Read kirikeni Fịafịa Nime 107 Bible Online

Fịafịa Nime 107 - kirikeni bible

Fịafịa Nime 107

¹“Ọ́ mịẹḅaka se Nyanaḅọ Ḅe ḅẹ, anịatịḅị ori iḅimẹ; oria ḅẹlẹma mị sime gbasomẹ!”

²Nyanaḅọ Ḅe boma gose ọ́ ma ọkwẹịn ma ọkwẹịn ọkwẹịn ḅarị, ómine ọ̀ pẹkẹrẹ pakụma ḅosa apụ mamgba. Ómine-na-tarakapụma ḅaraḅie ori ọ́ ḍụapakụma ḅosam,

³ọ̀ pịkị jịn à sẹma ḅie ómine ọkị pịkịmaḅosam, ịrụapakapaka nyọ na pịkị anị sọsọ nyọ na, ọgọnọju ọkịḅo chukuju la.

⁴Da apụ ateli-sọ-oforika onwun ele ḅe gelegelema ḅọrọmẹ, se ini ineda ini angaḅịa opuama ḍọkịḅokẹ.

⁵Ḅuru ini tarịmẹ, inia pụkọ pịkị samịna mẹ gose ini ḍumo se ḅieḅaramamẹ.

⁶Se inia tọrụsiọrị ma ḅie, ini Nyanaḅọ Ḅe chịn olokumẹ, ọ̀ pịkị inia ḅụfụka ma ḅie ini ḍụamẹ.

⁷Gonogono ateli ḅie ḅụ ori ini pamun ini angaḅịa opuama mị lamẹ.

⁸Ini mịẹḅaka se Nyanaḅọ Ḅe ḅẹ gbẹịn mẹ, oria kunoka ḅẹlẹma mị gose, ọ̀ nwẹngị ini pịrị ḅụgbiripuma fịrịma gose.

⁹Ọ̀ mịẹmẹ pụkọ samịna apụma ye ini na deinmẹ, ọ̀ pịkị iḅiaye se ḅurupụkọtarị apụma ḅụlọ ma ḅeinmamẹ.

¹⁰Da apụ opu ngịrị na kanakana ḅie na simemẹ, anị ini ikoli se ịkasị tọrụsiọrịarị ikoliapụma,

¹¹anịatịḅị ini Kụrọmamgba Nyana Tamụnọ Ḅe tọn ini pịrị ayema na tụḅụrụ mẹ, ini pịkị ò se ini telima ayema sịkịmẹ.

¹²Kụrọ fịrịnwẹngị ḅụ iniaḅụ ịnyọfamẹ; ini ḅịkịkoroḅịa, ḅarachụa ini pịrịḅịa gbọrịḅọ sọnị sime ẹkẹ.

¹³Se inia tọrụsiọrị ma ḅie, ini Nyanaḅọ Ḅe chịn olokumẹ, ọ̀ pịkị ini ḍụamẹ inia ḅụfụka ma ḅie.

¹⁴Ori ini ọkị pakụmaḅomẹ ini sime opu ngịrị na kanakana na ḅie, ọ̀ pịkị ini se ini ịkasị ikoli ma, pẹkẹrẹ pẹkẹrẹ ḅụ àrị anyịmamẹ.

¹⁵Ini mịẹḅaka se Nyanaḅọ Ḅe ḅẹ gbẹịnmẹ oria kunoka ḅẹlẹma mị gose, ọ̀ nwẹngị ini pịrị ḅụgbiripuma fịrịma gose.

¹⁶Ori alapẹlẹka ḅọkọ ma kanmẹ, ọ̀ pịkị ikulele kikichụa ayema kọsịmamẹ.

¹⁷Da apụ oḅori sọmẹ, se ini mịẹasi ma gose tọrụsiọrị aḅẹ pịkị inia simịẹmịẹaye ma na gose;

¹⁸ini ḅarị ineda tọrụ se fịaye ḍikikẹ, ini pịkị fị-ẹtọnmẹ.

¹⁹Se inia tọrụsiọrị ma ḅie ini Nyanaḅọ Ḅe chịn olokumẹ, ọ̀ pịkị inia ḅụfụka ma ḅie ini ḍụamẹ.

²⁰Oria kụrọḅara ọ̀ nwọse ini gwọmẹ, ọ̀ pịkị iḍupu ḅie ini ḍụapakụmamẹ.

²¹Ini mịẹḅaka se Nyanaḅọ Ḅe gbẹịnmẹ oria kunoka ḅẹlẹma mị gose, ọ̀ nwẹngị ini pịrị ḅụgbiripuma fịrịma gose.

²²Ini mịẹḅaka ḅẹ agba mịẹ ọ̀ pịrị gbẹịnmẹ, pịkị ḅieḅẹlẹ nime chu ọ̀ mịẹsa aye mamgba nwọ ḍukopakụma.

²³Da apụ onwoin arụ dọkụma ḅọrọaḅẹ abaji mị ḅie, tọrụ ma ḅie ini yekọnfịaḅẹ.

²⁴Nyanaḅọ Ḅe ineda mịẹḅịaye ini nwọ ọrịmẹ, tọrụ ma ḅie, oria ḅụgbiripuma fịrịma.

²⁵Ọ̀ kụrọ pịrịmẹ, se opu fọrụ sakị fiese ambura ma jike sịsẹmamẹ.

²⁶Àrị onwoin arụ ma deki gelemaso pịkị àrị se gbun nyọ ḅụ koromamẹ. Ọkọ sime ḅalafama nyọ ḅụ tomonima inia kuḅie kụrọ mị famẹ;

²⁷iruḅu apụ jiajia ọkụ ini nwọse jiajiamẹ— ini ḍawọ nemisa aye mamgba papaye sọmẹ.

²⁸Se inia ḅụfụka ma ḅie ini Nyanaḅọ Ḅe chịn olokumẹ, ọ̀ pịkị inia ḅụfụka ma ḅie ini ḍụamẹ.

²⁹Ịganị àrị irisi mị ori anị mịẹse anị yawụmẹ, ambura ma sọ ḅo pịkị deinmẹ.

³⁰Inia ḅieḅẹlẹmẹ tọrụ mị yawụye gose, se ọ̀ pịkị ini ọkịḅo ini agba ḅi pọkụ mị lamẹ.

³¹Ini mịẹḅaka se Nyanaḅọ Ḅe ḅẹ gbẹịnmẹ oria kunoka ḅẹlẹma mị gose, ọ̀ nwẹngị ini pịrị ḅụgbiripuma fịrịma gose.

³²Ini oria opu mị ḍuko finjima gbẹịnmẹ tomonima koḅirima nyọ ḅụ, pịkị tịḅịnịma inia koḅiria ma ḅie ḅụ ò boma.

³³Nyanaḅọ Ḅe ọ̀ mịẹmẹ mengi ideri ideri à tọrụ ma gbọtụma samịna kpoinkpoinmẹ, ọ̀ pịkị kiri chukuḅie paka ḅoarị mengi ma dachịẹmamẹ, se àrị ḅarị iderikẹ.

³⁴Ọ̀ mịẹmẹ yeḍipi gbẹịn kiri ḅo fụn akụ kọn se ḅo papaye sọmẹ, anịanga anga apụma nyana sitịḅị gose.

³⁵Ori onwun ele ma pịkịmaḅo mengi ḍapa mịẹmẹ, se ọ̀ samịna kpoin kpoin kirima mịẹse àrịḅo kiri ḅie pakaḅo ideri mengi nyanamẹ.

³⁶Ọ̀ mịẹmẹ ḅurupụkọtarị apụma anịanga angamẹ, se ini angaḅịa opuama nwọ nyanamẹ.

³⁷Ozu ma ḅie ini yeḍipimẹ, ini pịkị irumịẹ chịnmgbọlụ ḍipimẹ se ini ḅakama fịaye sokumẹ.

³⁸Oria tomonima ori ini ḅẹlẹmamẹ, ini pịkị ḅakama awọ yimẹ; ò ḅerenikẹ inia namama ḅe kịẹnḅịpị iderima.

³⁹Sitịḅịnyana apụ Tamụnọ-a tomonima nẹngịma pịkị simịẹmịẹaye ḅụ gbọtụma ini pụnda iderima sịkị,

⁴⁰ori ini pụnda apụma ḍikisima se, ini mịẹmẹ ini ateli oforika onwun ele ḅie gelegelema ḅọrọmẹ.

⁴¹Ọkụma mịẹḅịa-ọkụ-ofori se yeḅụḅalaḅalama apụma ini sime ḅụgererema kiri ḅie, ori ini ḍụa pịkị inia furoma mịẹsumamẹ nama su ọkụ.

⁴²Karakaraye mịẹapụ ma mịn mị ọrị se ḅieḅẹlẹ nyanamẹ, ọkụma sitịḅịnyana apụma inia ḅịpị mamgba gbẹịnmẹ.

⁴³Ye nemi nyana apụma ma ayema na gboloma aye se ḅiekoroma; ye ini Nyanaḅọ Ḅe oria kunoka ḅẹlẹma mị se koroma ḅụ chu.