Read kirikeni Fịafịa Nime 37 Bible Online

Fịafịa Nime 37 - kirikeni bible

Fịafịa Nime 37

¹Siapụ ma gose ḅụḅalaḅala nyanama; iriaye mịẹapụ ma ini sọlịma.

²Ḅọlọ ẹkẹ samịna osuein mụmamụma fa ọkụ ini faḅịa; ịnyanya nyọnị se fịọkụ ini fịḅịa.

³Kuḅie se Nyanaḅọ Ḅe ḅụgbana se iḅiye mịẹ; ama mị ḅie anga se ḍumo.

⁴Nyanaḅọ Ḅe ḅụ ị́ya ḅieḅẹlẹ mị ḍọkị, se ọ̀ pịkị ị́ kuḅie tọnye mị se ị́ pịrịḅịa.

⁵Ị́ ḅụ se Nyanaḅọ Ḅe pịrị; kuḅie se ọ̀ ḅụgbana, ọ̀ pịkị ḅarachụa ị́ pịrịḅịa;

⁶ori ị́ya karakaraye mịẹ mị mịẹḅịa anị eneogboin ịrụa ḅịaọkụ ḅịaḅịa.

⁷Inema se Nyanaḅọ Ḅe koru se ye ọ̀ mịẹḅịaye mị ọ̀ nwọ mịẹ; ye ḅịrị pịrị àrị apụma gose ị́ ḅụḅalaḅalamama pịkị si ḅọkọḅụ ye dein pịrịarịapụ ma sọnị.

⁸Ḅereni ḅụḅalaḅala anịkanịka ịganị pịrịma; ḅụfụka ḅie kẹngẹ mị àrị ị́ telima mun chuḅịaye-ẹ.

⁹Kuḅie se Nyanaḅọ Ḅe ḅụgbanapụ ma ini ama mị nyanaḅịa, ọkụma sitịḅịnyanapụma ini ini depakụmaḅịa.

¹⁰Ḅọlọ-ẹkẹ sitịḅịnyanapụma ini faḅịa; ị́ ineda ini ḍọkịḅịa, ọkụma ị́ ini ḍọkịḅo ẹkẹ;

¹¹ọkụma ḅụ-iderimapụ ma ini ama mị nyanaḅịa, se ye lọkọlọkọ na dein na ḅe tọrụḅẹlẹ ini nwọ nyanaḅịa.

¹²Sitịḅịnyanaḅọ ḅe ḅẹrẹḅia karakaraye mịẹḅọ ḅe pịrịmẹ, se tarakaḅụ nungu se ò ḍikimẹ.

¹³Ọkụma Nyanaḅọ Ḅe ò sitịḅịnyanapụma ḍẹrịaḅẹ, anịatịḅị ò nemimẹ na ḅọlọka sịkịḅụ ini fịḅịa.

¹⁴Sitịḅịnyanapụma inia okola-agiji ma nụnụ pakụmaḅomẹ, se inia lubu ma andamẹ, àrị se igwein apụma na ye ḅụḅalaḅalamapụ na ḅaaḅịa ye gose, pịkị karakaraye mịẹapụ ma na ḅaaḅịa ye gose;

¹⁵ọkụma inia okola-agiji ma anị ḅarana ini ḅaaḅịaye-ẹ, se inia lubu ma ini àrị anyịmaḅịa.

¹⁶Karakaraye mịẹḅọ ḅe nyana kalaye mị, anị yelatẹịn siapụ mamgba nyana ngọ mamgba nẹngịmẹ,

¹⁷anịatịḅị siapụma nyana ịnyọ mị Nyanaḅọ Ḅe ori ọkịḅịa, ọkụma ọ̀ karakaraye mịẹapụ ma ḅọịḅịa.

¹⁸Nyanaḅọ Ḅe ọ̀ ḅịpịpokiapụ ma ori ini ḍikiḍikimẹ, ama mị pịkị iniaye sọ gbasoḅịa.

¹⁹Si sịkịḅụ inia tọrụsiọrị ẹkẹ; ḅuru ama ḅaa sịkịḅụ ini ḅakama fịfịaye nyanaḅịa.

²⁰Ọkụma sitịḅịnyanapụma ini fịḅịa;; Nyanaḅọ Ḅe na tarakapụma piri ḅie ngwengwe ịmaịnfa ọkụ ini ịmaịnfaḅịa; onwoin mụmamụma faọkụ ini faḅịa.

²¹Sitịḅịnyanaḅọ ḅe ò ye ḅọlọḅịa, ọkụma ori ine gbẹịn ẹkẹ, ọkụma karakaraye mịẹḅọ ḅe ọ̀ nyanaye ọ̀ nwọse iḅi mịẹḅịa.

²²Nyanaḅọ Ḅe ḅẹlẹmasapụ ma, ama mị nyanaḅịa, ọkụma ò worinime se pịrịsapụ ma, ini ini depakụmaḅịa.

²³Nyanaḅọ Ḅe ò tomoniḅọ ḅe datekeremaḅịa ọ̀ nwẹngịgbẹịn ateli ḅụ, se ò ḅi ḅara mịẹapụ ma ori ini ḅọịḅịa.

²⁴Ini ḅịkịmẹ ḅẹḅẹ, ini gbọtụma ḅịkị fa ẹkẹ, anịatịḅị Nyanaḅọ Ḅe ọ̀ ḅarachụa ini dekichịẹmaḅịa.

²⁵Mịọkụ à ḅaka ḍin lasam; ọkụma karakaraye mịẹḅọ ḅụ Nyanaḅọ Ḅe sarakoromamẹ nwọḅẹ gbọrịḅọ sọnị anịkanịka oria awọmẹnịma ḅụ fịye ọmgbọ fịarịḅọ ma àrị ọrịkẹ.

²⁶Sịkịmamgba ò yeḍie se nweni pịrịaḅẹ ọ̀ pịkị yese jịn apụ ḅọlọaḅẹ, oria awọmẹnịma ḅo ḅẹlẹma sọmẹ.

²⁷Siye ḅụ ḅarasin se iḅiyemịẹ; se ị́ ḅụ pakaḅoḅịa apụma ini ama mị ḅie anga gbasoḅịa;

²⁸anịatịḅị Nyanaḅọ Ḅe ọ̀ karakaraye mịẹ ḅẹlẹmamẹ, ọ̀ pịkị kuḅie se ọ̀ ḅụgbanapụ ma sarakoroma ẹkẹ. Ori ini ḅọị gbasomẹ, ọkụma sitịḅịnyanaḅọ ḅe ḅụ pakaḅo apụma, ini ini depakụmaḅịa.

²⁹Karakaraye mịẹapụ ma ama mị nyanaḅịa se pịkị anịa ḅie anga gbasoḅịa.

³⁰Karakaraye mịẹḅọ ḅe oria ọkwẹịn ma nemi nyana ọkwẹịn-ẹ, ọ̀ pịkị sịkịmamgba karakaraye mịẹmịẹmẹ.

³¹Ọ̀ Nyana Tamụnọ Ḅe oloko mị ò se ò kuḅie kokomẹ, ọ̀ pịkị anịaḅụ sikimakẹ ngịsị.

³²Sitịḅịnyanaḅọ ḅe karakaraye mịẹḅọ ḅe ọbịmẹ, se ḅụkụrọma ọ̀ ḅaa ḍọkịmẹ;

³³ọkụma Nyanaḅọ Ḅe ori ọ̀ ḅụ ḅarasin ori-na-tarakapụ ma kụrọ mị pịrị-ẹkẹ, anịkanịka ò ḅereni ẹkẹ ini ḅẹrẹsikọn ọ̀ pịrị ini oria ḅẹrẹkọn àrị sịkịḅụ.

³⁴Ị́ kuḅie se Nyanaḅọ Ḅe ḅụgbana pịkị oria olokoma koko; ọ̀ kun se ị́ pịrịḅịa se pịkị kiri se ị́ pịrịḅịa, se ị́ ọrịḅịa sitịḅịnyana, ḅọ ḅe ini ò depakụmamẹ.

³⁵Gbọrị-sịkị, gbọrị sitịḅịnyana angarafị ḅẹrẹtọnḅọ à nwọ nemimẹ; Lẹbanọn awụ chịnma gele ọkụ, ò gele ḅẹḅọ ḅẹḅọ nẹngịmẹ;

³⁶anịeso à ḅo ḅọrọ sịkị, ọ̀ ḅarị ofori-ẹ; àrị ọ̀ ḍọkịmẹ, ọkụma àrị ori ọrịkẹ.

³⁷Karakaraye mịẹḅọ ḅe ḅụ elekima chụa, gbunma karakaraye mịẹḅọ ḅe ḍiki; deinḅọ ḅe ò furoḅie pakaḅoḅịapụ ọ̀ nwọ nyanamẹ,

³⁸ọkụma siapụma ini gbọtụma ini ḅaasinmẹ, se inia furoḅie pakaḅo-apụ mamgba ini ini ọfịn sinmẹ.

³⁹Nyanaḅọ Ḅe ọ̀ karakaraye mịẹapụ ma ḍụamẹ, ḅụfụka sịkịḅụ ọ̀ pịkị ini ḅọịmẹ.

⁴⁰Ọ̀ ḅarachụa ini pịrị se ini ḍụamẹ; sitịḅịnyanapụma ḅaraḅie ori ini ḍụamẹ, anịatịḅị ini ọ̀ damamunmẹ ḅụ ḅọị gose.