Read kirikeni Fịafịa Nime 33 Bible Online

Fịafịa Nime 33 - kirikeni bible

Fịafịa Nime 33

¹Ómine karakaraye mịẹapụ mamgba, ó ḅieḅẹlẹ oloku kọn Nyanaḅọ Ḅe mịẹsaye mị gose; ómine ò boma ọ̀ ḅịpị pokiarịapụ mamgba.

²Ọbọ ọ́ nwọ farị mịẹḅaka se Nyanaḅọ Ḅe ḅẹ, ịnjalị ḍiki nyanaye farịaye se nime chu ọ̀ pịrị.

³Ịwọ nime chu ọ̀ pịrị, yefarị ḍinḅọ ḅara nwọse ọbọ mị farị, pịkị ḅieḅẹlẹ ḅụ oloku!

⁴Nyanaḅọ Ḅe oria ọkwẹịn ma karakaraye-ẹ, pịkị oria fịrị mamgba ḅụ se sẹrẹrẹ gbẹịn aye-ẹ.

⁵Nyanaḅọ Ḅe ọ̀ karakaraye na karakara mịẹaye na ḅẹlẹmamẹ; oria kunoka ḅẹlẹma mị sẹkiri ḅie ḅeinmẹ.

⁶Nyanaḅọ Ḅe ọ̀ tọn ḅara ḅụ ò so mị tẹmẹmẹ, oria ọkwẹịn ḅụ anị ịrụa na akalụ na lolia ma na ọ̀ nwọ tẹmẹye-ẹ.

⁷Ọ̀ tọrụ mamgba kpokponima gbọrị anga koromamẹ; abaji mị ḅie gbun nyọma ọ̀ nwọse ngọ koko warịma ḅie ịkasị koromamẹ.

⁸Ọ́ Nyanaḅọ Ḅe tẹkẹ, sẹkiri mị mgba! Ómine ori osi, tomonikiri ḅie sime apụ mamgba!

⁹Ori ọkwẹịn sịkị, anị tomonikiri mị tẹmẹye-ẹ; ori ọkwẹịn se tọn ḅaraḅụ anị yegoyegoye pakaḅoye-ẹ.

¹⁰Sẹ sẹma ḅietọn ayema, Nyanaḅọ Ḅe ò kikichịẹmamẹ; ọ̀ mịẹmẹ inia ḅietọn se ini mịẹḅịaye ma ḅarị mịẹkẹ.

¹¹Ọkụma ọ̀ tọn ayema sime gbasomẹ; ò ḅietọn se ọ̀ mịẹḅịaye ma sime ḅene-ḅene lamẹ.

¹²Ḅieḅẹlẹ sime Nyanaḅọ Ḅe Tamụnọ sọ pịrị sẹ mị pịrịmẹ; ḅieḅẹlẹ sime ọ̀ sẹlẹ ọ̀ ḅụ pịrịapụ ma pịrịmẹ!

¹³Nyanaḅọ Ḅe soḅie ḅụ ọ̀ tu sẹkiri ḍiki se tomoni goyegoye ọrịmẹ.

¹⁴Ò sime ḅẹrẹtọn àrị nyọ ḅụ, ò tu sẹkiri ḅie angapụ mamgba ọrịmẹ.

¹⁵Inia koroma mamgba ọ̀ ḅara ḅomẹ, ini mịẹarịye goyegoye ọ̀ pịkị nemimẹ.

¹⁶Amanyanaḅọ ḅe ọ̀ nyana owuni kụrọ gose ọmụ ọ̀ ḅara iḅikẹ; owuniḅọ ḅe ọ̀ nyana ịnyọ gose ọmụ ọ̀ ḅara iḅikẹ.

¹⁷Owu sọ asụnma gbọrịye ḅụ sọ àrị ofori-ẹ; ọmụ inumaḅụ àrị nyana opu ịnyọ mị ineda àrị ḍụaẹkẹ.

¹⁸Nyanaḅọ Ḅe ọ̀ ḅịpị pokiapụ ma ọ̀ tọrụ iniaḅụ omi-ẹ, anị kuḅie se oria kunoka ḅẹlẹma mị ḅụ gbanapụ ma.

¹⁹Fị ḅie ori ini ḍụamẹ; ḅuruḅaa ḅie ọ̀ mịẹse ini ḍumomẹ.

²⁰Wa mịna kuḅie ma se Nyanaḅọ Ḅe ḅụgbanamẹ; ori mịna ḅọịnyọ pịkị mịna ḅarachụaḅọ na-ẹ.

²¹Wa ò gose ḅieḅẹlẹmẹ; wa kuḅie se oria fịafịa ẹrẹ mị ḅụgbanamẹ.

²²Ye ị́ya kunoka ḅẹlẹma mị mine na sime, Nyanaḅọ, wa nwọ kuḅie se ị́ ḅụgbanarị sịkịḅụ.