Read kirikeni Fịafịa Nime 145 Bible Online

Fịafịa Nime 145 - kirikeni bible

Fịafịa Nime 145

¹Àrị ị́ya opu mị ḍuko finjima ḅịa, ị̀ Tamụnọ pịkị ị̀ya amanyanaḅọ; à mịẹḅaka se ị́ ḅẹ mun ḅene-ḅene laḅịa.

²Ene ḅene-ḅene à mịẹḅaka se ị́ ḅẹḅịa; àrị ị́ boma mun ḅene-ḅene laḅịa.

³Nyanaḅọ Ḅe opuḅọ-ẹ, ini pịkị geleḅọ ḅara nwọse ò boma; oria opu mị tomoni-a yekaịnḅo saḅakoromẹ.

⁴Ị́ mịẹsa ayema nweni àrị se ị́ boma mun ḅụọ ḅụọ laḅịa; ini ị́ nwẹngịsa opu-a fịrịma ḍuko finjima ḅịa.

⁵Ini ị́ya boma mị na, amanyanaḅọ opu mị na ḅe ḅẹrẹ ḍukoḅịa, à pịkị ị́ya ḅụgbiripuma fịrịma se ị̀ kuḅie chụa koromaḅịa.

⁶Tomoni ị́ nwẹngị opu-a fịrịma ḅe ḅẹrẹ ḍukoḅịa, à pịkị ị́ya opu mị ḍuko finjimaḅịa.

⁷Ị́ya iḅi mị na gbakịma aye mamgba ini nwọ ḍukoḅịa, se ini pịkị ị́ya iḅimịẹ mị na gbakịma nime chuḅịa.

⁸Nyanaḅọ Ḅe anị ḅẹlẹma pịkị ḍikiḅụgerere nyanaḅọ-ẹ, ọ̀ sarama ịganị-ganịkẹ, kunoka ḅẹlẹma pịkị ọ̀ ḅụ ḅeinmẹ.

⁹Ori iḅi ḅọḅọ pịrịmẹ, ọ̀ pịkị ḍikitịḅịfoin nyana ọ̀ tẹmẹ aye mamgba pịrịmẹ.

¹⁰Nyanaḅọ, ị́ tẹmẹ aye mamgba ị́ bomaḅịa, ị́ya tomoni mamgba pịkị mịẹḅaka se ị́ ḅẹḅịa.

¹¹Ị́ya boma amanyana mị ḅe kụrọ ḅẹrẹ ini nwọ ḍukoḅịa, pịkị ị́ya opu mị ḅe ḅẹrẹ na,

¹²mịẹsosịkị ọrụḅọḅọ ị́ya opu-a fịrịma na, boma nyana amanyanaḅọ opu mị na, pịkị ị́ya amanyanakiri mị na nemiḅịa ọkụ.

¹³Ị́ya ḅẹrẹtọn mị sime gbasomẹ, ị́ pịkị amanyanaḅọ sọ gbasoḅịa. Nyanaḅọ Ḅe, ò ḅereniaye ma ọ̀ mịẹmẹ; ọ̀ pịkị ḍikiḅụgerere nyanamẹ oria mịẹmịẹaye mamgba ḅụ.

¹⁴Ọ̀ ḅarachụa ḅụfụka ḅie sime apụma pịrịmẹ; ọ̀ ḅịkịsa apụma dekichịẹmamẹ.

¹⁵Ḍumo nyana aye mamgba tọrụ se ị́ ḍikimẹ, ị́ pịkị fịaye se àrị pịrịpịrịmẹ àrị ḅi sịkịḅụ.

¹⁶Ị́ ḅakama se ini pịrịmẹ inimgba ḅi ḅaraḅụ; pịkị ini ḅiye layelaye.

¹⁷Nyanaḅọ Ḅe ọ̀ karakaramẹ, ọ̀ mịẹaye mamgba ḅụ, ò ḍikiḅụgerere nyanamẹ oria mịẹmịẹaye mamgba ḅụ.

¹⁸Ọ̀ chịn oloku àrịapụ ma ori ini na kpekimẹ, anị karakara kuḅie se ọ̀ chịn oloku àrịapụ ma-ẹ.

¹⁹Osi nyana ọ̀ pịrịapụ ma, inia ḅụḅalaḅala ma ayema ọ̀ mịẹ ini pịrịpịrịmẹ; ori inia owu ma na se pịkị ini ḍụaḍụamẹ.

²⁰Ọ̀ ḅọị nyọ sọ ọ̀ ḅẹlẹmaḅọ goyegoye pịrịpịrịmẹ, ọkụma ò sitịḅịnyana apụma ḅaasinḅịa.

²¹À sịkịmamgba Nyanaḅọ Ḅe bomaḅịa; ye ọ̀ tẹmẹ aye mamgba oria fịafịa ẹrẹ mị boma gbaso.