Read kirikeni Fịafịa Nime 2 Bible Online

Fịafịa Nime 2 - kirikeni bible

Fịafịa Nime 2

¹Cheye gose sẹma kọngọ kụrọma mịẹmịẹaye tọn-ao? Cheye gose tomoni ye ḅụ oforika ḅẹrẹ ḅi-ao?

²Inia amanyanapụma ini kụrọtịḅịḅie chụasam, inia tịḅịnịma ini gboloma se ḅẹrẹ ḅia Nyanaḅọ Ḅe na pịkị ò sẹlẹ ọkịsa amanyanaḅọ ḅe na pịrịsam. Ini nwọ ḅẹmẹ;

³“Ó ye wa inia ḅẹrẹtọn mị chukuḅie pọkọ so,” “ó ye wa ini tọn wa pịrịarị ḅẹrẹ ma se gbin wokuma.”

⁴Nyanaḅọ Ḅe soḅie oria emine ọgọnọ sime se ḍẹrịaḅẹ pịkị ini tọn àrị yeḅụoforikaye ma se kpọtiaḅẹ.

⁵Anịsịkị yeḅụosọḅụ ori inia ḅeri jineaḅẹ pịkị oria opu ịganị mị se inia ḅalafamaḅẹ.

⁶Ọkụma Nyanaḅọ Ḅe nwọ ḅẹmẹ, “Ị̀ya osi nyana Zaịyọn chịngị mị ọgọnọ,” ọ̀ nwọ ḅẹmẹ, “Àrị ị̀ya amanyanaḅọ ḅe kunsam.”

⁷“À ḍukopakụmaḅịa,” amanyanaḅọ ḅe nwọ ḅẹmẹ, “Nyanaḅọ Ḅe mịẹḅịaye mị. Ọ̀ nwọse ị̀ ḅẹmẹ: ‘Ị́rị́ ị̀ya owutọkụ-ẹ; mịmgba à ḅo ị́ ḍa sọsam.

⁸Ḅi, sẹ mamgba à pịkị se ị́ pịrịḅịa; bebe tomonikiri mị mgba ị́yaye sọḅịa.

⁹Ikulele amgbara ị́ nwọse ini kanḅịa; aḅaịn ḅẹlẹ kọsịma ọkụ ị́ nwọse ini kọsịmaḅịa.’”

¹⁰Mịn ḅeri nụnụye mị ọ́ nwọ poki mịọkụ, ómine amanyanapụ; ọ́ mịn ḍawọye mị ḍawọ, ómine sẹkiri ḅie ḅẹrẹtọn àrị apụ:

¹¹Ḅalafaḅụ ọ́ fịrịnwẹngị Nyanaḅọ Ḅe pịrị; ọ́ ḅụgeregere nyana

¹²se tịḅịtu ọ̀ pịrị anị ofori oria ịganị mị ḅọlọ ẹkẹ anị owoiḅịa, se ḅụnemika ḅaraḅụ ọ́ fịḅịa. Ḅieḅẹlẹ sime ọ̀ damamun se ọ̀ ḅara ịnyasọ-apụ mamgba pịrị.