Read kirikeni Fịafịa Nime 140 Bible Online

Fịafịa Nime 140 - kirikeni bible

Fịafịa Nime 140

¹Ị̀ ḍụa, Nyanaḅọ, si apụma ḅara ḅie kụrọkụrọaye mịẹ apụma ḅara ḅie ị̀ ḍụa.

²Ini sịkịmamgba siaye ḅia aḅẹ, ini pịkị sịkịmamgba kamụ owoima-owoimamẹ.

³Inia ḅịpị ḅieḅẹlẹ ma nweni ḅaaḅaa oruwu sime ọkụ simemẹ; inia ọkwẹịn ma ọfọrọfọ ịlakpọ sime ọkụ simemẹ.

⁴Ị̀ ḅọị, Nyanaḅọ, sitịḅịnyana apụma kụrọ ḅara ḅie; kụrọkụrọaye mịẹ apụma ḅara ḅie ị̀ ḍụa anị ị̀ya ḅịkị gose ḅẹrẹ ḅia ị̀ pịrịarị apụma.

⁵Opuaye mịẹ apụma ḍẹịntu ị̀ pịrịsam; ini inia ḍiki-ḍẹịn ma tu koromasam, ateli ḅie ini inia ḍẹịn ma karakarama koromasam, se ị̀ kunḅịa ẹrẹchị.

⁶À nwọse Nyanaḅọ Ḅe ḅẹmẹ, “Ị́rị́ ị̀ Tamụnọ-ẹ.” À kọn àrị ḅarachụa ḅi owu mị na, Nyanaḅọ!

⁷Ị̀ Nyana Kụrọmamgba Nyanaḅọ, kụrọma owu sọ ị̀ pịrịarịḅọ, ọmụ ḅie ị́ ị̀ ḅọịsam.

⁸Nyanaḅọ, sitịḅịnyana apụma, ini ḅi arịye mị se ini pịrịma; ḅerenima ini ḅia àrị ḅẹrẹ ma ḅụọ nyana chịẹ.

⁹Ḅerenima ọmụ ị̀rị̀na-taraka apụma ḅara iḅi; mịẹ ini se ị̀ ẹrẹma arịaye ma pịkịmaḅo iniaḅụ mịẹ.

¹⁰Ye ọfịrị anyịmgbọlụ inia ọgọnọ sara; ye ini ini se olulu ḅie gbin se ini ḅarị ngịsị pakaḅoma.

¹¹Ye iruo-a ḅẹrẹ se jịn apụ pụnụmarịapụ ma, mịẹmịẹaye inia ḅara sọma; kụrọkụrọaye mịẹ apụma, ye siaye iniaḅụ paka se ini ḅaakọsịma.

¹²Nyanaḅọ, à nemimẹ na ị́ owusọ igweinḅọ ḅe ịgbanịarịye mị pịrịpịrịmẹ; pịkị mịẹḅịa-ọkụ oforiḅọ ḅe oria karakara mị na.

¹³Karakaraye mịẹ apụma ini kọkọma ị́ bomaḅịa; ini ị́ tọrụkuḅu anga gbasoḅịa.