Read kirikeni Fịafịa Nime 28 Bible Online

Fịafịa Nime 28 - kirikeni bible

Fịafịa Nime 28

¹Yei Nyanaḅọ, ị̀ ḍụaḅọ, àrị ị́ chịnmẹ. Ị̀ya owu pụkọ mị poki! Ị́ ị̀ pẹkẹrẹka ọkụma, koro fịapụ sẹkiri mị ḅie mun apụma ḅie gbọrịḅọ à nwọ sọḅịa.

²Ị̀ naa à ḅarachụa ḅi owu ḅụ ị́ chịn sịkị, àrị ị̀ ḅarama dekichịẹma ị́ya fịafịa Oputẹkẹwarị mị da sịkị.

³Ị̀ se sitịḅịnyanapụma na gboloma ḅẹrẹsikọn ị̀ pịrịma, anị siye mịẹapụ ma— anị ọkwẹịn-ḅẹlẹḅụ ikiapụ ḅara se ọkwẹịn kọnkọn apụma, ọkụma taraka-taraka inia kuḅie ḅein waraḅẹ.

⁴Fomuḅara se ini pịrị ini mịẹsa ayema ḅụ, ini mịẹsa siaye ma ḅụ. Fomuḅara se ini pịrị ini mịẹsa ayema ḅụ; ini la gbẹịn ḅara se ini pịrị!

⁵Ini elekima chụakẹ Nyanaḅọ Ḅe mịẹsaye ma ḅụ, anịkanịka ọ̀ tẹmẹsaye ma ḅụ; anịẹrẹchị ò fomuḅara se ini pịrịḅịa se gbọtụma ini ḅaasin gbasoḅịa.

⁶Ọ́ Nyanaḅọ Ḅe tokoni; ị̀ya ḅarachụa ḅi owu mị ọ̀ naasam.

⁷Nyanaḅọ Ḅe ị̀ ḅọị se ị̀ ḍụamẹ; à kuḅie se ọ̀ ḅụgbanamẹ. Ọ̀ ḅarachụa ị̀ pịrị se ị̀ mịẹ se à ḅieḅẹlẹmẹ; ḅieḅẹlẹma nime à nwọ chu ò tokonimẹ.

⁸Nyanaḅọ Ḅe ori oria tomonima ḅọịmẹ; ori ọ̀ sẹlẹ ọkịsa amanyanaḅọ ḅe ḍụaḅọrọmamẹ.

⁹Ị́ya tomonima ḍụa Nyanaḅọ, se sime ị́ pịrị apụma ḅẹlẹma. Anana ḍikiḍiki ḅara nwọse ini ḍikiḍiki, se tọrụ se inia ḅụ wẹrị gbaso.