Read kirikeni Fịafịa Nime 51 Bible Online

Fịafịa Nime 51 - kirikeni bible

Fịafịa Nime 51

¹Ị̀ ḍikiḅụgerere, Yei Tamụnọ, ị́ya kunoka ḅẹlẹma mị gose. Ị́ya opu ḍikiḅụgerere mị gose ị̀ya sima wọlọma sin!

²Ị̀ya si mịẹmịẹye mamgba sịkịrịsin se ị̀ya sima ḅụ ị̀ mịẹfịafịama!

³Ị̀ya mịẹirima ma à nemimẹ; sịkịmamgba ị̀ya sima à nwọ nemimẹ.

⁴Ị́ ḅụ mị à si mịẹsaye-ẹ—ị́ ḅụ kẹngẹ-ẹ— mị ị́ si se chịnye mị à nwọ mịẹye-ẹ. Anịẹrẹchị ị́ karakaramẹ, ị́ ḅẹrẹkọn ị̀ pịrịmẹ nwọ ḅẹḅẹ, si ḅẹrẹkọn ị̀ pịrị ḅụ ị́ karakaraye mịẹmẹ.

⁵À si mịẹmịẹye nyanamẹ ini ị̀ yi ene ḅụ sakị sịkị ngịsị; ini ị̀ya simekọn sịkị ngịsị, si ị̀ ḅụ omi-ẹ.

⁶Iḅiyemịẹḅara na karakaraye na anị ị́ ḍọkịye-ẹ; ị́ya nemi se ị̀ kuḅie ḅeinma.

⁷Ị̀ya si mị sin, se à fịafịaḅịa; ị̀ sịkịrị à pịkị fịafịa sino nẹngịḅịa.

⁸Ye à ḍoroku na ḅieḅẹlẹ nyọ fiema na nwọ naa; ị́ pịkị ị̀ kọsịma se ị̀ anyịmasam nwọḅẹsọ, ị̀ ḅie ḅo pịkị ḅẹlẹḅịa.

⁹Ị́ tọrụmgbọlụma gbẹịn ị̀ya sima pịrị se ị̀ya si mịẹmịẹaye mamgba wọlọma sin ị̀ pịrị.

¹⁰Fịafịa kuḅie tẹmẹ ị̀ ḅiechụa, Yei Tamụnọ, pịkị ịwọ ḅereni nyanaḅịa yemịẹḅara se ị̀ ḅie chu.

¹¹Ị́ tọrụkuḅu ḅụ ị̀ desinma; ị̀ ḅie ị́ya kụrọ mị sinma.

¹²Kpoto ị́ya ḍụaḅọrọma mị ḅụ ḅo ḅieḅẹlẹ mị se ị̀ pịrị, se ị̀ mịẹ àrị ị́ ḅịpịpoki ḍọkịḅọ nwọsọ.

¹³Anịsịkị àrị ị́ya olokoma se siaye mịẹapụ ma ḍieḅịa, se ini vinpịkị ị́ damaḅoḅịa.

¹⁴Ị̀ ḍumo wẹrịso, Yei Tamụnọ, se ị̀ ḍụa, à pịkị ḅieḅẹlẹḅụ ị́ya karakara mị ḍuko finjimaḅịa.

¹⁵Ḅarachụa ọkwẹịn ị̀ pịrị, Nyanaḅọ, se àrị ị́ bomaḅịa.

¹⁶Ị́ agba ḍọkịkẹ, anịka ọkụma à mịẹḅịa; ị́ dọkịma agba ḅẹlẹmakẹ.

¹⁷Ị̀ya agba mị ḅụ iderima kuḅie anị ḅomẹ, Yei Tamụnọ; ḅụ iderima na si ḅụ pịkị kuḅie na ị́ sịkị ẹkẹ.

¹⁸Yei Tamụnọ, iḅi se Zaịyọn mị mịẹ, pịkị ḅarachụa anị pịrị; kpoto Jerusalẹm onu ma nama chịẹma.

¹⁹Anịsịkị mị ị́ ḅieḅẹlẹ nyana karakara agba na mịna dọkịma agbama na pịrịḅịa; anịsịkị mị ini nambulo se ị́ya agbamịẹ ẹbẹ mị ọgọnọ agba mịẹḅịaye-ẹ.