Read kirikeni Fịafịa Nime 146 Bible Online

Fịafịa Nime 146 - kirikeni bible

Fịafịa Nime 146

¹Nyanaḅọ Ḅe boma! Nyanaḅọ Ḅe boma, ị̀ tẹmẹ!

²Àrị ò bomaḅịa à ḍumo la-ene la-ene; à nime chu ị̀ Tamụnọ Ḅe pịrịḅịa ị̀ya ḍumo ene mamgba ḅụ.

³Kuḅie se tomoni-a tịḅịda apụ ḅụgbanama; ineda ị́ ḍụaḅịa tomoniḅọ ofori-ẹ.

⁴Ini fị sịkị ini pịkịmaḅo fọn sọmẹ; anị ene mị ḅụ, ini tọn se ini mịẹḅịaye mamgba ḅo kulumamẹ.

⁵Ḅieḅẹlẹ sime Jekọb Tamụnọ Ḅe ḅarachụa pịrịarịḅọ ḅe pịrịmẹ, anị pịkị ọ̀ Nyana Tamụnọ Ḅe se ḅie kpọmaḅọ ḅe,

⁶so mị na sẹkiri mị na pịkị tọrụ mị na tẹmẹḅọ ḅe, pịkị arịa ḅie sime aye mamgba na. Ò ḅereniaye ma ò koko gbasomẹ;

⁷ọ̀ ḅẹrẹ iḅi kọn ini pụnda àrị apụma ḅara iḅima-iḅimamẹ, se ọ̀ pịkị fịaye se ḅurupụkọtarịarị apụma pịrịpịrịmẹ. Nyanaḅọ Ḅe ori ikoliapụma pọkọ pakụmapakụmamẹ ikoli ḅie,

⁸ọ̀ pịkị tọrụmgbọlụ pụn apụma tọrụmgbọlụma finji finjimẹ. Ḅịkịsa apụma ori ini dekichịẹma-chịẹmamẹ; ori oria karakaraye mịẹarị tomonima ḅẹlẹmaḅẹlẹmamẹ.

⁹Ọ̀ ḅụḅọị nyọ sọ mịna ama ḅie anga igoni apụma pịrịmẹ; ọ̀ ḅarachụa deapụ fịsa eremeni na ḍa-apụ na nyengi apụ na fịsa awọma pịrịpịrịmẹ, ọkụma ò sitịḅịnyana apụma ọkịmun faḅie chuchumẹ.

¹⁰Nyanaḅọ Ḅe, sime gbaso amanyanaḅọ-ẹ. Ọ́mịna Tamụnọ Ḅe, Yei Zaịyọn, ori amanyana gbasoḅịa. Ọ́ Nyanaḅọ Ḅe boma!