Read kirikeni Fịafịa Nime 36 Bible Online

Fịafịa Nime 36 - kirikeni bible

Fịafịa Nime 36

¹Sitịḅịnyanaḅọ ḅe, si mị ò kuḅieḅụ gbunma ọkwẹịn ọ̀ pịrịmẹ; ọ̀ Tamụnọ Ḅe sịkị se kụn nyana ọ̀ pịrịkẹ.

²Anịatịḅị ori opuma ọ̀ ḅụ se yechịnmẹ, ọ̀ nwọ chịnmẹ na Tamụnọ Ḅe ori ineda oria si mị ḍọkịḅọ se ḅẹrẹḅarasi kọn anị pịrị ẹkẹ.

³Oria ọkwẹịn ma sitịḅị na iruo na ḅụ ḅein aye-ẹ; ọ̀ ḅarị pịkị ngịsị yenemi aye na iḅi aye na mịẹkẹ.

⁴Ọ̀ mọnọye ọgọnọ ḅọlọlọ sịkị anị ò siaye tọn àrị sịkị-ẹ; ori iḅiye mịẹarị sịkị ofori-ẹ, ọ̀ pịkị siye sịkị àrị sịkị ofori-ẹ.

⁵Nyanaḅọ, ị́ya kunoka ḅẹlẹma mị iwo mun so ma lamẹ; ị́ya kuḅie-se-ḅụgbana na iḅi mị finjima mun soḅuno ma lamẹ.

⁶Ị́ya karakaraye mịẹ mị tụndụ gele ọkụ gelemẹ; ị́ya karakara ḅẹrẹkọn ḅịpị mị tọrụ ḅie ḍian ma simeọkụ simemẹ. Tomonima na nama na, ị́ ḅaraḅie àrị omi-ẹ.

⁷Yei Tamụnọ, ị́ya kunoka ḅẹlẹma mị, opuma yelamẹ! Ị́ pamba ma ḅe tẹmẹ mị chukuḅie wa ḅọịnyọ ḍọkịḅomẹ.

⁸Ị́ pakụmaḅo ḅaka fịayema wa fị ḅụlọ ḅeinmamẹ; ị́ ḅerenimẹ wa ị́ya iḅimịẹ mị ḅe ideri mengi ḅumẹ.

⁹Ị́rị́ anị ḍumo aye mamgba ḅe chuku-ẹ, pịkị ị́ya enekuḅu mị gose wa enekuḅu ọrịmẹ.

¹⁰Ị́ nemiapụ ma ini ḅẹlẹma ma mun, pịkị iḅi se karakaraye mịẹapụ ma mịẹ.

¹¹Ḅereni opuaye mịẹapụ ma pịrịma ini ị̀ dapaka anịkanịka sitịḅịnyanapụ ị̀ mịẹse à mangịso.

¹²Siaye mịẹapụ ma ḅịkị nyọ ḍiki. Anị nyọ ḅụ ini ḅọlọlọ se ḅarị ineda sịsẹkẹ.