Read kirikeni Fịafịa Nime 41 Bible Online

Fịafịa Nime 41 - kirikeni bible

Fịafịa Nime 41

¹Ḅieḅẹlẹ sime igwein apụ gose kpalakpalarịapụ ma pịrị; Nyanaḅọ Ḅe ọ̀ ḅarachụa ini pịrịḅịa ini ḅụfụka ḅie sọ sịkị.

²Nyanaḅọ Ḅe ori ini kokoḅịa, ọ̀ pịkị inia ḍumo ma kpaḅịa; ama mị ḅie ọ̀ mịẹḅịa inia ḅieḅẹlẹ; ori iniaḅụ ḅarasin inina-tarakapụma kụrọ mị pịrị ẹkẹ.

³Nyanaḅọ Ḅe ọ̀ ḅarachụa ini pịrịḅịa ini obi sịkị ori ini gwọḅịa.

⁴À nwọḅẹmẹ, “Ị́ ḅụ à siye mịẹsam Nyanaḅọ; ị̀ ḍikitịḅịfoin se ị̀ gwọ.”

⁵Ị̀rị̀na-tarakapụma ị̀ ḅụ siaye ḍukomẹ. Ini ḅimẹ na à fị, se ini ị̀ se ḅieḅarama.

⁶Ḅo toluma ị̀ ḍikiapụ ma, iḅi kuḅie nyanapụkẹ; ị̀ ḅụ si-a ḅẹrẹ anị ini kolokolo paka so mun nyọ mamgba ḅụ ḍuko finjimaye-ẹ.

⁷Ḍikiḅụnwọnwọ se ị̀ wẹrịmapụ mamgba ị̀ ḅụye se miniminima ọkwẹịn jụmḅọ jụmḅọ pịrịmẹ, ị̀ ḅụ sitẹịnye ini nwọ koroma ị̀ pịrịmẹ.

⁸Ini nwọḅẹmẹ, “Ọ̀ fịḅịa obi ọ̀ nwọ kọn aḅẹ; oria mọnọye ọgọnọ ngịsị ọ̀ ḅarị sịsẹ ẹkẹ.”

⁹Ị̀ ḅụ yelatẹịn ikiaḅọ ḅe sọnị, anị à kuḅie se ḅụgbanatẹịnḅọ ḅe, ị̀rị̀ na ị̀ya fịaye ḍia fịfịḅọ ḅe sọnị vinpịkị ị̀ dapakasam.

¹⁰Ị̀ ḍikitịḅịfoin Nyanaḅọ, se ị̀ gwọ, se àrị ị̀rị̀na-tarakapụ ma ḅara so owu ḅiḅịa.

¹¹Ini ị̀ nẹngịma ẹkẹ, à pịkị nemiḅịa na ị̀ya mịẹmịẹye ị́ ḅụ ḅẹlẹmẹ.

¹²Ị́ ḅarachụa ị̀ pịrịḅịa, anịatịḅị à karakaraye mịẹmịẹmẹ; ị́ ị̀ se ị́ tọrụkuḅu koroma gbasoḅịa.

¹³Ọ́ Nyanaḅọ, Izrẹl Tamụnọ Ḅe boma! Mịọkụ na sịkịmamgba na ómine ò boma! Amẹn! Amẹn!