Read kirikeni Fịafịa Nime 44 Bible Online

Fịafịa Nime 44 - kirikeni bible

Fịafịa Nime 44

¹Mịna ḅeri ma wa se naasam, Yei Tamụnọ— mịna ḅieju-a ḍapụma anịa ḅẹrẹ ḍuko wa pịrịsam, anị inia sịkịḅụ ị́ mịẹ ḅụgbiripụmaye ma, ḅọlọsa enema ḅie:

²anị ị́rị́ ḅarana oru nemikapụ ma depakụma se ị́ya tomonima se inia ama ḅie koroma ọkụ mị; ị́ pịkị fomuḅara se ísí-a sẹma pịrị ọkụ mị anịsịkị mịẹse ye ị́ya tomonima na lọkọlọkọmẹ.

³Ị́ya tomonima inia okola-agiji ini nwọse ama mị inumakẹ; inia kụrọḅụ ini anị inumakẹ; ọkụma ị́ya kụrọ na ị́ya ịnyọ na ḅụ-ẹ, ị́rị́ ini na omi-ẹ ḅe kuḅie kụrọ mị na, anị mị ḍiepakụmamẹ na ị́ ini ḅẹlẹmamẹ.

⁴Ị́rị́ ị̀ya amanyanaḅọ-ẹ pịkị ị̀ Tamụnọ-ẹ; ị́ ọmụḅaraiḅi se ị́ya tomonima pịrịmẹ,

⁵ị́ya kụrọḅụ wa mine-na-tarakapụ ma nẹngịmamẹ.

⁶À kuḅie se ị̀ya lubu mị ḅụ gbanakẹ, anịkanịka ị̀ya okola-agiji mị re ị̀ ḍụaḅịayekẹ;

⁷ọkụma ị́ wa ḍụasam mine-na-tarakapụ ma ḅaraḅie wa ḍikiḅụnwọnwọ apụma wa pịkị ini nẹngịmamẹ.

⁸Wa sịkịmamgba ị́ bomaḅịa pịkị mịẹḅaka se ị́ ḅe gbasoḅịa.

⁹Ọkụma mịọkụ ị́ wa sịkịsam, ị́ pịkị mịẹmẹ ini wa nẹngịmamẹ; ị́ ḅarị mịna owunima ḅụ sọ se mine na paka ọmụ munkẹ.

¹⁰Ị́ mịẹmẹ wa mine-na-tarakapụ ma gose mangịmẹ, se iniḅo mịnaye ma ọfọịn ọkịmẹ.

¹¹Ị́ ḅerenimẹ ini anana ogbo ḅaa ḅara se wa ḅaa; ị́ wa galagalama jịn-a sẹma ḅie sẹịnmẹ.

¹²Ị́ya tomonima ị́ nwọse kala ḅịpị dẹrịmẹ ini opu yela na gbẹịnkẹ nwọḅẹ ḅara.

¹³Mine na kpekima angapụma ị́ se wa mịẹye mị ini ọrịmẹ, ini wa kombo pịkị wa ḍẹrịmẹ.

¹⁴Sẹ ma ogboku ị́ wa se kpọtiye mịẹsam, wa gọlịḅụ ini inia tịḅị ma jike jike wa damẹ.

¹⁵Sịkịmamgba ị̀ ḅụgereremẹ; ḅụgerere ị̀ gbẹịnmẹ

¹⁶àrị ị̀rị̀na-tarakapụ ma na ị̀ ḍikiḅụnwọnwọ apụma na, pụa ḍẹrị ma na wọlọ ma na naamẹ.

¹⁷Ma mamgba mịna ḅụ pakasam, ma wa pa ị́ se ḅieḅaramakẹ nwọḅẹ sọnị, anịkanịka ị́ mine na fị ọḅọkụ mị wa kanmẹ ḅẹye sọ ofori-ẹ.

¹⁸Wa nyana ḅereni ị́ pịrịkẹ ḅẹye ofori-ẹ; ị́ya olokoma wa nwọ kokokẹ ḅẹye sọ ofori-ẹ.

¹⁹Anịẹḅẹ sọnị owoi-a nama ḅie, ị́ ḅarachụa wa pịrịka ḅaraḅụ ị́ wa wẹrịso mẹ; gbuntẹịn kanakana mị ḅie ị́ wa se sarakoromamẹ.

²⁰Wa nemikase mịna Tamụnọ Ḅe tẹkẹ mị ḅụ dachịẹ se jịn sẹ-a oru tẹkẹ ọkụma,

²¹gbarịmaka ḅaraḅụ ị́ ḍọkịḅo ọrịḅịa, anịatịḅị mịna ḅọị koroma ma ị́ nemimẹ.

²²Ọkụma ị́ gose anị ini sịkịmamgba wa ḅaa arịye-ẹ, ini ḅaaḅịa anana ogbo mịẹ ḅara anị ini wa mịẹarị ḅara-ẹ.

²³Sịsẹ, Nyanaḅọ! Cheye gose ị́ mọnọ-ao? Ị́ ḅụ garagarama! Wa sịkị gbasoma!

²⁴Cheye gose ị́ ḅụ ị́ nwọ ḅọị wa pịrị-ao? Mịna tọrụsiọrị ma na ḅụfụka ma na se ḅieḅaramama!

²⁵Kiri ọgọnọ wa ḅịkị kọsịmẹ; wa fọn ḅie ḅọlọlọmẹ ọmụ mịna ḅara siḅụ!

²⁶Ḅo ḅarachụa wa pịrị! Anịatịḅị ị́ya kunoka ḅẹlẹma mị wa ḍụamẹ!