini na nwẹngịgboloma ḅịa, à pịkị mịẹḅịa ini ị̀ya amanyana odo mị ḅie anga ḅịa. Nwọ karagbasịsa iḅi ḍumo nyana apụma, à ḅereni ini pịrị se ini fịrịnwẹngị ị̀ pịrịḅịa.

⁷Gbọrị iruo kọnḅọ sọ ị̀ya amanyana odo ḅie anga ẹkẹ; gbọrị epekelepepe tomoniḅọ sọ ị̀ tọrọkọ sime ẹkẹ.

⁸Ene ḅa ene ḅa ene à sitịḅịnyana apụma ḅaaḅịa mịna ama ḅie; à siaye mịẹapụ mamgba desinḅịa Nyanaḅọ Ḅe opuama mị ḅie.