Read kirikeni Fịafịa Nime 147 Bible Online

Fịafịa Nime 147 - kirikeni bible

Fịafịa Nime 147

¹Ọ́ Nyanaḅọ Ḅe boma! Anị iḅimẹ wa nime chu mịna Tamụnọ Ḅe boma; anị tọrụḅẹlẹma pịkị karakaramẹ ò boma mị.

²Nyanaḅọ Ḅe, ọ̀ mịẹ-aḅẹ Jerusalẹm mị anị tatarị simeọkụ simeḅịa; ini kụrọḅara se desin apụma ọ̀ nwọ ọkị pịkịmaḅoaḅẹ.

³Kansa kuḅie ma ọ̀ nwọ gwọ se ịnọ fịna ḅịtẹ se inia ịnọ ma fịnamẹ.

⁴Lolia ma ḅe kịẹnḅịpị ò nemi ḅọrọsam, ọ̀ pịkị ẹrẹ se gbọrịye gbọrịye chịnmẹ.

⁵Wa Nyanaḅọ Ḅe opuḅọ-ẹ pịkị ḍụḅaḅọ-ẹ; se oria nemi mị otoma ḅịaye ofori-ẹ.

⁶Ọ̀ ḅụiderima apụma dekichịẹma-chịẹmamẹ, ọkụma sitịḅịnyana apụma ọ̀ nwọ kọsịma dẹkịdẹkịma kiri pịrịmẹ.

⁷Ó boma nime chu Nyanaḅọ Ḅe pịrị; ómine ọbọ ma se ḅẹlẹ-a nime chu se mịna Tamụnọ Ḅe pịrị.

⁸So ma ọgọnọ ḅụ ò soḅuno ma wasamamẹ; ori ene se sẹkiri mị pịrịmẹ, ọ̀ pịkị mịẹmẹ chịngịma ọgọnọ osuein pakamẹ.

⁹Nama ma ori arịa fịaye se àrị pịrịmẹ, ọ̀ pịkị fịaye se ayamburama kurukịara ma pịrịmẹ àrị ọ̀ chịn sịkị.

¹⁰Oria ḅieḅẹlẹ mị kụrọ asụn ḅụ anị ofori-ẹ, pịkị oria opu ḅieḅẹlẹ mị kuḅie kụrọ owuni ḅụ anị ofori-ẹ;

¹¹ọkụma osi nyana ọ̀ pịrị apụma ḅụ mị ò ḅieḅẹlẹ nyanaye-ẹ, kuḅie se ọ̀ ḅụgbana apụma ḅụ mị oria kunoka ḅẹlẹma mị simeye-ẹ.

¹²Ọ́ Nyanaḅọ Ḅe boma, Yei Jerusalẹm! Ị́ Tamụnọ Ḅe boma, Yei Zaịyọn!

¹³Ori ị́ya onu-a ḅọkọ ma ọlọ kụrọmamẹ; ori ị́ya tomonima ḅẹlẹmamẹ.

¹⁴Ọ̀ tọrụ se ị́rị́na-jịn apụ na eke ma ḅụ wẹrịmẹ, se iḅitẹịn fịturu mịẹ ịpịamgba se ọ́mịna ḅụlọ ḅeinmamẹ.

¹⁵Ọ̀ ḅẹrẹtọn sẹkiri mị pịrịmẹ, ọ̀ tọnye mị pịkị be mịẹmẹ.

¹⁶Mọnọye gbẹịnye ḅara, ọ̀ nwọse soḅie koroḅo okpokpo-okpokpo mengi ma wasamamẹ, fọn galagalama ḅara ọ̀ nwọse nweni ngịsị ineda inema ẹka opu oḅoku mị galagalamamẹ.

¹⁷Onwunmgbọlụ ḅara ọ̀ nwọse obitụnụ ene mị se sẹịnmẹ; ineda ò se sẹịn oḅoku mị inemaḅịa gbọrịḅọ sọnị ofori-ẹ.

¹⁸Anịsịkị ò ḅo kụrọ pịrịmẹ, se kpo oḅoku mengi ma sanịmẹ; pịkị fọrụ fịrịma pakụmamẹ, se mengi mị serimẹ.

¹⁹Oria oku ọ̀ nwọse oria tomonima pịrịmẹ, ọ̀ tọn ayema na olokoma na ọ̀ nwọse Izrẹl mị pịrịmẹ.

²⁰Mịn ye mị ma ọ̀ mịẹ jịn-a sẹ pịrịkẹ; oria olokoma ini nemikẹ. Ọ́ Nyanaḅọ Ḅe boma!