Read kirikeni Fịafịa Nime 106 Bible Online

Fịafịa Nime 106 - kirikeni bible

Fịafịa Nime 106

¹Ọ́ Nyanaḅọ Ḅe boma! Ọ́ mịẹḅaka se Nyanaḅọ Ḅe ḅẹ, anịatịḅị ori iḅimẹ; oria ḅẹlẹma mị sime gbasomẹ.

²Tụḅọ ineda ọ̀ mịẹsa opuaye mamgba ḍuko ḅe? Tụḅọ ineda ịnyọ laḅara se ò boma ḅe?

³Ḅieḅẹlẹ sime oria olokoma koko apụma pịrị, nwọ sịkịmamgba karakaraye mịẹarị apụma.

⁴Ị̀ se ḅiekoroma Nyanaḅọ, ị́ ḅarachụa ị́ya tomonima pịrị àrị sịkị; ị́ ini ḍụa àrị sịkị ị̀ se chụa ḍụa.

⁵Ye ị́ya tomonima ḅe yeḅarasọ mị à nwọ ọrị, se pịkị ị́ya sẹ mị ḅụ sọ se anị na ḅieḅẹlẹ; sime ị́ pịrị apụma ḅieḅẹlẹ ḅụ opuaye mịẹarị sịkị.

⁶Wa si mịẹsam mịna opu-a-ḍapụ ma mịẹ ḅara mị; wa sitịḅịnyana pịkị siaye mịẹmẹ.

⁷Mịna ḅieju-aḍapụma Ijipt ḅie Tamụnọ Ḅe oria ḅụgbiripuma fịrịma kaịnḅokẹ; tọntọn à sịkị ḅụ ò se ini ḅẹlẹma ayema ini se ḅieḅaramamẹ, se ini kọngọ kụrọma Kụrọmamgba Nyanaḅọ Ḅe pịrịmẹ Awụwụ Tọrụ mị nyọ ḅụ.

⁸Ọkụma ori ini ḍụaḅọrọmamẹ, ò ye ḅereni sa ḅaraḅụ, se oria opu kụrọ mị ḍiepakụma gose.

⁹Ọ̀ ḅẹrẹtọn Awụwụ Tọrụ mị pịrịmẹ, se anị samịnamẹ; se ori oria tomonima pamun kpoinkpoin kiri ọgọnọ saḅakoromẹ.

¹⁰Ini ḍikiḅụnwọnwọ apụma ḅaraḅie ori ini ḍụamẹ; inina-tarakapụma ḅaraḅie ori ini ḍụamẹ.

¹¹Mengi mị inina-tarakapụma simbi ḅaamẹ; inia ḅie gbọrịḅọ sọnị kọnkẹ.

¹²Anịsịkị anị oria tomonima ò ye ḅerenimẹ nwọḅẹ ye mị ḅereniye-ẹ; se ini nime chu ò boma mẹ.

¹³Ọkụma ini pịkị kirikiri ọ̀ mịẹsa ayema se ḅieḅaramamẹ, se oria tetema korukaḅụ inia ḅietọn aye mịẹmẹ.

¹⁴Onwun ele ḅie kụrọḅara se ye ḅi inia ḅie ḅeinmẹ, se ini Tamụnọ Ḅe ḍaḍikimẹ;

¹⁵anịẹrẹchị ini ḅi ye mị ọ̀ nwọse ini pịrịmẹ, ọkụma ọ̀ pịkị ḅalafama obi se ini fịrịmamẹ.

¹⁶Anịnyọ onwun ele ḅie ini Moziz ḅe sọlịmẹ pịkị Erọn, Nyanaḅọ Ḅe oria osiḅụ sime fịrịnwẹngịḅọ ḅe na.

¹⁷Anịsịkị kiri mị finji se Detan ḅe mịnịmẹ, pịkị Abaịram ḅe na ò furo mị na gbẹịnmẹ;

¹⁸fịnị koroḅo inina ini ḍukonwẹngị sitịḅịnyana apụma na dọkịma ḅaa famamẹ.

¹⁹Ini goli se nambulo tẹmẹmẹ Saịnaị mị ḅụ, se ini anị oru mị tẹkẹmẹ;

²⁰ini Tamụnọ Ḅe boma mị se osuein fịfị nambulo ḍikima tẹmẹ ye mị na ḍinmamẹ.

²¹Ijipt ḅie oria opu kụrọ ḅụ ini ḍụa Tamụnọ Ḅe, ini ò se ḅieḅaramamẹ.

²²Anịnyọ ọ̀ mịẹ ḅụgbiripuma ayema ḍiki! Awụwụ Tọrụ mị ḅụ ọ̀ mịẹ ḅalafama ayema ḍiki!

²³Tamụnọ Ḅe ḍukomẹ na oria tomonima ori ini ḅaasinḅịa ḅe sịkị, oria fịrịnwẹngịḅọ, ọ̀ sẹlẹ ọkị Moziz ḅe, ọ̀ sịsẹ chịẹ Tamụnọ Ḅe damẹ, anị ọ̀ pịkị ori ini ḅaasinḅịa ḅe ịganị mị dachịẹmaye-ẹ.

²⁴Anịọkụma iḅi ama mị ini anị sịkịsam, anịatịḅị Tamụnọ Ḅe ò yeḅerenimẹ ḅe ye mị ini ḅerenikẹ.

²⁵Ini inia ikowarịma ḅie sime se ịmbụrụmbụrụmẹ, pịkịna Nyanaḅọ Ḅe ḍuko àrị ayema poki ḍụkụkẹ.

²⁶Se ọ̀ kụrọma inia ḅeri jinemẹ na ọ̀ mịẹḅịa ini onwun ele ḅie fị faḅịa,

²⁷ọ̀ pịkị inia furoḅie pakaḅo apụma galagalama oru tẹkẹ apụma ḅie chumẹ, mịẹse ini jịn à sẹ ḅie sime fịḅịa ḅara.

²⁸Piọ ḅie ḅụ anị Tamụnọ-a tomonima Beal oru tẹkẹ apụma ḅụ sọ se Beal oru ḅe tẹkẹ ye-ẹ, ini pịkị ini mịẹ ḍumo nyanaka oru ma pịrị agba fịayema fịmẹ.

²⁹Inia mịẹmịẹaye ma ini mịẹmẹ Nyanaḅọ Ḅe ò kuḅie ibo dekimẹ, se ḅalafama obi inia ogboku kan pakamẹ.

³⁰Ọkụma Fịnehas ḅe sịsẹchịẹ se fomuḅara se siaye mịẹapụ ma pịrịmẹ, se obi mị dachịẹmẹ.

³¹Anịsịkị ngịsị mị iḅiye mị ini pa oria ẹrẹ ḅụ anị se ḅiekoroma aḅẹ anị pịkị ọkọ sime tọrọkọ munḅịa.

³²Mẹriba mengi mị nyọ ḅụ tomonima Nyanaḅọ Ḅe ịganịmamẹ, Moziz ḅe pịkị ḅụfụka ḅie sọmẹ inia tịḅị gose.

³³Ini mịẹye mị ò kuḅie sima so ọkụma, ọ̀ ḅarị tọrụ pịkị ọḅụḍikika ḅara nwọse ọkwẹịn mẹ.

³⁴Oru tẹkẹ apụma ini ini ḅaakẹ, Nyanaḅọ Ḅe tọn ini pịrị na ini mịẹ nwọḅẹ ḅara mị,

³⁵ọkụma ini ini na-ere-sime gbolomamẹ, se inia oru-a mịẹmịẹaye ma ḍa ọkịmẹ.

³⁶Tamụnọ-a tomonima ini oru tẹkẹmẹ, mịn mị inia fị mị ọkịḅo ini pịrịmẹ.

³⁷Ini inia owuapụ awọma na, eremeni awọma na se agba mịẹ Kenan oru ma pịrịmẹ.

³⁸Ini si ḅụ oforika awọmẹnịma ḅaamẹ, ini ama mị pụlamamẹ ninikọn ḅụ.

³⁹Ini inia ḅụma simamẹ inia mịẹmịẹyema ḅụ, se ini ḅarị Tamụnọ Ḅe ḅụ kuḅie se gbana na gbẹịn ḅara simekẹ.

⁴⁰Anịẹrẹchị Nyanaḅọ Ḅe ori ịganị nyana oria tomonima pịrịmẹ; ini ọ̀ ḅụnjịnjịmamẹ.

⁴¹Ori inia ḅụ ḅarasin oru tẹkẹ apụma kụrọ mị pịrịmẹ, se inina-tarakapụma ḅẹrẹtọn ini pịrịmẹ.

⁴²Inina-tarakapụma ini pụndamẹ, ini pịkị gbọtụma inia chukuḅie sime fịrịnwẹngịapụ sọ ini pịrịmẹ.

⁴³Tọntọn à sịkị ḅụ Nyanaḅọ Ḅe ori oria tomonima ḍụamẹ, ọkụma ori-na-tụḅụrụ mị ini nwọ sẹlẹọkịmẹ, se ini si ḅụ simbitẹịnmẹ.

⁴⁴Anịẹḅẹsọ ini owu oloku ọ̀ pịrị sịkị Nyanaḅọ Ḅe ori ini naamẹ, ò kwein tọrụ se inia ḅụfụka ma ḍikimẹ.

⁴⁵Ini gose oria ọḅọkụ mị ọ̀ nwọse ḅiekoromamẹ, pịkị ọ̀ nyana opu ḅẹlẹma mị gose ori ò kuḅie pụnụmẹ.

⁴⁶Ọ̀ mịẹmẹ ini pụnụma apụ mamgba pịkị ini ḍikitịḅịfoinmẹ.

⁴⁷Wa ḍụa, Yei Nyanaḅọ, mịna Tamụnọ, pịkị sẹma ḅie wa pịkịmaḅo, mịẹso ọkụma wa mịẹḅaka se ị́ ḅẹ pịkị ị́ya fịafịa ẹrẹ mị bomaḅịa ọkụ.

⁴⁸Ọ́ Nyanaḅọ Ḅe boma, Izrẹl Tamụnọ Ḅe; ómine ò boma mịọkụ na sịkịmamgba na! Ye ọrịḅọḅọ ḅẹ, “Amẹn!” Ọ́ Nyanaḅọ Ḅe boma!