Read kirikeni Fịafịa Nime 31 Bible Online

Fịafịa Nime 31 - kirikeni bible

Fịafịa Nime 31

¹Ịnyasọ gose àrị ị́ damaḅomẹ, Nyanaḅọ; ngịsị ḅerenima ini ị̀ nẹngịma. Ị́rị́ anị karakara Tamụnọ-ẹ; à tẹkẹmẹ ị̀ ḍụa!

²Ị̀ naa! Se mịọkụ ị̀ ḍụa! Ị̀ya ḅụ ḅọị nyọ sọ se ị̀ gbẹịn; ḅụ ḍụa nyọ sọ se ị̀ ḍụa.

³Ị́rị́ ị̀ya ịnyasọ nyọ na ḅụ ḅọị nyọ na-ẹ; ị̀ datekerema se ị̀ pamun ị́ ḅerenisa ḅaraḅụ.

⁴Ini tu ị̀ pịrị ḍẹịn mị ḅieḅụ ị̀ ḍụa; ḅalafamaye ḅụ ị̀ kikima.

⁵Ị̀ ḅụ à se ị́ ḅarachụa mẹ. Ị́ ị̀ ḍụaḅịa, Nyanaḅọ; ị́rị́ anị kuḅie se ḅụgbana gbẹịn Tamụnọ-ẹ.

⁶Ị́ taraka se iruo-a oru ma tẹkẹ apụma wẹrịmamẹ, ọkụma ị̀rị̀ à kuḅie se ị́ ḅụgbanamẹ.

⁷À ḅieḅẹlẹ pịkị ḍorokuḅịa ị́ya kunoka ḅẹlẹma mị gose. Ị̀ya tọrụsiọrị mị ị́ ọrịmẹ; ị̀ya ḅụfụka ị́ nemimẹ.

⁸Ị́ ḅereni ị̀rị̀na-tarakapụ ma pịrịkẹ ini kụrọḅaraḅụ ị̀ kun so; ị́ ḅereni ị̀ pịrịmẹ na àrị ị̀ ḅụḅẹlẹ nyọ nwọ mun.

⁹Ḍikitịḅịfoin nyana ị̀ pịrị, Nyanaḅọ, anịatịḅị à ḅụfụka ḅie omi-ẹ; ị̀ tọrụmgbọlụma ḅụ ịnyọ fasam opuma owu saraḅụ; à gbọtụma kpọtụna sarasam.

¹⁰Ị̀ ḅụ ịnyọ fasosam kururuḅụ, owu pịkị ị̀ ḍumo kpụlụmasam. Ị̀ ḅụ lọkọsam àrị ọrịarị tọrụsiọrị ma ḅụ; ị̀ ḅụ ịmgbema sọnị lọkọaḅẹ.

¹¹Ị̀rị̀na-tarakapụ mamgba anịtẹịn anga, ị̀rị̀na-kpekima angapụma sọ, ị̀ ḍikisimamẹ. Ị̀ nemi apụma ini ị̀ ḍikiḅalafamẹ; ini ateliogbo ị̀ ọrị sịkị ini mangị somẹ.

¹²Ọrụḅọḅọ ị̀ se ḅieḅaramasam, à fịsam nwọḅẹ ḅara; ini se gbin wokumaye simeọkụ à nwọ simemẹ.

¹³À naamẹ ị̀rị̀na-tarakapụ ma ḅụ tọn apụ miniminima ọkwẹịn aḅẹ; ḅalafamaye ị̀ gbori kelemamẹ. Ini ḅẹrẹḅia ị̀ pịrịaḅẹ, ini ị̀ ḅaaḅịa ẹrẹchị tọn aḅẹ.

¹⁴Ọkụma àrị ị́ ḅụ nyana ḅereni mị, Yei Nyanaḅọ; ị́rị́ ị̀ Tamụnọ-ẹ.

¹⁵Sịkịmamgba àrị ị́ ḅaraḅie omi-ẹ; ị̀rị̀na-tarakapụ ma ḅaraḅie ị̀ ḍụa, anị ḅụọ se ị̀ chụarịapụ ma ḅaraḅie.

¹⁶Iḅi anga ḅara nwọse ị́ya fịrịnwẹngịḅọ ḅe na anga; ị́ya kunoka ḅẹlẹma mị ḅụ ị̀ ḍụa.

¹⁷Àrị ị́ chịnmẹ, Nyanaḅọ; ḅerenima à ḅụgerere ḅụ sọ. Mịẹ sitịḅịnyanapụma ḅụ re gerere; mịẹ ini yawụma fịapụ tomonikiri mị ḅie koromun.

¹⁸Iruo kọn apụma mịẹ ini yawụ— opuaye mịẹapụ ma na ḅụ-se-ye-chịn apụma na, anị karakaraye mịẹapụ ma ọkwẹịn simarịapụ ma.

¹⁹Ị́ se osi se ị́ pịrị apụma wẹrịma iḅiaye ma ḅalafama ọkụ ḍiki! Ọrụḅọḅọ nemimẹ ị́ iḅi laḅara, kuḅie se ị́ ḅụgbana apụma yetoluḅo ye se ini lama ẹka ẹrẹchị ị́ ini koko laḅara.

²⁰Ị́ tọrụkuḅu ye ini la-ẹka nyọ ḅụ ị́ ini ḅọịmẹ, ḅẹrẹḅiapụ ḅaraḅie; ye ini la-ẹka ḅụkikima nyọ ḅụ ị́ ini ḅọịmẹ; inina-tarakapụma se ini wọlọarịaye ma ḅụ.

²¹Ọ́ Nyanaḅọ Ḅe boma! Ọ̀ ḅụgbiripuma ḅaraḅụ oria ḅẹlẹma mị se ị̀ ḍie ọkụ ḍiki, ini ị̀ gbori kelema se owuse ị̀ dapaka sịkị!

²²Ḅalafaḅụ à nwọ chịnmẹ ọ̀ tọrụkuḅu ori ị̀ depakụmasam. Ọkụma à kọn owu mị ọ̀ naamẹ, à ḅarachụa gose ọ̀ chịn sịkị.

²³Ọ́ Nyanaḅọ Ḅe ḅẹlẹma, ómine ò ḅereniapụ mamgba. Nyanaḅọ Ḅe ḅereniapụ mamgba ori ini kokokokomẹ, ọkụma opuaye mịẹapụ ma ini la gbẹịn fomuḅara ọ̀ nwọse ini pịrịpịrịmẹ.

²⁴Ọ́ kụrọmachịẹ, ọ́ kụrọkuḅie nyana, ómine kuḅie se Nyanaḅọ Ḅe ḅụgbanapụ mamgba.