Read kirikeni Fịafịa Nime 135 Bible Online

Fịafịa Nime 135 - kirikeni bible

Fịafịa Nime 135

¹Ọ́ Nyanaḅọ Ḅe boma! Oria ẹrẹ boma, ómine Nyanaḅọ Ḅe fịrịnwẹngịapụma,

²ómine Nyanaḅọ Ḅe warị ḅie, anị mịna Tamụnọ Ḅe, oria Oputẹkẹwarị mị ḅie chịẹ-chịẹ apụma.

³Ọ́ Nyanaḅọ Ḅe boma, anịatịḅị ori iḅimẹ; ó nime chu oria ẹrẹ mị boma, anịatịḅị ori iḅi mịẹmịẹmẹ.

⁴Ò Jekọb ḅe sẹlẹ ọ̀ ḅụ pịrịmẹ, Izrẹlapụma sime ọ̀ pịrịapụ-ẹ.

⁵À nemimẹ na wa Nyanaḅọ Ḅe ọ̀ ḍụḅamẹ, ọ̀ ḍụḅatẹịn oru mamgba nẹngịmẹ.

⁶Ò ḅie tọnye ọ̀ nwọ mịẹmịẹmẹ, soḅie na sẹkiri ḅie na, opu-a tọrụ ma ḅie na, gbun ḍian ma chuku ḅie na.

⁷Irisi oḅuto ọ̀ nwọse ḅomẹ sẹkiri ḅie kuluma nyọma ḅieḅụ; ò so wakam mị mịẹ irisi mị pịrịmẹ, ọ̀ pịkị oria ngọ koko warị mị ḅie ḅụ fọrụ mị ọkịpakụmaḅomẹ.

⁸Ijipt ḅie, ini tatarị yi aye mamgba ọ̀ nwọ ḅaamẹ, owuapụ awọ na nama na gbọrị ḅaraḅụ.

⁹Anịanga ọ̀ ḅụ buanma aye na ḅụgbiripuma aye na mịẹmẹ, se fomuḅara se amanyanaḅọ ḅe na oria fịrịnwẹngịapụma na pịrịmẹ.

¹⁰Ọ̀ tọn tọn-a sẹ famamẹ, ọ̀ pịkị kụrọ amanyanapụ ḅaamẹ:

¹¹Saịhọn Amọraị amanyanaḅọ ḅe na, Ọg, Bashan amanyanaḅọ ḅe na, pịkị Kenan amanyanapụ mamgba na.

¹²Ori inia kirima se oria tomonima pịrịmẹ; ori àrị se Izrẹl mị pịrịmẹ.

¹³Nyanaḅọ, sịkịmamgba ini ị́ ḍukopakụmaḅịa Tamụnọ ḅaraḅụ; ḅụọḅụọ mamgba ị́ se ḅiekoromaḅịa.

¹⁴Nyanaḅọ Ḅe ori owusọ oria tomonima pịrịḅịa; ori oria fịrịnwẹngịapụma ḍikitịḅịfoinḅịa.

¹⁵Sẹ sẹma ḅe oru ma seleḅa na goli na ini nwọse àrị tẹmẹmẹ; mbuapụ inia ḅarama se àrị tẹmẹmẹ.

¹⁶Àrị ḅịpị nyanamẹ, ọkụma àrị ineda ọkwẹịnkẹ, pịkị tọrụmgbọlụ na, ọkụma àrị ineda ye ọrịkẹ.

¹⁷Àrị ḅeri nyanamẹ, ọkụma àrị ye naakẹ; àrị pịkị ineda ọwụ sara ẹkẹ.

¹⁸Ye àrị tẹmẹ apụ mamgba na, pịkị kuḅie se arịaḅụ gbana apụ mamgba na ḅo ini tẹmẹ oru ma sime ọkụ sime!

¹⁹Ọ́ Nyanaḅọ Ḅe boma, Izrẹlapụ; ómine ò boma, ómine Tamụnọ agbamịẹapụma!

²⁰Ọ́ Nyanaḅọ Ḅe boma, ómine Livaị apụ; ómine ò boma, ómine ọ̀ tẹkẹarịapụ mamgba!

²¹Ọ́ Zaịyọn ḅie Nyanaḅọ Ḅe boma, oria ama, Jerusalẹm ḅie. Ọ́ Nyanaḅọ Ḅe boma!