Read kirikeni Fịafịa Nime 42 Bible Online

Fịafịa Nime 42 - kirikeni bible

Fịafịa Nime 42

¹Tụḅụra oḅoku-ideri-mengi ḍọkị ọkụ, anị àrị ị́ ḍọkị ọkụ-ẹ, Yei Tamụnọ.

²Ị́ ị̀ pụkọ tarịmẹ, ḍumo Tamụnọ. Nde sịkị àrị ineda mun ị́ tọrọkọ tẹkẹ ḅe?

³Enekaka na ḍin na ḅụ àrị owumẹ, owu-a mengi kẹngẹ anị ị̀ya fịye-ẹ; sịkịmamgba ị̀rị̀na-tarakapụ ma ini ị̀ gbelaḅẹ, “Ị́ Tamụnọ Ḅe nde anga ori omi?”

⁴Ị̀ kuḅie kanmẹ à ḅọrọsaye ma se ḅiekoroma sịkị, à tomoni ogbo mị na Tamụnọ warị ḅie mun sịkị; à tọrọkọ da ini pịrịse ini nwẹngịma mun-arị sịkịḅụ, ḅieḅẹlẹ-tomoni-ogbo nime chu, pịkị oloku Tamụnọ Ḅe boma aḅẹ.

⁵Cheye gose àrị opuma ngịrị ḅe? Cheye gose àrị opuma ḅụfụka se ị̀ ḅụ pịrịḅe? Àrị ị̀ kuḅie se Tamụnọ Ḅe ḅụgbanaḅịa, à pịkị ò bomaḅịa, ị̀ ḍụaḅọ pịkị ị̀ Tamụnọ Ḅe.

⁶Mịn ini kụrọḅaraḅụ ị̀ de ḅo koroma nyọ mị ḅụ ị̀ kuḅie kan aḅẹ, anịẹrẹchị àrị ị̀ya koroma ma pịkị ọ̀ damẹ. Ori imbikia-imbikiama kururu se ị̀ tẹmẹ sẹịnmasam; ḅụḅalaḅala, ekerea ị̀ damẹ opu mengi ekerea ọkụ, ọgọnọju wẹrị sararị mengi ịḅanịma ideri Jọdan da ọkụ simemẹ; anị Hamọn Tụndụ mị na pịkị Miza Tụndụ mị na ḅụḅoarịaye ma.

⁸Ye Nyanaḅọ Ḅe enekakaḅụ oria kunoka ḅẹlẹma mị ḍiepakụma, mịẹsosịkị à chuḅịa nime à nwọ nyanaḅịa ọkụ ḍin ḅụ, anị à kọn ị̀ya ḍumo mị ḅe Tamụnọ Ḅe pịrịḅịa tẹkẹ mị.

⁹À nwọse ị̀ ḍụa Tamụnọ Ḅe ḅẹmẹ, “Cheye gose ị́ ị̀ se ḅieḅarama? Cheye gose à pa ị̀rị̀na-tarakapụ ma ḅara ḅie opu tọrụsiọrị-ao?”

¹⁰Inia nweni wọlọ mị ị̀ tẹmẹ kọsịmamẹ; ini nwọ pa ị̀ gbelarịsịkị, “Ị́ Tamụnọ Ḅe nde anga ori omi?”

¹¹Cheye gose àrị opuma ngịrịḅe? Cheye gose àrị opuma ḅụfụka se ị̀ ḅụ pịrịḅe? Àrị ị̀ kuḅie se Tamụnọ Ḅe ḅụgbanaḅịa, à pịkịna ò bomaḅịa, ị̀ ḍụaḅọ pịkị ị̀ Tamụnọ Ḅe.