Read kirikeni Fịafịa Nime 49 Bible Online

Fịafịa Nime 49 - kirikeni bible

Fịafịa Nime 49

¹Ḅẹḅọ ḅẹḅọ mịn mị naa! Ó poki, nyọ nyọma ḅụ sime-a tomoni mamgba,

²opuapụ na kalapụ na, pịkị pẹrẹapụ na igwein apụ na gboloma ọkụma gbọrị ḅara-ẹ.

³Ị̀ya koroma ma belele ḅịa; à yenemi ọkwẹịn kọnḅịa.

⁴Àrị ị̀ tọrụ pịkị kaḅo ma daḅịa, se àrị ọbọ farịarị sịkị, àrị fiearịye à pịkị nwọ ḍuko pakụmaḅịa.

⁵Ị̀ ḅalafakẹ ḅalafamaye ḅo sịkị, tarakapụ ị̀ gbọrị kelema sịkị,

⁶anị kuḅie se inia ngọma ḅụgbana siaye mịẹapụ ma, pịkị ini kọn opu ala mị se opuaye mịẹarị apụma.

⁷Tomoniḅọ ineda ngịsị mịna ḅụ pẹkẹrẹ pakụmaḅo ẹkẹ; ori ineda ò ḍumo mị la igbiki se Tamụnọ Ḅe gbẹịn ẹkẹ,

⁸Anịatịḅị se tomoniḅọ ḍumo gbẹịnḅịa igbiki opuma ḅakamẹ. Ori ineda gbẹịnḅịa igbiki ngịsị laḅịa nyọ ofori-ẹ

⁹se iḍupu mị ḅụ ọ̀ ḍụapakụma, se ò ḍumo gbaso.

¹⁰Tomoniḅọ goyegoye ineda ọrịḅịa na nemi nyanapụ sọ fịmẹ, anị pịkị ọkọ sime yenemikapụ na oḅoriapụ na pịrịmẹ. Inimgba inia ngọma wẹrịso inia furo ḅie pakaḅoarịapụ ma pịrịmẹ.

¹¹Inia iḍupuma inia warị sọ gbasomẹ; sịkịmamgba anịnyọ ini sime gbasomẹ, gbọrị sịkị ḅụ inia ḅarakuḅu ama ini nwọ nyanamẹ nwọḅẹsọnị.

¹²Tomoniḅọ opu ineda fịḅụ nụḅọ ḍụa ẹkẹ; nụḅọ pa fịḅịa, namama fị ọkụ.

¹³Kuḅie se mịnaḅụ gbanapụ ma ḅụ pakaye ma ḍiki, anị inia ngọma ini karamẹ nwọḅẹ tọrụḅẹlẹ ḍumo kọn arịapụ ma ḅụ pakarịaye ma—

¹⁴anana si fị kọn ọkụ anị ini fịḅịa ọkụ-ẹ, fị mị pịkị anana koruapụ ḅara se ini koruḅịa. Karakaraye mịẹapụ ma inia ḅụ ọmụḅaraiḅi nyanaḅịa, inia ojuma sịkị famaka ḅaraḅụ ḅụrụarị sịkị fịapụ tomonikiri mị ḅie, inia warịma ḅụ wẹrị salama sime ḅụ.

¹⁵Ọkụma Tamụnọ Ḅe ori ị̀ ḍụaḅịa; ọ̀ fị mị ḅe kụrọ ḅaraḅụ ị̀ ḍụaḅịa.

¹⁶Ị́ ḅụ ḅalaḅalamama tomoniḅọ kọn ngọ gose, oria ngọma sutẹịn sịkịḅụ sọnị;

¹⁷ori ineda anị se so ẹkẹ ọ̀ fịḅịa sịkị; oria ngọma àrị ori na iḍupu ḅie sọ ẹkẹ.

¹⁸Ḍumo, tomoniḅọ ḅe na deinmẹ ḅẹ sọnị ini ò tokonimẹ, ye ori na lọkọlọkọ ẹrẹchị,

¹⁹ò mun fịḅụ oria ḅieju-aḍapụ mamgba ḅụ sọḅịa, anị kanakana simegbaso nyọ mị.

²⁰Tomoniḅọ opu ineda fịḅụ ọ̀ ḍụa ẹkẹ; ọ̀ pa fịḅịa, namama fị ọkụ.