Read kirikeni Fịafịa Nime 40 Bible Online

Fịafịa Nime 40 - kirikeni bible

Fịafịa Nime 40

¹Àrị inema sime Nyanaḅọ Ḅe oria ḅarachụa mị korumẹ; anịsịkị ori ị̀ poki se ị̀ya owu mị naamẹ.

²Ḅalafama olulu ḅie ori ị̀ nụnụ pakụmamẹ, ḍumo famaḅịa ọgbụdụ ḅie ori ị̀ ọkị pakụmamẹ. Ori ị̀ se ḍụparị ọgọnọ chịẹmamẹ, mịẹse ye ị̀ la-ẹka ḅara.

³Ori à chuḅịa ịwọ nime se ị̀ telimamẹ, se mịna Tamụnọ Ḅe bomaḅịa nime. Anị ḅeri nụnụye sọ mịn mị ọrịḅịa ḅaka apụ pịrịḅịa, se ini inia kuḅie ma se Nyanaḅọ Ḅe ḅụgbanaḅịa.

⁴Ḅieḅẹlẹ sime kuḅie se Nyanaḅọ Ḅe ḅụgbana apụma pịrị, tọrụ pịkị oru dakapụ ma, anịkanịka iruo-a oru tẹkẹ apụma ḅụ sọ se àrị tẹkẹkapụ ma.

⁵Ị́ ḅakama yemịẹ wa pịrịsam, Yei Nyanaḅọ mịna Tamụnọ; ị́ simeọkụ simeḅọ ofori-ẹ! Ị́ tọnsam na ḅaka ḅụgbiripuma iḅiaye ị́ nwọ mịẹ wa pịrịḅịa. Àrị ineda arịmgba ḅẹrẹ ḍuko so ẹkẹ— arịa kịẹn ḅịpị opuma ḅakamẹ!

⁶Ị́ agba na ḍiepịrịaye na ḅikẹ; se agbamịẹ ẹbẹ ọgọnọ dọkịmaḅịa bebe nama ị́ nwọ ḅikẹ, anịkanịka si deki sinḅịa agba. Anịnakaraka se ị́ pokiḅịa ḅeri ị́ nwọse ị̀ pịrịmẹ,

⁷anịẹrẹchị à pẹkẹrẹmẹ, “Mịn ị̀rị̀-ẹ; ị́ tọn ị̀ pịrịayema, oloko ḍiri mị ḅie omi-ẹ.

⁸Àrị ị́ ḅụḅẹlẹye mị mịẹ ḅelemamẹ ị̀ Tamụnọ! Ị́ya ḍieaye ma à se ị̀ kuḅie chụamẹ.”

⁹Ị́ya tomoni mamgba koḅiria nyọ, Nyanaḅọ, àrị iḅi ḅẹrẹ mị ḍukomẹ na ị́ wa ḍụamẹ. Ị́ nemimẹ na anị ḍuko mị ḅụ ngịsị à dachịẹ-ẹkẹ.

¹⁰Ḍụaḅọrọma iḅi ḅẹrẹ mị ḍuko mị, à se koroma ị̀ ḅụ ngẹrị pịrịkẹ, à sịkịmamgba ị́ya nweni ḅẹlẹma mị na, ị́ya ḅarachụa mị na ḍukopakụmasam. Ị́ya tomonima koḅiria nyọḅụ ma à yawụma simekẹ, anị ị́ya iḅi na ị́ya karakaraye mịẹ mị na pịkị ị́ya kunoka ḅẹlẹma mị na gbakịmaye ḅụ.

¹¹Nyanaḅọ, à nemimẹ na, ḍikitịḅịfoin nyana ị̀ pịrịḅụ, ngịsị ị́ dachịẹkẹ. Ị́ya ḅẹlẹma na iḅi na karakaraye mịẹ mị na sịkịmamgba ị̀ kokoḅịa.

¹²Ḅụfụka ḅakama ị̀ gbori kelemamẹ— kịẹnḅụ opuma ḅakamẹ! Ị̀ya sima àrị ḅo ị̀ pụnụmasam, à ḅarị pịkị ineda nyọ ọrịkẹ; àrị ḅakatẹịn ị̀ tịḅị inime ma nẹngịmẹ, ị̀ya kuḅie kụrọ pịkị ị̀ ḅụ fasam.

¹³Ị̀ ḍụa, Nyanaḅọ! Ḅarachụa ị̀ pịrị mịọkụ!

¹⁴Ị̀ ḅaa-ẹtọn àrị apụma ye ọmụ gbọtụma inia ḅara si se ini ḅịpịogbosọka nyana. Ye ị̀ya ḅụfụka gose ḅieḅẹlẹ àrị apụma vinpịkị se ḅụgerere nyana.

¹⁵Ye ị̀ se ḍẹrịye-mịẹ-tiarịapụ ma, ọmụ inia ḅara si ḅe ḅụgbiripu nyana.

¹⁶Ye ị́ damaḅoarịapụ mamgba ḅieḅẹlẹ se ḍoroku. Ye sịkịmamgba ị́ya ḍụaḅọrọma mị gose mịẹḅaka ḅe arịapụ ma sịkịmamgba ḅẹ na, “Nyanaḅọ Ḅe ọ̀ ḍụḅamẹ!”

¹⁷Ị̀ ḅụ ịnyọ ofori-ẹ, à pịkị igweinmẹ, Yei Nyanaḅọ, ọkụma ma ị́ ị̀ se ḅieḅaramakẹ. Ị́rị́ ị̀ ḍụaḅọ ḅe-ẹ, pịkị ị̀ Tamụnọ Ḅe-ẹ— sarama ḅo ḅarachụa ị̀ pịrị!