Read kirikeni Fịafịa Nime 111 Bible Online

Fịafịa Nime 111 - kirikeni bible

Fịafịa Nime 111

¹Ọ́ Nyanaḅọ Ḅe boma! Ị̀ kuḅiemgbọlụ mgba à nwọse mịẹḅaka se Nyanaḅọ Ḅe ḅẹḅịa oria tomonima koḅiria nyọ ḅụ.

²Nyanaḅọ Ḅe mịẹ ḅụgbiripumaye ma sime ọkụ ḍiki! Àrị ḅụḅẹlẹ apụ mamgba àrị kaịnḅo ḍọkịmẹ.

³Ọ̀ mịẹaye mamgba, osi na geletẹịn opu na arịa ḅie ḅeinmẹ; oria karakarayemịẹ mị simegbasomẹ.

⁴Nyanaḅọ Ḅe ò ḅikẹ wa oria ḅụgbiripuma fịrịma se ḅieḅarama; ori iḅi mịẹmịẹmẹ, ọ̀ pịkị ḍikiḅụgerere nyana nyanamẹ.

⁵Ọ̀ fịaye pakụma ori osi apụma pịrịpịrịmẹ; ngịsị oria ọḅọkụ mị ò se ḅieḅaramakẹ.

⁶Ori oria kụrọ mị se oria tomonima ḍiesam, anị jịn-a sẹma nyana amama ọ̀ nwọse oria tomonima pịrịye mị ḅụ.

⁷Oria mịẹye goyegoye ḅụ ò kuḅie-se-ḅụgbana na gbẹịnmẹ, ọ̀ pịkị karakaramẹ, oria oloko mamgba kuḅie kụrọmamẹ.

⁸Àrị sime gbasomẹ; karakaraye ḅụ na karakaraye mịẹ ḅụ na ini àrị pịrịmẹ.

⁹Ori oria tomonima ọkị pakụmaḅomẹ, se ori inina-ḅene-ḅene-ọḅọkụ fịmẹ. Ori anị Fịafịa pịkị opuḅọ-ẹ!

¹⁰Yenemi ateli mị ḅie sọ mị anị osi se Nyanaḅọ Ḅe pịrị mị-ẹ; ori iḅi ḅẹrẹkọn oria olokoma koko apụ mamgba pịrịpịrịmẹ. Ini ò boma gbasoḅịa.