Read kirikeni Fịafịa Nime 119 Bible Online

Fịafịa Nime 119 - kirikeni bible

Fịafịa Nime 119

¹Ḅieḅẹlẹ sime inia ḍumo ḅụ ịlọlị nyanaka apụma pịrị, anị Nyanaḅọ Ḅe oria olokoma sime ọkụ ḍiki anga àrị apụma.

²Ḅieḅẹlẹ sime ọ̀ tọn ayema ḍukonwẹngịarị apụma pịrị, anị inia kuḅie mgba nwọse ọ̀ ḅịpị poki àrị apụma.

³Ini si mịẹkẹ; ini Nyanaḅọ Ḅe oria ateli ma ḍukonwẹngịmẹ.

⁴Nyanaḅọ, ị́ya olokoma ị́ nwọse wa pịrịsam ị́ pịkị ḍuko wa pịrịmẹ na wa iḅiọkụma kuḅie laḅara se àrị koko.

⁵Ị̀ kuḅie kụrọḅịa à nemikase kuḅie se ḅụgbana gbẹịnḅọ sọ se ị́ ḍuko ayema koko ọkụma!

⁶À nemikase tọrụ se ị́ tọn aye mamgba ḅụ wẹrị ọkụma, anịsịkị à ḅụgerere ḅie sọẹkẹ.

⁷Àrị ị́ya karakara ḅẹrẹkọn mị ḍawọ àrị sịkị, à fịafịa kuḅie se ị́ bomaḅịa.

⁸Àrị ị́ya olokoma kokoḅịa; ngịsị ị̀ wẹrịsoma.

⁹Nde asẹmẹnịḅọ ḅe oria ḍumo mị mịẹfịafịama ḅịa ọkụ? Anị ị́ya olokoma koko mị ḅụ-ẹ.

¹⁰Ị̀ kuḅiemgbọlụ mgba à nwọse ḅụkụrọma fịrịnwẹngị ị́ pịrịmẹ; mịẹ àrị ị́ya olokoma koko.

¹¹Ị́ya olokoma à se ị̀ kuḅie ḅụ kokomẹ, mịẹso sịkị àrị ị́ ḅụ simịẹ ẹka ọkụ.

¹²Àrị ị́ boma mẹ, Yei Nyanaḅọ; ị́ya ateli ma se ị̀ ḍie.

¹³À àrị gopakụmaḅịa ị́ se wa pịrị oloko mamgba.

¹⁴Ị́ tọn ayema ḍukonwẹngị mị ị̀ ḅụḅẹlẹtẹịn opu ngọ nyana mị nẹngịmẹ.

¹⁵Àrị ị́ ḍuko ayema ḍawọmẹ; ị́ telima ayema à nwọ pekeleḍikimẹ.

¹⁶Ị́ya olokoma ị̀ ḅieḅẹlẹmamẹ; ị́ tọn ayema à se ḅieḅarama-ẹkẹ.

¹⁷Iḅi se ị̀ mịẹ, ị̀rị̀ ị́ya fịrịnwẹngịḅọ ḅe, mịẹso sịkị à ḍumo pịkị ị́ telima àrị ayema kokoḅịa ọkụ.

¹⁸Ị̀ tọrụmgbọlụma finji, mịẹso sịkị àrị ị́ya oloko mị ḅe ḅụgbiripuma karakara mị ọrị.

¹⁹Mị sẹkiri ḅie àrị omi-ẹ kala sịkị kẹngẹḅụ; ị́ tọn ayema se ị̀ ḅọịmama.

²⁰Ị̀ kuḅie chịẹ-chịẹ-chịẹmẹ; sịkịmamgba ị́ya ḅẹrẹkọn mị nemi gose.

²¹Ị́ opuayemịẹapụ ma ḍiki ịganịmẹ; ị́ tọn ayema mịẹka apụma, worinime sime ini pịrịmẹ.

²²Inia nweni wọlọ na pụa na ḅie ị̀ finma, anịatịḅị àrị ị́ya olokoma kokomẹ.

²³Ḅẹrẹtọn apụma gboloma se ḅẹrẹḅia ị̀ pịrịmẹ, ọkụma ị́ telima ayema à nwọ ḍawọḅịa.

²⁴Ị́ telima ayema ị̀ ḅieḅẹlẹmamẹ; àrị mị ị̀ tetema àrịye-ẹ.

²⁵À fọn ḅie ḅọlọlọmẹ ini ị̀ nẹngịmaye gose; iwo sịsẹma ị́ ḅerenisa ḅaraḅụ.

²⁶À mịẹ si mamgba à ḍukosam, ị́ pịkị ị̀ ḅịpị pẹkẹrẹmẹ; ị́ya ateli ma se ị̀ ḍie.

²⁷Ḅarachụa ị̀ pịrị àrị ị́ya olokoma kaịnḅo, à pịkị ị́ telima ḅụgbiripumaye ma se iḅi koroma ḅụ chuḅịa.

²⁸Kururu ị̀ ḅie ḅeinmẹ; ị̀ mịẹkụrọma, ị́ ḅerenisa ḅaraḅụ.

²⁹Si ateli ḅie nwẹngị ḅụ ị̀ dasin, se ị́ya iḅimịẹḅụ ị́ya oloko mị se ị̀ telima.

³⁰Ḅịpị poki à nwọ sẹlẹọkịsam; à tọrụgbẹlẹma ị́ya ḅẹrẹkọn mị ḍikisam.

³¹Ị́ telima ayema à nwọ ḍukonwẹngịmẹ, Nyanaḅọ; ḅerenima ini ḅụgerere se ị̀ tọrụchụa.

³²À kuḅie laḅara se ị́ tọn ayema kokoḅịa, anịatịḅị kaịnḅo ị́ ḅakama nwọse ị̀ pịrịḅịa.

³³Ị́ya olokoma fiearịye mị se ị̀ telima, Nyanaḅọ, à pịkị sịkịmamgba àrị kokoḅịa.

³⁴Ị́ya oloko mị pufinji ị̀ pịrị, à pịkị anị kokoḅịa; ị̀ kuḅiemgbọlụ mgba à nwọse anị kokoḅịa.

³⁵Ị̀ mịẹ àrị ị́ya olokoma kokoḅọ sọ, anịatịḅị arịa ḅie à ḅieḅẹlẹ ḍọkịḅomẹ.

³⁶Ị́ya olokoma koko mị ḅe kuḅie-chịẹ-chịẹ-chịẹ se ị̀ pịrị mị iḅitẹịn ngọkọn mị nẹngịmẹ.

³⁷Tọrụgbẹlẹma yeḅụoforikaye pịrị ḅụ ị̀ dasin; iḅi se ị̀ mịẹ ị́ ḅerenisa ḅaraḅụ.

³⁸Ị́ ḅereniye mị mịẹ, ị̀rị̀ ị́ya fịrịnwẹngịḅọ ḅe pịrị— ị́ ḅereniye ị́ nwọ mịẹ ini ị́ ḅịpịpokiapụ ma pịrịpịrị ḅara.

³⁹À ḍikiḅalafa àrị wọlọ ma ḅie ị̀ ḍụa; ị́ya ḅẹrẹkọn mị ḅụgbiripumamẹ!

⁴⁰À ḅimẹ àrị ị́ya olokoma koko; ịwọ ḍumo se ị̀ pịrị, anịatịḅị ị́rị́ karakaraye mịẹḅọ-ẹ.

⁴¹Ị́ ị̀ ḅẹlẹma la ọkụ se ị̀ ḍie, Nyanaḅọ, pịkị ị́ ḅerenisa ḅaraḅụ ị̀ ḍụa.

⁴²Anịsịkị àrị ineda ị̀ wọlọ arịapụ ma pẹkẹrẹḅịa, anịatịḅị àrị ị́ya ọkwẹịn ma ḅerenimẹ.

⁴³Ị̀ mịẹ à sịkịmamgba karakaraye mị ḍuko, anịatịḅị à kuḅie se ị́ya ḅẹrẹkọn ma ḅụgbana mẹ.

⁴⁴À sịkịmamgba ị́ya olokoma koko mun ḅene-ḅene laḅịa.

⁴⁵Jụmḅọ chukuḅie oforikaḅọ ḅara à nwọse kpaịnma angaḅịa, anịatịḅị à ḅụkụrọma ị́ telima ayema kokoḅịa.

⁴⁶Àrị ị́ tọn ayema ḍukopakụma amanyana apụma pịrịḅịa; ị̀ ḅụ pịkị gerere ẹkẹ.

⁴⁷Ị́ tọn ayema koko mị ḅie à ḅieḅẹlẹ ọrịmẹ, anịatịḅị à àrị ḅẹlẹmamẹ.

⁴⁸Àrị ị́ya olokoma osi pịkị àrị ḅẹlẹmamẹ; ị́ telima ayema ị̀ kuḅiemgbọlụ ḅụ à àrị se koroma ḅụ chuḅịa.

⁴⁹Ị́ ḅereni ị̀rị̀ ị́ya fịrịnwẹngịḅọ ḅe pịrịye mị seḅiekoroma; anị kuḅie kụrọ se ị̀ pịrịsam.

⁵⁰Ị̀ya tọrụsiọrị ḅie anị ị̀ kuḅie kụrọmamẹ, anịatịḅị ị́ ḅereniye mị anị ḍumo se ị̀ pịrịmẹ.

⁵¹Opuayemịẹapụ ma sịkịmamgba ị̀ kombomẹ, ọkụma ị́ya oloko mị ḅụ ma à ḅụ sikimakẹ.

⁵²Ḅọlọ sịkị ngịsị ị́ kọn à ḅẹrẹ ma à nwọse ḅiekoromamẹ, àrị pịkị kuḅie kụrọ se ị̀ pịrịmẹ, Yei Nyanaḅọ.

⁵³Sitịḅịnyana apụ ị́ya oloko mị kan àrị ọkụ à nwọ ọrị sịkị, anị opuma ị̀ ịganịmamẹ.

⁵⁴Sẹkiri ḅie ị̀ya kpụlụ ḍumo sịkịḅụ, ị́ya olokoma na gbakịma nime à nwọ gịẹịnmẹ.

⁵⁵Ḍin ḅie àrị ị́ seḅiekoromamẹ, Nyanaḅọ, à pịkị ị́ya oloko mị se ḅiekoromamẹ.

⁵⁶À ḅieḅẹlẹ nyanamẹ ị́ya olokoma koko mị ḅụ.

⁵⁷Ị́rị́ ngẹrị anị à ḅiye-ẹ, Yei Nyanaḅọ; à yeḅerenimẹ na àrị ị́ya olokoma kokoḅịa.

⁵⁸Ị̀ kuḅiemgbọlụ mgba à nwọse ị́ tẹkẹmẹ, na ḍikiḅụgerere nyana ị̀ pịrị, ị́ ḅerenisa ḅaraḅụ

⁵⁹Àrị ị̀ya mịẹmịẹye se koromaḅụ chusam, à pịkị yeḅerenimẹ na àrị ị́ telima ayema ḍukonwẹngịḅịa.

⁶⁰Sịkịfamaka ḅaraḅụ à jua ị́ya olokoma kokomẹ.

⁶¹Sitịḅịnyana apụ ḍẹịn tu ị̀ pịrịsam, ọkụma àrị ị́ya oloko mị se ḅieḅaramakẹ.

⁶²Ḍin ogbo à sịsẹ ị́ya karakara ḅẹrẹkọn mị gose ị́ boma mẹ.

⁶³Ị̀rị̀ fịrịnwẹngị ị́ pịrịapụ mamgba ikiaḅọ-ẹ, ị́ya olokoma koko apụ mamgba na.

⁶⁴Nyanaḅọ, ị́ya kunoka ḅẹlẹma mị sẹkiri ḅie ḅeinmẹ; ị́ya olokoma se ị̀ telima.

⁶⁵Ị́ ḅereniye mị ị́ mịẹsam, Nyanaḅọ, ị́ pịkị iḅi se ị̀rị̀ ị́ya fịrịnwẹngịḅọ ḅe mịẹmẹ.

⁶⁶Nemi na yekaịnḅo na se ị̀ pịrị, anịatịḅị à kuḅie se ị́ya olokoma ḅụgbanamẹ.

⁶⁷Tẹrẹmẹ ị́ fomuḅara se ị̀ pịrị, àrị irinwẹngị kọnkọnmẹ, ọkụma mịọkụ àrị ị́ya ọkwẹịn mị kokosam.

⁶⁸Ị́ opuma iḅimẹ—ị́ iḅi mịẹmịẹmẹ! Ị́ya olokoma se ị̀ telima.

⁶⁹Opuaye mịẹapụ ị̀rị̀na-gboloma aye ḅụ iruokọnsam, ọkụma ị̀ kuḅie mgba à nwọse ị́ tọn ayema kokomẹ.

⁷⁰Mịna apụma ini kaịnḅo nyanakẹ, ọkụma ị́ya olokoma ḅie à ḅieḅẹlẹ nyanamẹ.

⁷¹Ị̀ la fomuḅara mị ị̀rị̀na-deinmẹ, anịatịḅị anị ị̀ mịẹse àrị ị́ya olokoma ḍawọ nemimẹ.

⁷²Ị́ya oloko mị ị̀ ḅụ yelatẹịn tomonikiri ḅie sime igbiki mamgba nẹngịmẹ.

⁷³Ị́rị́ ị̀ tẹmẹmẹ, pịkị ị̀ kokomẹ; yekaịnḅo se ị̀ pịrị, mịẹso sịkị àrị ị́ya olokoma ḍawọḅịa ọkụ.

⁷⁴Ị́ osi apụma inia ḅieḅẹlẹḅịa ini ị̀ ọrị sịkị, anịatịḅị àrị ị̀ kuḅie se ị́ ḅereniye mị ḅụgbanamẹ.

⁷⁵À nemimẹ na ị́ya ḅẹrẹkọn mị karakaramẹ, Nyanaḅọ, ị́ fomuḅara se ị̀ pịrịmẹ anịatịḅị ị́rị́ anị kuḅie-se-ḅụgbana gbẹịnḅọ-ẹ.

⁷⁶Ye ị́ya kunoka ḅẹlẹma mị ị̀ kuḅie kụrọma, ị́ yeḅereni ị̀rị̀ ị́ya fịrịnwẹngịḅọ ḅe pịrịsa ḅaraḅụ.

⁷⁷Ị̀ ḍikiḅụgerere, à ḍumoḅịa anịatịḅị àrị ị́ya olokoma ḅụ ḅieḅẹlẹ nyanamẹ.

⁷⁸Ye ḅụgerere opuaye mịẹapụ ma tọrụ sọ, ini iruo kọn ị̀ pụnụmaye gose; ị̀rị̀ ọkụma, àrị ị́ telima ayema se ị̀ kuḅie chụa se àrị ḍawọ nemiḅịa.

⁷⁹Ye ị́ osi apụma ị̀ damaḅo— ị́ tọn ayema nemi apụ mamgba.

⁸⁰Ye à kapụma ị́ya olokoma koko, se ini ị̀ nẹngịmamẹ nwọḅẹ ḅụgerere mị ị̀ ḅụ so.

⁸¹Ị́ ḅo ị̀ ḍụaḅịa ẹrẹchị, Nyanaḅọ, ị́ koruḅụ ị̀ ḅụ ịnyọ fasam; àrị ị̀ kuḅie se ị́ya ọkwẹịn ma ḅụgbanamẹ.

⁸²Ị́ ḅereniye mị ḍiki ḅụ ị̀ ḅụ ịnyọ fasam, à pa gbela aḅẹ, “Nde sịkị ị́ ḅarachụa ị̀ pịrị ḅe?”

⁸³Ini se ḅarị yechịnka iru-chụa nama oju apụra simeọkụ anị à sime ọkụ-ẹ; anịẹḅẹsọnị ma àrị ị́ya olokoma se ḅieḅaramakẹ.

⁸⁴À koru mun nde sịkị laḅe? Nde sịkị ị́ fomuḅara se ị̀ pụnda àrị apụma pịrịḅe?

⁸⁵Ị́ya olokoma kokoka opuayemịẹapụ olulu soku ḍẹịntu ị̀ pịrịsam.

⁸⁶Ị́ya oloko mamgba kuḅie se ḅụgbana gbẹịn aye-ẹ; tomoni iruo kọn ị̀ pụnụma aḅẹ—ḅarachụa ị̀ pịrị.

⁸⁷Kalaye kẹngẹ kọnmẹ ini ị̀ ḅaasam, ọkụma ma àrị ị́ya olokoma sịkịkẹ.

⁸⁸Ị́ya kunoka ḅẹlẹma mị gose iḅi se ị̀ mịẹ, mịẹse àrị ị́ya olokoma kokoḅịa ọkụ.

⁸⁹Ị́ya ọkwẹịn mị sime gbasoḅịa, Yei Nyanaḅọ; soḅie ḅụ anị kuluma nyanakẹ.

⁹⁰Ị́ya karakara mị sime ḅụọ-ḅụọ mamgba laḅịa; ị́ sẹkiri mị se anị simeḅịa nyọ ḅụ koromasam, anị pịkị chịẹ waraḅẹ.

⁹¹Ye mamgba sime ḅo mịmgba lamẹ, ị́ tọnsaye gose, anịatịḅị ye mamgba ị́ya fịrịnwẹngịaye-ẹ.

⁹²Ị́ya olokoma, nemikase à gose ḅieḅẹlẹarịye mị ḅe chukukẹ nwọḅẹ ọkụma, mgbọkụ ị̀ya tọrụsiọrị ma ḅie à fị ḅọrọsam.

⁹³Àrị ngịsị ị́ telima ayema sịkị-ẹkẹ, anịatịḅị arịaḅụ mị ị́ ị̀ mịẹse à ḍumo arịye-ẹ.

⁹⁴À sime ị́ pịrịmẹ—ị̀ ḍụa! À ḅụkoroma ị́ya olokoma kokosam.

⁹⁵Sitịḅịnyana apụ ị̀ ḅaaḅịa ẹrẹchị ị̀ ọbị aḅẹ, ọkụma àrị ị́ya olokoma se iḅiọkụma ị̀ kuḅie chụa fịrịnwẹngịḅịa.

⁹⁶À ḍawọ nemisam na yegoyegoye dachịẹ nyanamẹ; ọkụma ị́ya olokoma kpaịnmẹ.

⁹⁷Àrị ị́ya oloko mị ḅẹlẹmamẹ! Àrị anịa koroma kọnmẹ ene mị ḅie mgba.

⁹⁸Ị́ya oloko mị ị̀rị̀na-omi-ẹ sịkịmamgba, anị ị̀ mịẹse à yenemitẹịn ị̀rị̀na-taraka apụma nẹngịmẹ.

⁹⁹À yekaịnḅotẹịn ye se ị̀ telima apụ mamgba nẹngịmẹ, anịatịḅị ị́ se ị̀ telima ayema à nwọse ị̀ kuḅie chụa iḅiọkụma koroma kọnmẹ.

¹⁰⁰Àrị opu nemi nyanatẹịn olomu apụ nẹngịmẹ, anịatịḅị àrị ị́ya olokoma kokomẹ.

¹⁰¹À si mịẹmịẹaye mamgba kọkọrọḅọrọmẹ, anịatịḅị à ḅimẹ àrị ị́ya ọkwẹịn mị koko.

¹⁰²Ị́ telima ayema à àrị sịkịkẹ, anịatịḅị ị́rị́na-mịnaḅụ na ye se ị̀ telima ḅọ-ẹ.

¹⁰³Ị́ telima ayema opuma ḅẹlẹmẹ— ḅẹlẹtẹịn ḅẹịn nẹngịmẹ!

¹⁰⁴À nemi nyanamẹ ị́ya olokoma ḅie, anịẹrẹchị à taraka se si mịẹmịẹaye mamgba wẹrịmamẹ.

¹⁰⁵Ị́ya olokoma tọnjie sọ ị̀ datekeremamẹ anị pịkị enekuḅu sọ ị̀ya ateli mị pịrịmẹ.

¹⁰⁶Àrị osiḅụ à ḅereniye mị mịẹḅịa, anị ị́ telima ayema koko mị ḅụ.

¹⁰⁷Ị̀ya tọrụsiọrị mị iḅiọkụma ḅalafamamẹ; Nyanaḅọ, mịẹ à ḍumo, ị́ ḅerenisa ḅaraḅụ.

¹⁰⁸Ị̀ya mịẹḅaka ḅe tẹkẹ mị ọkị, Yei Nyanaḅọ, se ị́ya olokoma se ị̀ telima.

¹⁰⁹À sịkịmamgba ḅụkarakaramamẹ ị̀ ḍumo mị fama; ị́ya oloko mị ma à se ḅieḅaramakẹ.

¹¹⁰Sitịḅịnyana apụ ḍẹịntu ị̀ pịrịmẹ, ọkụma ma à kọngọ kụrọma ị́ya olokoma pịrịkẹ.

¹¹¹Ị́ya olokoma sime ị̀ pịrị gbaso aye-ẹ, àrị anị ị̀ya ḅieḅẹlẹ.

¹¹²À tọn pẹlẹsam na àrị ị́ya olokoma koko nweni mun ị̀ya fị ene laḅịa.

¹¹³À taraka se kuḅie mgba nwọse ị́ ḅerenika apụma wẹrịmamẹ; ọkụma àrị ị́ya oloko mị ḅẹlẹmamẹ.

¹¹⁴Ị́rị́ owusọ ị̀ pịrịpịrịḅọ-ẹ pịkị ị̀ya ḅọịnyọ-ẹ; àrị ị̀ kuḅie se ị́ ḅereniye mị ḅụgbanamẹ.

¹¹⁵Ómine ị̀ ḅụ sikima, ómine si mịẹapụ ma. Àrị ị̀ Tamụnọ Ḅe olokoma kokoḅịa.

¹¹⁶Ịnyọ se ị̀ pịrị, ị́ ḅereni ḅaraḅụ, se à ḍumoḅịa; ḅerenima à kuḅie se gbanasaye mị ị̀ gbakị!

¹¹⁷Ị́ ọlọ, se à ḍụaḅọrọma nyanaḅịa, à pịkị sịkịmamgba kweintọrụ se ị́ya olokoma ḍikiḅịa.

¹¹⁸Ị́ya olokoma kokokaḅọ goyegoye ị́ nụḅọ sịkịmẹ; ini nweni dairima ḅụ tọn àrị ayema papaye-ẹ.

¹¹⁹Sitịḅịnyana apụ mamgba ḅụrụsaye wẹrị ḅara ị́ nwọse ini wẹrịmẹ, anịẹrẹchị àrị ị́ telima ayema ḅẹlẹmamẹ.

¹²⁰Ị́rị́ gose ị̀ ḅalafamẹ; ḅalafa ị̀ ḅie ḅeinmẹ ị́ya ḅẹrẹkọn ḅịpị ma gose.

¹²¹Àrị iḅiye mị na karakaraye mị na mịẹsam; ị̀ ḅụ ḅarasin ị̀rị̀ na taraka apụma pịrịma!

¹²²Ḅereni, na ị́ ḅarachụa ị́ya fịrịnwẹngịḅọ ḅe pịrịḅịa; ḅerenima ḅụdekichịẹma apụ ị̀ pụnda!

¹²³Ị̀ tọrụmgbọlụma ḅụ ịnyọfasam, tọrụ se ị́ya ḍụaḅọrọma ḅarachụa mị ḍiki ḅụ, anị ị́ ḅereni ḍụaḅọrọma mị.

¹²⁴Ị́ya kunoka ḅẹlẹma mị sime ḅara nwọse ị̀rị̀ na anga, pịkị ị́ya olokoma se ị̀ telima.

¹²⁵Ị̀rị̀ ị́ya fịrịnwẹngịḅọ-ẹ; yekaịnḅo se ị̀ pịrị, mịẹse ị́ seni ị̀ telimarịaye ma à nwọ nemiḅịa ọkụ.

¹²⁶Nyanaḅọ, ị́ yemịẹḅịa sịkị lasam, anịatịḅị tomoni kọngọ kụrọma ị́ya olokoma pịrị aḅẹ.

¹²⁷Àrị ị́ya olokoma ḅẹlẹmatẹịn goli nẹngịmẹ, àrị ḅẹlẹmatẹịn iḅitẹịn goli ma nẹngịmẹ.

¹²⁸Anịẹrẹchị, ị́ telima aye mamgba à nwọ ḍukonwẹngịmẹ; à ḍikiḅụnwọnwọ nyana si mịẹmịẹaye mamgba wẹrịmamẹ.

¹²⁹Ị́ya ḍieaye ma ḅụgbiripumamẹ; ị̀ kuḅie laḅara à nwọse àrị kokomẹ.

¹³⁰Ị́ya ḍieaye ma pufinji mị enekuḅu pakụma pịkị nemi ọkịḅo yenemika apụma pịrịmẹ.

¹³¹Ị́ya olokoma ḅe kuḅie chịẹ chịẹ mị gose à be be ịnyọ saramẹ.

¹³²Pịkị ị̀ da se ị̀ ḍikiḅụgerere, anị ị́ ḅẹlẹma nyana pịrị apụ mamgba pịrịpịrị ḅara mị.

¹³³Ị́ yeḅerenisa ḅaraḅụ, ḅịkị ḅụ ị̀ dachịẹma; ḅerenima siye ị̀ nẹngịma.

¹³⁴Ị̀ pụnụma àrị apụma ḅaraḅie ị̀ ḍụapakụma, mịẹse àrị ị́ya olokoma kokoḅịa ọkụ.

¹³⁵Ị́ tọrụkuḅu nwọse ị̀ ḅẹlẹma pịkị ị́ya olokoma se ị̀ telima.

¹³⁶Ị̀ya owu-a mengi ma ideri mengi ideri ḅara nwọse iderimẹ, anịatịḅị tomonima ị́ya olokoma kokokẹ.

¹³⁷Ị́rị́ karakaraye mịẹḅọ-ẹ, Nyanaḅọ, ị́ya olokoma pịkị karakaramẹ.

¹³⁸Ị́ pịrị pakụma olokoma iḅi pịkị karakaramẹ.

¹³⁹Ị̀ya ịganị mị ị̀ ḅie ḅụ fịnị kọrị ọkụ kọrịmẹ, anịatịḅị ị̀rị̀na-tarakapụ ma ini ị́ya olokoma se yechịnkẹ.

¹⁴⁰Ị́ ḅereniye mị karakaraye-ẹ! Àrị anị ḅẹlẹma la-ọkụ ḍiki.

¹⁴¹À yeḅụofori-ẹ, ini pịkị ị̀ ḍikisimamẹ, ọkụma ị́ telima ayema à àrị sịkịkẹ.

¹⁴²Ị́ya karakaraye mịẹ mị simegbasoḅịa, ị́ya oloko mị pịkị sịkịmamgba karakaraye-ẹ.

¹⁴³Ḅalafa na kuḅie-chịẹ-chịẹ-chịẹ na ị̀ ḅie ḅeinmẹ, ọkụma ị́ya olokoma àrị ḅieḅẹlẹ ọkịḅo ị̀ pịrịmẹ

¹⁴⁴Sịkịmamgba ị́ telima ayema karakaramẹ; yekaịnḅo se ị̀ pịrị se à ḍumoḅịa.

¹⁴⁵Ị̀ kuḅiemgbọlụ mgba à nwọse ị́ chịn olokumẹ; ị̀ ḅịpị pẹkẹrẹ, Nyanaḅọ, se àrị ị́ya olokoma kokoḅịa!

¹⁴⁶Àrị ị́ chịnmẹ; ị̀ ḍụa, se àrị ị́ya olokoma kokoḅịa.

¹⁴⁷Tẹrẹrẹ ịrụa mị pakaḅo àrị ị́ chịnmẹ ḅarachụa ị̀ pịrị gose; àrị ị̀ kuḅie se ị́ ḅereniye mị ḅụgbanamẹ.

¹⁴⁸Ḍin mị ḅie mgba mọnọ ị̀ tọrụsọkẹ, àrị ị̀ kuḅie ị́ telima ayema ḍawọ aḅẹ.

¹⁴⁹Anịatịḅị ị́ya ḅẹlẹma mị kuno nyanakẹ, ị̀ naa, Yei Nyanaḅọ; ị́ya ḍikiḅụgerere mị ḍiepakụma se ị̀ ḍumo kpa.

¹⁵⁰Ḅẹrẹ-se-ị̀-pụnụma ḅẹlẹma apụma ini ị̀ kpekimaḅo aḅẹ, anị ngịsị ị́ya olokoma kokoka apụma.

¹⁵¹Ọkụma ị́rị́ ị̀rị̀na-kpekimẹ, Nyanaḅọ, ị́ya oloko mamgba pịkị chịẹ gbasomẹ.

¹⁵²Ḅọlọ sịkị ngịsị ị́ telima ayema na gbakịmaye à nwọ ḍawọmẹ; ị́ àrị mịẹmẹ àrị simegbasomẹ.

¹⁵³Ị̀ya tọrụsiọrị mị ḍiki, se ị̀ ḍụapakụma, anịatịḅị ma àrị ị́ya olokoma sịkịkẹ.

¹⁵⁴Owusọ ị̀ya karakara mị pịrị, se ị̀ pọkọpakụma; ị̀ ḍụa, ị́ ḅerenisa ḅaraḅụ.

¹⁵⁵Sitịḅịnyana apụma ini ḍụaḅọrọma nyana ẹkẹ, anịatịḅị ini ị́ya olokoma kokokẹ.

¹⁵⁶Ọkụma ị́ nyana ḍikitịḅịfoin mị, Nyanaḅọ, ḍụḅamẹ; ị́ya ḍikiḅụgerere mị ḍiepakụma se ị̀ ḍụa!

¹⁵⁷À ḅakama taraka apụ na, ị̀ pụndarị apụ na nyanamẹ, anịsọ ị́ya olokoma kokoḅụ àrị ọḅụdakẹ.

¹⁵⁸Ịbafịapụma à nwọ ọrị sịkị, ị̀ kuḅie simẹ, anịatịḅị ini ị́ya olokoma ọlọkẹ.

¹⁵⁹Ị́ telima ayema à nwọ ḅẹlẹma ọkụ ḍiki, Nyanaḅọ. Ị́ya ḅẹlẹma ngịsị ḍinma ḍinmakẹ, anịgose ị̀ ḍụa!

¹⁶⁰Ị́ya oloko mị mgba karakaramẹ, ị́ya karakara ḅẹrẹpẹlẹ mamgba simegbasomẹ!

¹⁶¹Kụrọ apụ ị̀ dapakamẹ yetịḅịtọnka ḅaraḅụ, ọkụma àrị ị́ya oloko mị osimẹ.

¹⁶²Ị̀ ḅieḅẹlẹ ọkụ ḍiki ị́ ḅereniye mị gose— anị yela ngọ ḍọkịḅoḅọ ḅieḅẹlẹ ḅara.

¹⁶³À ḍikiḅụnwọnwọ nyana iruo goyegoye pịrịmẹ, ọkụma àrị ị́ya oloko mị ḅẹlẹmamẹ.

¹⁶⁴Sọnọma sịkị à nwọse ene tịḅị ḅụ mịẹḅaka se ị́ ḅẹḅẹmẹ ị́ya karakara ḅẹrẹkọn mị gose.

¹⁶⁵Ị́ya oloko mị ḅẹlẹma apụma ini jokoma ḅọị nyọ nyanamẹ, pịkị mịẹse ini ḅịkịḅịaye ngịsị ofori-ẹ.

¹⁶⁶Àrị ị́ korumẹ ị́ ị̀ ḍụaḅịa gose, Nyanaḅọ, à pịkị ị́ tọnye mịẹmịẹmẹ.

¹⁶⁷Àrị ị́ telima ayema kokomẹ; ị̀ kuḅiemgbọlụ mgba à nwọse àrị ḅẹlẹmamẹ.

¹⁶⁸Àrị ị́ya olokoma na ị́ telima ayema na kokomẹ; à mịẹye goyegoye ị́ ọrịmẹ.

¹⁶⁹Ye ḅarachụa ị̀ pịrị gose à kọn àrị owu mị ḅo ị́ la, Nyanaḅọ! Yekaịnḅo nwọse ị̀ pịrị, ị́ ḅerenisa ḅaraḅụ.

¹⁷⁰Ị̀ya tẹkẹ mị poki, se ị́ ḅerenisa ḅaraḅụ ị̀ ḍụa.

¹⁷¹À sịkịmamgba ị́ bomaḅịa, anịatịḅị ị́ya olokoma ị́ nwọse ị̀ telimamẹ.

¹⁷²Àrị ị́ya olokoma na gboloma nime chuḅịa, anịatịḅị ị́ya olokoma karakaramẹ.

¹⁷³Sịkịmamgba ḅụkarakarama se ḅarachụa ị̀ pịrị, anịatịḅị àrị ị́ya olokoma ḍukonwẹngịmẹ.

¹⁷⁴Àrị opuma tọrụ se ị́ya ḍụaḅọrọma ḅarachụa mị ḍikimẹ, Yei Nyanaḅọ! Ị́ya oloko mị ḅie à ḅieḅẹlẹ nyanamẹ.

¹⁷⁵Ḍumo se ị̀ pịrị, mịẹsosịkị àrị ị́ ḅoma ḅịa ḅara; ye ị́ya datekerema ayema ḅarachụa ị̀ pịrị.

¹⁷⁶Fa anana ateli iri ọkụ àrị irima ḅọrọmẹ; anịẹrẹchị ḅo ị̀ ḍọkị, ị̀rị̀ ị́ya fịrịnwẹngịḅọ ḅe, anịatịḅị ma àrị ị́ya olokoma sịkịkẹ.