Read kirikeni Fịafịa Nime 144 Bible Online

Fịafịa Nime 144 - kirikeni bible

Fịafịa Nime 144

¹Ọ́ Nyanaḅọ Ḅe boma, ị̀ya ḅọị nyọ ḅe! Ori ọmụ gbin ọkụ se ị̀ telimamẹ ọ̀ pịkị ị̀ karakarama owu pịrịmẹ.

²Ori ị̀ya ḅụḅọị nyọ-ẹ pịkị owusọ ị̀ pịrịarịḅọ-ẹ, ị̀ya tịḅịkikima nyọ pịkị ị̀ya ḍụaḅọrọmaḅọ-ẹ, anị ye ị̀ la-ẹkẹ kuḅie kụrọ à nwọ nyana pịrịḅọ ḅe-ẹ. Ị̀ chuku ḅie sime a sẹma ọ̀ nwọ nẹngịmamẹ.

³Nyanaḅọ, tomoniḅọ ḅe ḅọrọ cheye se ị́ ò se ye chịnḅe; papa tomoniḅọ-ẹ, se ị́ ọ̀ ḅụ koromakọnḅe?

⁴Ini sara pakụma àrị ọwụ sime ọkụ anị ò sime ọkụ-ẹ; oria enema, ḅọrọarị tẹmẹ sime ọkụ simemẹ.

⁵Yei Nyanaḅọ, so mị kan finji se koroḅo; ḅara se tụndụma lama, se àrị onwoin ọsụn pakụmaḅoḅịa.

⁶Sowakam ḅịama pakụma ị́rị́na-taraka apụma galagalama; ị́ya ḍẹịn ma tẹịn ini sẹịnma se ini mangị.

⁷Ọgọnọju ị́ ḅara suma koroma, gbun mengi mị ḅie ị̀ nụnụpakụma se ị̀ ḍụapakụmaḅo; jịn sẹ apụma ḅaraḅie ị̀ ḍụa,

⁸anị ngịsị karakaraye ḍukoḍukoka apụma pịkị yekarịfị so se iruo kọnkọn apụma.

⁹Àrị ịwọ nime chu se ị́ bomaḅịa, Yei Tamụnọ; àrị ọbọ farị se nime chu ị́ bomaḅịa.

¹⁰Ị́ ọmụḅaraiḅi se amanyana apụma pịrịmẹ; ị́ pịkị ị́ya fịrịnwẹngịḅọ Devid ḅe ḍụamẹ.

¹¹Ị̀ ḍụa ị̀rị̀na-taraka sitịḅịnyana apụ ḅaraḅie; jịn sẹ apụ kụrọ ḅarama ḅie ị̀ ḍụa, anị ngịsị karakaraye ḍukoḍukoka apụma pịkị yekarịfị so se iruo kọnkọn apụma.

¹²Ye mịna owuapụ awọma inia kala sịkị ḅụ kụrọ chịn sẹnị ọkụ sẹnị. Ye mịna eremeni awọma iḅi ogbochịn sime ọkụ sime, anị amanyanaḅọ warị ḅie ịkọlị ma ḅirima ayema sime ọkụ.

¹³Ye mịna fịye koko-a warịma ḅie kịrịkịrị fịaye ḅein. Ye mịna ele ma ḅie sime ananama mẹndẹ oyiasi fịnjị fịnjị ḅe oyi-a kiri nwọ yi.

¹⁴Ye mịna nambuloma sime arịaḅụ sokaḅụ ḅakama yi, àrị fa anịkanịka fịma. Ye ḅụakụ owu-a tịḅịḅie mịna ateli ma ḅiefiema.

¹⁵Ḅieḅẹlẹ sime ma ayema paka pịrị sẹ mị pịrị; ḅieḅẹlẹ sime Nyanaḅọ Ḅe ọ̀ Tamụnọ sọ pịrị apụma pịrị.