Read kirikeni Fịafịa Nime 25 Bible Online

Fịafịa Nime 25 - kirikeni bible

Fịafịa Nime 25

¹Yei Nyanaḅọ, ị́rị́ anị àrị ị̀ya tẹkẹma kọn pịrịarịye-ẹ;

²ị́rị́, ị̀ Tamụnọ Ḅe ḅụ mị à kuḅie se gbanaye-ẹ. Ọmụḅarasi ḅe ḅụgerere mị ḅụ ị̀ ḍụa; ḅerenima ị̀rị̀na-tarakapụ ma kpụwaị se ị̀ ḅẹ!

³Kuḅie se ị́ ḅụgbanapụ ma ini ini nẹngịma-nẹngịmakẹ, ọkụma anị sime kọngọ kụrọma se ị́rị́na-tụḅụrụ apụma pịrịmẹ.

⁴Ị́ya ateli ma se ị̀ ḍie, Yei Nyanaḅọ; mịẹ àrị àrị nemi.

⁵Àrị ị́ya karakara mị simeḅara se ị̀ ḍumo mị kọnḅịa ọkụ nwọse ị̀ telima, anịatịḅị ị́rị́ anị ị̀ Tamụnọ, ị̀ ḍụaḅọ ḅe-ẹ. Sịkịmamgba à kuḅie se ị́ ḅụgbanamẹ.

⁶Ḅiekoroma, Yei Nyanaḅọ, ị́ya iḅimịẹ na kunoka ḅẹlẹma mị na, anị ḅọlọ sịkị ngịsị ị́ ḍiepakụmasaye ma.

⁷Ị̀ya asẹmẹnị sịkịḅụ à mịẹasi ma na, mịẹirima ma na ḅụ ḅarasin ị̀ pịrị. Ị́ya kunoka ḅẹlẹma mị na iḅimịẹ mị na gose, ị̀ se ḅiekoroma, Nyanaḅọ!

⁸Anịatịḅị Nyanaḅọ Ḅe karakaraye mịẹmịẹḅọ-ẹ, siye mịẹapụ ma ini ḍukonwẹngị gbẹịn ateli ọ̀ nwọse ini ḍieḍiemẹ.

⁹Ḅụ-iderimapụ ma ori ini pamun karakara ateli ḅie chu se pịkị ọ̀ tọn ayema se ini ḍiemẹ.

¹⁰Ḅereniḅụ na ḅẹlẹma na ḅụ ori ateli ịsụn oria ọḅọkụ mị na oria olokoma na koko apụ mamgba pịrịmẹ.

¹¹Ị́ ḅereniye mịẹ, Nyanaḅọ, se ị̀ya sima ḅụ ḅarasin ị̀ pịrị, anịatịḅị àrị opuma ḅakamẹ.

¹²Nyanaḅọ Ḅe ḅịpị poki apụma ini nwẹngịḅịa ateli ọ̀ ḅụ nwọ ḍawọḅịa.

¹³Sịkịmamgba ye inina-ḅịrịḅịa, inia awọma pịkị ama mị nyana ọkịḅịa.

¹⁴Nyanaḅọ Ḅe, ọ̀ ḅịpị poki apụma anị oria ikiapụ ma-ẹ, ọ̀ pịkị ini na oria ọḅọkụ mị mịẹ kụrọmamẹ.

¹⁵Sịkịmamgba ḅarachụa gose à tọrụ se Nyanaḅọ Ḅe ḍikimẹ, ọ̀ pịkị ḅalafamaye ḅie ị̀ ḍụaḍụamẹ.

¹⁶Pịkị ị̀ da, Nyanaḅọ, se ị̀ ḍikiḅụgerere, anịatịḅị ị̀rị̀ ngẹrị ḅụ lọkọ na gbọngọlọma omi-ẹ.

¹⁷Ị̀ya ḅụfụka ma ḅie ị̀ sin se ị̀ya tọrụsiọrị ma ḅie mgba ị̀ ḍụa.

¹⁸Ị̀ya ngịrị mị na tọrụsiọrị mị na se ḅiekoroma, pịkị ị̀ya si mamgba ḅụ ḅarasin ị̀ pịrị.

¹⁹Ḍiki ị̀rị̀na-tarakapụ ma ḅakala-ọkụ mị; ini ị̀ ḍikiḅụnwọnwọ la-ọkụ ḍiki.

²⁰Ị̀ ḅọị pịkị ị̀ ḍụa; ḅerenima se ini ị̀ nẹngịma. Àrị ị́ damaḅomẹ ye ị̀ la-ẹkaye gose.

²¹Ye ị̀ya iḅimịẹ mị na ị̀ya karakaraye mị na ị̀ koko, anịatịḅị àrị ị́ ḅụ ḅereni nyanamẹ.

²²Inia ḅụfụka ma ḅie mgba, Yei Tamụnọ, ị́ya tomoni Izrẹlapụma ḍụa.