Read kirikeni Fịafịa Nime 116 Bible Online

Fịafịa Nime 116 - kirikeni bible

Fịafịa Nime 116

¹À Nyanaḅọ Ḅe ḅẹlẹmamẹ, anịatịḅị ori ị̀ naamẹ; ori ị̀ya tẹkẹma pokipokimẹ.

²Ori ị̀ pokipokimẹ àrị ọ̀ chịn owu sịkị goyegoye ḅụ.

³Fị mị ḅe ḅalafa ị̀ gbori kelemamẹ; iḍupu mị ḅe opu ḅalafa kpekimaḅo ị̀ gbẹịn-oḅomẹ; ḅalafa na kuḅie chịẹ-chịẹ-chịẹ na ị̀ ḅie ḅeinmẹ.

⁴Anịsịkị à Nyanaḅọ Ḅe chịn olokumẹ, “Àrị ị́ tẹkẹmẹ, Nyanaḅọ, ị̀ ḍụaḅọrọma!”

⁵Nyanaḅọ Ḅe ò ḍikiḅụgerere nyanamẹ, ọ̀ pịkị iḅimẹ; mịna Tamụnọ Ḅe ò ḍikitịḅịfoin nyanamẹ.

⁶Nyanaḅọ Ḅe ọ̀ ḅụkikimanyọ sọ ḅarachụa pịrị apụ oforika apụma pịrịpịrịmẹ; à ḅalafamaye ḅie sime sịkị, ori ị̀ ḍụamẹ.

⁷Kụrọmachịẹ, ị̀ kuḅiemgbọlụ, anịatịḅị Nyanaḅọ Ḅe ori iḅi se ị̀ mịẹmịẹsam.

⁸Nyanaḅọ Ḅe fị ḅie ori ị̀ ḍụamẹ; ori ị̀ya owu-a mengi ma dachịẹmamẹ se ini ị̀ nẹngịmakẹ.

⁹Anịẹrẹchị Nyanaḅọ Ḅe tọrụkuḅu à nwẹngịaḅẹ ḍumo apụ tomonikiri mị ḅie.

¹⁰À pa ḅereni aḅẹ, à ḅẹ na, “À kọsịsosam nwọ ḅẹ sịkị lamẹ,”

¹¹ị̀ ḅalafa sịkị à nwọ ḅẹmẹ, “Kuḅie-se-ḅụgbana-gbẹịn gbọrịḅọ sọ ofori-ẹ.”

¹²Àrị ineda che ḍiepịrịaye se Nyanaḅọ Ḅe pịrịḅe ò se ị̀ mịẹ iḅi mamgba ḅụ?

¹³Àrị ere iru ḍiepịrịaye ọkịḅo Nyanaḅọ Ḅe pịrịḅịa, ori ị̀ ḍụaye gose, mịẹḅaka se ọ̀ ḅẹḅịa.

¹⁴Oria tomoni mamgba koḅirima nyọ ḅụ, à ḅerenisaye mị à nwọ seni ḅo ọ̀ pịrịḅịa.

¹⁵Nyanaḅọ Ḅe oria tomonima ḅe fị mị opuma ọ̀ ḅụ yelamẹ!

¹⁶Ị̀rị̀ ị́ya fịrịnwẹngịḅọ-ẹ, Nyanaḅọ; à fịrịnwẹngị ị́ pịrịmẹ, ị̀ nyengima mịẹ ọkụ mị. Ị́ fịḅie ị̀ ḍụapakụmasam.

¹⁷À mịẹḅaka ḅẹ agba se ị́ pịrịḅịa, à pịkị ị̀ya tẹkẹ kọn ị́ pịrịḅịa.

¹⁸Ị́ya tomoni mamgba koḅirima nyọ ḅụ, Jerusalẹm ị́ya fịafịa Oputẹkẹwarị ḅie, à ḅerenisaye mị à nwọ seni ị́ pịrịḅịa. Ọ́ Nyanaḅọ Ḅe boma!