Read kirikeni Fịafịa Nime 17 Bible Online

Fịafịa Nime 17 - kirikeni bible

Fịafịa Nime 17

¹Yei Nyanaḅọ, ị̀ya karakaraḅụ à kọn àrị ọkwẹịn mị poki; ị́ ḅeri tokoloma à kọn àrị ḅarachụa owu mị poki! Ị̀ya karakara tẹkẹ mị poki.

²Ị́ ḅẹrẹkọn ị̀ ḅara iḅimaḅịa, anịatịḅị karakaraye mị ị́ nemimẹ.

³Ị̀ kuḅie ị́ nemimẹ. Ḍin ḅụ ị́ ị̀ damaḅosam; ị́ ị̀ pekele ḍikisosam ị̀ ḅie ị́ pịkị gbọrị sikoromasọ ọrịkẹ. À si ọkwẹịn kọnkẹ,

⁴anị ísíapụma mịẹọkụ mị; ị́ tọn ayema ḍukoye à mịẹsam à pịkị si ateli ḍuko nwẹngịkẹ.

⁵Sịkịmamgba ị́ya ateli ḅie à nwẹngịmẹ à pịkị anịa ḅie ma iri sikimakẹ.

⁶Àrị ị́ tẹkẹmẹ, Yei Tamụnọ, anịatịḅị ị́ ị̀ pẹkẹrẹ-pẹkẹrẹmẹ; anịẹrẹchị tọrụpịkị ị̀ da se ị̀ya ọkwẹịn ma poki.

⁷Ị́ya ḅụgbiripuma ḅẹlẹma mị ḍiepakụma se ị̀ ḍụa; ị́ anga sịkị ḅụ ị̀rị̀na-tarakapụ ma se ị̀ mịẹḅịaye ofori-ẹ.

⁸Ị́ ị́ tọrụmgbọlụma kpa ḅara nwọse ị̀ kpa; ị́ pamba ma chukuḅie ị̀ ḅọị

⁹sitịḅịnyanapụma se ị̀ dapakaḅịaye ma ḅie. Nweni ḅaa ḅẹlẹma ḅẹlẹma tarakapụ ị̀ kelemamẹ;

¹⁰ini ḍikitịḅịfoin nyanakẹ, ini pịkị kpokoro ọkwẹịn kọnkọnmẹ.

¹¹Mịọkụ ini ị̀ kelema waraḅẹ, adanga-adangaḅụ, ini ị̀ jine gbinḅịa ẹmbẹ nwọ koruaḅẹ.

¹²Chịrịḅa ḅe nweni koru ọkụ ini nwọse ị̀ korumẹ, ị̀ kanịkọsịmaḅịa ẹrẹchị.

¹³Ḅo, Nyanaḅọ! Ị̀rị̀na-tarakapụma dapaka se ini inuma! Ị́ya okola-agiji mị se sitịḅịnyanapụma ḅaraḅie ị̀ ḍụa;

¹⁴mịn ḍumoḅie, inia ḅietọnye nyanapụ ma ḅaraḅie ị̀ ḍụa. Ị́ koko ini wẹrịma tọrụsiọrị ma ḅe fomuḅara se ini pịrị; ye anịaḅụ ḅakaye sime inia awọma pịrị kọn aye pịkị sime inia awọma awọma pịrị!

¹⁵Ọkụma àrị ị́ ọrịḅịa, anịatịḅị ma à mịẹsa si ofori-ẹ; se à mọnọḅụ sịsẹ sịkị ị́ ị̀rị̀na-omi-ẹ ḅẹye mị ḅe ḅieḅẹlẹ ị̀ ḅie ḅeinḅịa.