Read kirikeni Fịafịa Nime 35 Bible Online

Fịafịa Nime 35 - kirikeni bible

Fịafịa Nime 35

¹Ị̀rị̀na-tụḅụrụ apụma na tụḅụrụ, Nyanaḅọ, pịkị owu se ị̀ dapakarịapụ ma na owu sọ!

²Ị́ya agbọ mị na owuni ḅụchụaye mị na deki se ḅo ị̀ ḍụa.

³Ị́ya sụḅa mị na owuni apala mị na deki se ị̀ ḍukoarịapụ ma na sọ. Se ḅereni na ị́ ị̀ ḍụaḅịa.

⁴Mịẹ ị̀ ḅaa ḍọkịarịapụ ma ọmụ inia ḅara si se ḅụgerere inia tọrụ sọ! Mịẹ ḅẹrẹḅia ị̀ pịrịarịapụ ma ḅịpị ogbosọkaḅụ pịkịma so!

⁵Ye ini fọrụ vugumasin osirosiroḅa simeọkụ sime; Nyanaḅọ Ḅe enjẹlḅọ ḅe ini ḍukoarị sịkịḅụ!

⁶Ye inia ateli kanakana pịkị sịnịnị-sịnịnị, Nyanaḅọ Ḅe enjẹlḅọ ḅe ini fomugbin àrị sịkịḅụ!

⁷Gbọrị ḅẹrẹsọ oforikaḅụ ini ḍẹịn tu ị̀ pịrịmẹ, pịkị ị̀ kunḅịa gose gbun olulu sokumẹ.

⁸Ọkụma, ma ini nemika simeogbo fị ini ḅaaḅịa; ini tu ḍẹịn ma ini kunḅịa se ini ḅịkị koromun fị ḅie sọḅịa!

⁹Anịsịkị à Nyanaḅọ Ḅe ḅụ ḅieḅẹlẹḅịa; ị̀ ḅieḅẹlẹḅịa anịatịḅị ori ị̀ ḍụamẹ.

¹⁰Ị̀ kuḅiemgbọlụ mgba à nwọse Nyanaḅọ Ḅe ḅẹḅịa, “Ị́ simeọkụ sime jụmḅọ ofori-ẹ. Ị́ ịnyọ nyanakapụma ḅọịmẹ kụrọapụ ma ḅaraḅie, ị́ pịkị igwein apụma ḅọịmẹ ini pụndarịapụ ma ḅaraḅie.”

¹¹Siyemịẹapụ onyechịẹ ị̀ pụnụmamẹ ngịsị à nemikaye ḅụ ini ḅẹrẹḍuko ị̀ pụnụmamẹ.

¹²Ini siye se ị̀ gbẹịnmẹ à mịẹ iḅiye ḅụ, se kuḅie siḅụ ị̀ tẹmẹ gbọtụma fịmẹ.

¹³Ọkụma ini obi sịkị, à ḍụẹịn ḍin aye ḅirimẹ; à ḅuru se ị̀ ḅụḅamamẹ; àrị ị̀ tịḅịtu se tẹkẹmẹ,

¹⁴anị à tẹkẹ ikiaḅọ anịkanịka mịnaḅọ pịrịḅịa ḅara-ẹ. À tu se ḍụẹịn ḍin nwẹngịma ḅọrọmẹ, anị ḍụẹịn ḍin mịna nyengiḅọ pịrị ọkụ simemẹ.

¹⁵Ọkụma à ḅụfụka ḅie sọ sịkị, inimgba inia ḅieḅẹlẹmẹ ini ị̀ gbori kelema se ị̀ kombomẹ; igoniapụ ị̀ fomu se pịkị ị̀ ḅakụma ḅọrọmẹ.

¹⁶Tomoni ikeliḅọ kombo ọkụ, ini tarakaḅọ ḅara nwọse sinungu se ị̀ ḍikimẹ.

¹⁷Nyanaḅọ, ị́ papa ị̀ ḍiki nweni mun nde sịkị la ḅe? Ị̀ ḍụa ini se ị̀ dapakarịye ma ḅụ; ma chịrịḅama ḅaraḅie ị̀ ḍụa!

¹⁸Anịsịkị ị́ya tomonima koḅiria nyọ ḅụ à mịẹḅaka se ị́ ḅẹḅịa; inimgba tọrọkọ àrị ị́ bomaḅịa.

¹⁹Ḅerenima ị̀rị̀na-tarakapụ ma, iruo kọn apụma, ị̀ya ḅịkị ḅụ ị̀ pụa. Ḅerenima gbọrị ḅẹrẹsọ oforika ḅụ nwọ taraka se ị̀ wẹrịmapụma, ị̀ya ngịrịḅụ kpụwaị se ị̀ ḅẹ.

²⁰Ini ikiapụ ḅara se ọkwẹịn-ọkwẹịnkẹ; anịnakaraka ini iruo kọn dein ḍọkị apụma ọgọnọ gbana gbanamẹ.

²¹Ini ḅẹrẹḍuko ị̀ya ọgọnọ gbanamẹ, se oloku se ḅẹaḅẹ, “Ị́ mịẹye wa ọrịmẹ!”

²²Ọkụma ị̀rị̀, Yei Nyanaḅọ, mịn mị ị́ ọrịsam. Anịẹrẹchị gboinpokima, Nyanaḅọ; pịkị sasama simema!

²³Ị́ ḅụ garagarama, Yei Nyanaḅọ, se owusọ ị̀ pịrị; sịsẹ chịẹ, ị̀ Tamụnọ, se ị̀ya ḅẹrẹ mị deki nwẹngị.

²⁴Ị́rị́ karakaraye mịẹmịẹḅọ-ẹ, Yei Nyanaḅọ, ị̀ya ḅẹrẹtịḅị nemika mị ḍukopakụma; ḅerenima ị̀rị̀na-tarakapụ ma ị̀ pụa.

²⁵Ḅerenima ini ḅịpị se iniaḅụ fiema se nwọḅẹ na, “Oria ḅẹrẹ ḅọrọsam! Anị wa ḅi ḅaramị-ẹ!”

²⁶Ye ị̀ya tọrụsiọrịḅụ kpụwaị se ị̀ ḅẹ arịapụ ma gbọtụma ọmụḅara si nyana, se ḅịpị ogbo sọka inia ogboku paka; ye ini iḅitẹịn ị̀ nẹngịmẹ ḅẹapụ ma ḅụgerere na yeḅụsọka na gbitipuma ini gbẹịn.

²⁷Ye ị̀ya ḅẹrẹ-ḅara-iḅi mị ọrị ḍọkịarịapụ ma ḅieḅẹlẹḅụ imbikia imbikia ḅụ oloku se nwọḅẹ na, “Nyanaḅọ Ḅe ḍụḅa la-ọkụ ḍiki! Ye oria fịrịnwẹngịḅọ ḅe na ḅịrị mị ò ḅieḅẹlẹmamẹ.”

²⁸Anịsịkị àrị ị́ya karakaraye mị ḍukopakụmaḅịa, se à pịkị ene mamgba ḅụ ị́ bomaḅịa.