Read kirikeni Fịafịa Nime 141 Bible Online

Fịafịa Nime 141 - kirikeni bible

Fịafịa Nime 141

¹Àrị ị́ chịn olokumẹ, Nyanaḅọ, ḅarachụa ị̀ pịrị mịọkụ! Ị̀ poki àrị ị́ chịn oloku àrị sịkịḅụ.

²Insẹnsị ḅara nwọse ị̀ya tẹkẹ mị ọkị, saso agba ḅara nwọse à dekichịẹma ḅarama ọkị.

³Nyanaḅọ, ye se ị̀ ḅịpị ḅọkọ ọbị, nyọ koru owuniḅọ se ị̀ ḅịpị ḅọkọ ḅụ koroma.

⁴Siye mịẹ pụkọtarị ḅụ ị̀ sikima, pịkị siaye mịẹapụ ḅụ sọ inia sitịḅịnyana mịẹmịẹaye ma mịẹḅụ na. Ye àrị ini na inia alalị ma fịma.

⁵Iḅi tomoniḅọ ineda fomuḅara se ị̀ pịrị pịkị ị̀ ḍiki ịganịḅịa, iḅiyemịẹ ḅaraḅụ, ọkụma à siapụ ḅaraḅo osi ọkị ẹkẹ, anịatịḅị sịkịmamgba à tẹkẹaḅẹ, inia si-a mịẹmịẹaye ma gose.

⁶Ini inia tịḅịnịma se tụndụma ọgọnọ ḅụ gbin wokumaḅịa sịkị, tomonima ini ḅereniḅịa na ị̀ya ọkwẹịn ma karakara aye-ẹ.

⁷Ini ikiḅa-ikiḅa ma woli se pẹkẹrẹ pẹkẹrẹḅụ pu fịnị sime ọkụ anị inia ịmgbema iḍupuma aka sịkị ḅụ galagala sime ọkụ-ẹ.

⁸Ọkụma à pa kuḅie se ị́ ḅụgbanama mun aḅẹ, ị̀ya Kụrọmamgba Nyanaḅọ. Ị́ ḅie àrị ịnyasọ ḍọkị mẹ; ḅereni se à fịma!

⁹Ị̀ gbẹịn ini tu ị̀ pịrị ḍẹịn ma ḅie, siaye mịẹapụ ma karakarama ị̀ pịrị ḍiki-ḍẹịn ma ḅie.

¹⁰Ye siaye mịẹapụ ma inia ḍẹịn ma ḅie koro, se ye ị̀ lakaḅaraḅụ à so.