Read kirikeni Fịafịa Nime 108 Bible Online

Fịafịa Nime 108 - kirikeni bible

Fịafịa Nime 108

¹Àrị iḅiọkụma kụrọkuḅie nyanamẹ, Yei Tamụnọ! À nime chu se ị́ bomaḅịa! Sịsẹ, ị̀ tẹmẹ!

²Ọ́ sịsẹ, ị̀ya ọbọ na iko-ọbọ na! Àrị ịrụa mị wosịsẹmaḅịa.

³À mịẹḅaka se ị́ ḅẹḅịa, Yei Nyanaḅọ, sẹma ogboku. Àrị ị́ bomaḅịa tomonima ogboku.

⁴Ị́ya kunoka ḅẹlẹma mị iwo so ma ḅọrọmẹ; ị́ya kuḅie se gbana na gbẹịn mị so ma lamẹ.

⁵Soḅie ị́ya opu mị ḍiepakụma, Yei Tamụnọ, pịkị ị́ya boma mị se sẹkiri mị kelema.

⁶Wa ḍụa ị́ya kụrọḅụ; ị̀ya tẹkẹ na, mịẹsosịkị ị́rị́ ḅẹlẹma apụma ḍụaḅọrọma nyanaḅịa ọkụ.

⁷Oria tẹkẹ warị ḅie ḅụ; Tamụnọ Ḅe ò ḍukosam, “Ọmụḅaraiḅi ḅe ḅieḅẹlẹ ḅụ, à Shẹkẹm mị ḍie ḅịa, à pịkị Sọkọt Pẹsịkiri mị ḍie ị̀ya tomonima pịrịḅịa.

⁸Giledị ị̀yaye-ẹ, pịkị Manasẹ na; Ifrem mị ị̀ya okpochu-ẹ Juda mị pịkị ị̀ya amanyanaḅọ amgbara-ẹ.

⁹Ọkụma à Moab mị se ị̀ya yesịkịrị bọlị mịẹḅịa, à pịkị ị̀ya akpaka ma se Idọm ọgọnọ gbinḅịa, se ḍiepakụma na ị̀rị̀ anị nyanamẹ. Filistia mị ḅụ àrị ọmụḅaraiḅi ḅe ḅieḅẹlẹ oloku kọnḅịa.”

¹⁰Yei Tamụnọ, tụḅọ, ị̀ ọkịmun owunima nama kụrọ ama mị laḅe? Tụḅọ ị̀ pamun Idọm mị laḅe?

¹¹Ị́ kọkọma wa sịkịsa? Ị́ ḅarị mịna owunima na nwẹngị paka ẹka?

¹²Ḅarachụa wa pịrị taraka apụma ḅaraḅie, tomoniḅọ ḅarachụa mị papaye-ẹ.

¹³Tamụnọ Ḅe mịna ḅụ sime ọkụma wa inumaḅịa; ò mine-na-taraka apụma inumaḅịa.