Read kirikeni Fịafịa Nime 50 Bible Online

Fịafịa Nime 50 - kirikeni bible

Fịafịa Nime 50

¹Kụrọmamgba Nyana Tamụnọ, Nyanaḅọ Ḅe ori ọkwẹịnmẹ; bebe tomonikiri mị ọ̀ nwọ chịnmẹ, ịrụapakapaka nyọ ọkịmun ịrụasọsọ la.

²Zaịyọn ḅụ Tamụnọ Ḅe ọ̀ ḅịa pakamẹ, anị iḅi karagbasị opuama mị ḅụ.

³Mịna Tamụnọ Ḅe ò ḅoaḅẹ, ọkụma ọ̀ yawụma ḅo ẹkẹ; owoima kọrịarị fịnị ọ̀ tọrọkọ omi-ẹ, kụrọ irisi ò kelemamẹ.

⁴Ò so na sẹkiri na chịnmẹ onyechịẹ ḅaraḅụ àrị ò ḍiki, ọ̀ ḅẹrẹkọn oria tomonima pịrịḅịa sịkị.

⁵Ọ̀ nwọḅẹmẹ, “Kuḅie se ị̀ ḅụgbana ị̀ya tomonima ọ́ nwọ kpokponima ḅo ị̀ pịrị, anị agbamịẹ ị̀ pịrịḅụ ị̀rị̀ na ọḅọkụ fịapụma.”

⁶So ma ḍukoḅelemamẹ na Tamụnọ Ḅe ọ̀ karakaramẹ, na ori-na-mịnaḅụ na ḅẹrẹkọnḅọ-ẹ.

⁷“Ó poki ị̀ya tomoni, àrị ọkwẹịnḅịa; à ḅẹrẹḍuko ị́ ọgọnọ gbanaḅịa Izrẹl. Ị̀rị̀ Tamụnọ-ẹ, ị́ Tamụnọ Ḅe-ẹ.

⁸Ọ́ mịẹarị agbama na, pịkị sịkịmamgba ọ́ mịẹ ị̀ pịrịarị dọkịma agbama na gose àrị ó ḍiki ịganịkẹ.

⁹Anịẹḅẹsọ àrị ọ́mịna ozuma ḅie ḅo nambulo ḍọkịkẹ pịkị ọ́mịna oḅori ogboma ḅie oḅori sọnị;

¹⁰piri ḅie sime nama mamgba ị̀yaye-ẹ, pịkị chịngị-a mẹndẹ oyiasi fịnjị fịnjịma ọgọnọ sime-a nambuloma na.

¹¹Piri-a feni mamgba ị̀yaye-ẹ, pịkị ozuma ḅie sime ḍumo nyanaye mamgba na.

¹²“Ḅuru ị̀ tarị ọkụma àrị ọ́mịna ḅara fịye gbela ẹkẹ, anịatịḅị tomonikiri mị na anịa ḅie simeaye mamgba na ị̀yaye-ẹ.

¹³À nambulo mịnị pẹịpẹị, anịkanịka àrị oḅori pulo ḅuḅu?

¹⁴Ye mịẹḅaka ḅe mị ọ́mịna agbamịẹye nwọsọ, Tamụnọ Ḅe pịrị, pịkị ị́ ḅereni aye mamgba se Kụrọmamgba Nyanaḅọ Ḅe pịrị.

¹⁵Ị̀ chịn ḅụfụka ḅo ịla sịkị; àrị ị́ ḍụaḅịa, se ị́ pịkị ị̀ bomaḅịa.”

¹⁶Ọkụma Tamụnọ Ḅe nwọse sitịḅị nyanaḅọ ḅe ḅẹmẹ, “Cheye gose ị̀ya olokoma ị́ nwọ ḍawọ ị́ tịḅịḅie chụa, se àrị gogo pakụma-ao? Cheye gose ị̀ya ọḅọkụ mị ḅụ ḅẹrẹ ị́ nwọ ḍuko-ao?

¹⁷Àrị ị́ datekerema ị́ ḅerenikẹ; ị̀ya olokoma ị́ sịkịmẹ.

¹⁸Ị́ ọrị furuḅọ goyegoye ị́ya ikiaḅọ-ẹ, ị́ pịkị sẹfịapụ na nwẹngị-nwẹngịmẹ.

¹⁹“Si ọkwẹịn kọn ḅụ sịkịmamgba ị́ ḅụ karakaramamẹ; iruo kọn ḅụ ị́ sịkị famafamakẹ.

²⁰Ị́ ḅụ karakaramamẹ ḅẹrẹ ḍuko ị́ya mịnapụma ọgọnọ gbana, ị́ pịkị sịkịmamgba iniaḅụ siaye ḍọkịḍọkịmẹ.

²¹Ma mamgba ị́ mịẹsam, ọkụma gbọrịye sọ ma à ḍukokẹ, ị́ chịnmẹ na ị́ sime ọkụ à nwọ simemẹ. Ọkụma mịọkụ àrị ị́ ḍiki ịganị se, à ḅẹrẹ mị ḍuko ḅelema ị́ pịrịḅịa.

²²“Mịn mị poki ị́rị́ ị̀ se yechịnkaḅọ ḅe, anị ofori àrị ị́ ḅaasinḅịa, se ị́ ḍụaḅịa gbọrịḅọ sọ pịkị ofori-ẹ.

²³Mịẹḅaka ḅẹ mị anị agba mịẹ ḅụ kụn se ị̀ pịrịarịye mị-ẹ, mịẹka mịẹka ḅaraḅụ à pịkị ị̀ ḅịpị pokiarịapụ mamgba ḍụaḅịa.”