Read kirikeni Fịafịa Nime 143 Bible Online

Fịafịa Nime 143 - kirikeni bible

Fịafịa Nime 143

¹Nyanaḅọ, ị̀ya tẹkẹ naa! Ị́ya karakara ḅụ à kọn àrị owu mị poki; ị́rị́ kuḅie se ḅụgbana gbẹịnḅọ ḅaraḅụ ị̀ ḅịpị pẹkẹrẹ!

²Ị̀rị̀ ị́ya fịrịnwẹngịḅọ ḅe ḍaḍikima; ị́ tọrụkuḅu siye mịẹkaḅọ ofori-ẹ.

³Ị̀rị̀na-tarakaḅọ ḅe ori ị̀ kun koroma se gbọtụma ị̀ nẹngịmasam. Ori ị̀ se kanakana ikoliḅie chusam, ḅọlọsịkị ngịsị fị ḅọrọsa apụma sime ọkụ anị à simesa ọkụ-ẹ.

⁴Anịgose à ḅụkarakaramasam na à ḅịkị koroḅịa; opu kururu ḅie àrị omi-ẹ.

⁵À ḅọrọsa enema se ḅiekoromamẹ; ị́ mịẹsa aye mamgba à nwọse ḅiekoromamẹ, ị́ nwẹngị-a fịrị mamgba à se ị̀ kuḅie chụamẹ.

⁶Àrị ị̀ ḅarama dekichịẹma ị́ pịrịmẹ tẹkẹḅụ; samịna kpoin kpoin kiri sime ọkụ, mengi pụkọtarị ḅara ị́ nwọse ị̀ tẹmẹ mị tarịmẹ.

⁷Ị̀ ḅịpị pẹkẹrẹ mịọkụ, Nyanaḅọ! À tọrụseḍikiarịye ḅarị ofori-ẹ. Ị́ ḅụ ḅọị ị̀ pịrịma, anị ofori à koromun fịsapụma na inia tomonikiri ḅie sọḅịa.

⁸Dede goyegoye ḅụ ị́ya kunoka ḅẹlẹma mị se ị̀ ḅiekoroma, anịatịḅị àrị ị̀ kuḅie se ị́ ḅụgbanamẹ. Ị̀ya tẹkẹma iwo ị́ damaḅomẹ; à munḅịa ateli se ị̀ ḍie.

⁹Ịnyasọ gose àrị ị́ damaḅomẹ, Nyanaḅọ; ị̀ ḍụa ị̀rị̀na-taraka apụma ḅaraḅie.

¹⁰Ị́rị́ ị̀ Tamụnọ-ẹ; ị́ ḅiye mị mịẹḅịa ọkụ se ị̀ telima. Iḅi se ị̀ mịẹ se ị̀ datekerema mun ye ị̀ la-ẹka ateli ḅie chu.

¹¹Ị̀ ḍụa, Nyanaḅọ, ị́ ḅerenisa ḅaraḅụ; ị́ya iḅimịẹ ḅụ, ị̀ya ḅụfụka ma ḅie ị̀ ḍụa!

¹²Ị́ nyana ị̀ pịrị ḅẹlẹma gose, ị̀rị̀na-taraka apụma ḅaasin, pịkị ị̀ pụnụma àrị apụ mamgba, anịatịḅị ị̀rị̀ ị́ya fịrịnwẹngịḅọ-ẹ.