Read kirikeni Fịafịa Nime 22 Bible Online

Fịafịa Nime 22 - kirikeni bible

Fịafịa Nime 22

¹Ị̀ Tamụnọ, ị̀ Tamụnọ, nde ị́ gose ị̀ ḅụ ḅarasin aye? À kụrọma owusam ḅarachụa gose, ọkụma anịẹḅẹsọ anị ḅokẹ.

²Enekakaḅụ àrị ị́ chịn owumẹ, ị̀ Tamụnọ, ọkụma ị́ ị̀ pẹkẹrẹkẹ; Ḍin ḅụ àrị ị́ chịnmẹ, ọkụma à dein nyanakẹ.

³Fịafịaḅọ ḅaraḅụ emine mị ọgọnọ ị́ omi-ẹ, ị́rị́ anị Izrẹlapụma tokoni arịḅọ ḅe-ẹ.

⁴Mịna ḅieju-a ḍapụma ini kuḅie se ị́ ḅụgbanamẹ; ini kuḅie se ị́ ḅụgbanamẹ, ị́ pịkị ini ḍụamẹ.

⁵Ini ị́ chịnmẹ se ini ḅụfụkaḅie pọkọ somẹ; ini kuḅie se ị́ ḅụgbanamẹ ị́ pịkị ini gbakịkẹ.

⁶Ọkụma ị̀rị̀ ḅarị tomoniḅọkẹ; ị̀rị̀ ngule-ẹ, tomoniḅọ goyegoye ḍikisima pịkị ḍiki-alịmasaye!

⁷Ị̀ ọrịapụ mamgba ị̀ se kpọtimẹ; ini inia ḅịpịḅieḅẹlẹ ma sụma ị̀ da se inia tịḅị ma jikemẹ.

⁸“Ị́ ḅụ se Nyanaḅọ Ḅe ḅụsẹrẹrẹmẹ,” ini nwọ ḅẹmẹ. “Cheye gose ori ị́ ḍụaka? Ị́ya mịẹmịẹaye Nyanaḅọ Ḅe ḅụḅẹlẹ ọkụma, cheye gose ọ̀ ḅarachụa ị́ pịrịka?”

⁹Ị́rị́ ḅụlọḅie ḍumoḅụ, yi ḅaraḅụ ị̀ ọkị pakụmaḅomẹ, se à kalatọkụ ḅụ sime sịkị ị́rị́ ị̀ ḍikiḍikipakụmamẹ.

¹⁰Àrị ị́ ḅụsẹrẹrẹmẹ ini ị̀ yi ene ngịsị, ị́ pịkị sịkịmamgba ị̀ Tamụnọ sọmẹ.

¹¹Ị̀ ḅụ sikimama! Ḅụfụka kpekisam, ḅarachụa ḅịaḅọ ofori-ẹ.

¹²Ị́rị́na-taraka ḅakapụ owoi-a nambulo ḅara nwọ se ị̀ kelema waraḅẹ; inimgba ini ị̀ kelemamẹ, Bashan ḅie ḅalafama owoi-a nambulo ḅara.

¹³Chịrịḅa ḅịpị finji ọkụ ini inia ḅịpị ma finji se ekereaḅẹ ị̀ kanịpẹịḅịa ẹrẹchị.

¹⁴Ị̀ ḅụ ịnyọ fasam, ọsụn kirisara mengi fa ọkụ anị fasam. Ị̀ ḅụ ḅie imgbe mamgba pọkọsam; ị̀ kuḅie kpoye sanị ọkụ sanịmẹ.

¹⁵Ị̀ pụkọ ḅie fọn samịna ọkụ samịnamẹ, ị̀ ḅịpị ḅie ḅẹlẹ mị ị̀ ḅịpị oḅolomẹ. Fịḅụ ị́ ị̀ se fọn ma ọgọnọ koromasam.

¹⁶Siaye mịẹapụ ogbo ị̀ gborimẹ; obiri ogbo ḅara àrị ị̀ kpekimamẹ; se ị̀ ḅarama na ị̀ ḅụọma na kanịmẹ.

¹⁷Ị̀ya imgbe mamgba ineda ọrịḅịa. Ị̀rị̀na-tarakapụma tọrụgegema ị̀ ḍikimẹ.

¹⁸Ini ị̀ya ḅụchụayema se igbiki mịẹ ti kọnmẹ, se àrị ḍiama iniaḅụ pịrịmẹ.

¹⁹Yei Nyanaḅọ, ị̀ ḅụ sasama! Sarama ḅo ị̀ ḍụa!

²⁰Okola-agiji mị ḅaraḅie ị̀ ḍụa; ị̀ ḍumo ḍụa ma obirima ḅaraḅie.

²¹Ị̀ ḍụa ma chịrịḅama ḅaraḅie; à mịẹḅịa ọkụ ofori-ẹ ma owoi-a nambuloma ḅaraḅie.

²²Àrị ị́ mịẹsaye ma ḍuko ị̀ya tomonima pịrịḅịa; inia koḅiria ḅie àrị ị́ tokoniḅịa:

²³“Ómine ò tokoni, ómine Nyanaḅọ Ḅe fịrịnwẹngịapụma! Ómine ori osi, ómine Jekọb furoḅie apụma! Ómine ọ̀ tẹkẹ, ómine Izrẹlapụma!

²⁴Ori igwein apụma sịkịkẹ, ọ̀ pịkị inia tọrụsiọrị ma ḅụ ọ̀ tọrụsinkẹ; ori ọ̀ ḅụ pịkị ini gbinkẹ, ọkụma ori inia ḅịpị pẹkẹrẹmẹ ini ḅarachụa gose ọ̀ chịn owu sịkị.”

²⁵Opu koḅiria mị ḅie àrị ị́ tokoniḅịa ị́ mịẹsa yema ḅụ; ị́ tẹkẹarịapụ ma tọrụkuḅu à ḅereni agbama à nwọ mịẹḅịa.

²⁶Igwein apụma ini ḅiḅara ini nwọse yefịḅịa; Nyanaḅọ Ḅe damaḅo apụma ini ò tokoniḅịa. Ye ye-ini-na lọkọlọkọ gbaso!

²⁷Sẹ mamgba Nyanaḅọ Ḅe se ḅiekoromaḅịa. Tomonikiri mị ḅie pẹkẹrẹ pẹkẹrẹ mamgba ini tọrụ pịkị ọ̀ daḅịa; tomoni kịrịkịrị mamgba ọ̀ tẹkẹḅịa.

²⁸Nyanaḅọ Ḅe ori amanyanaḅọ-ẹ, ọ̀ pịkị ḅẹrẹtọn sẹma pịrịmẹ.

²⁹Opuaye mịẹ apụ mamgba ini tịḅịtu ọ̀ pịrịḅịa; tomoniḅọ goyegoye mamgba ọ̀ tọrọkọ tịḅịtuḅịa.

³⁰Tọrọkọju ḅoḅịa ḅụọma ini fịrịnwẹngị ọ̀ pịrịḅịa, tomoni Nyanaḅọ Ḅe ḅụ ḅẹrẹ ḍuko ḅoḅịa ḅụọma pịrịḅịa.

³¹Ma ini yika apụma ini ḍuko ini pịrịḅịa: “Nyanaḅọ Ḅe ori oria tomonima ḍụaḍụamẹ.”