Read kirikeni Fịafịa Nime 56 Bible Online

Fịafịa Nime 56 - kirikeni bible

Fịafịa Nime 56

¹Ị̀ ḍikiḅụgerere, Yei Tamụnọ, anịatịḅị ini ị̀ dapakaḅẹ; ị̀rị̀na-tarakapụ ma sịkịmamgba ini ḅụọ-se-ị̀-chụaḅẹ.

²Ene mamgba ị̀rị̀na-tarakapụ ị̀ dapakaḅẹ. Ị̀rị̀na-owusọarịapụ opuma ḅakamẹ.

³Ị̀ ḅalafa sịkị, Kụrọmamgba Nyanaḅọ, àrị ị̀ kuḅie se ị́ ḅụgbanamẹ.

⁴À kuḅie se Tamụnọ Ḅe ḅụgbanamẹ, à pịkị ḅarị ḅalafakẹ; ò ḅereniye gose àrị ò bomamẹ. Papa mbuḅọ ineda chese ị̀ mịẹḅe?

⁵Ị̀rị̀na-tarakapụ ene mamgba ḅẹrẹse ị̀ ḍọkịaḅẹ; sịkịmamgba ye se ị̀ lamaḅịa ọkụ ini nwọ koromaḅẹ!

⁶Ini koḅirima se ḅọị-a nyọma ḅie à mịẹye goyegoye nwọ ẹnyẹmẹ, se ị̀ ḅaaḅịa koroma nwọ kọnmẹ.

⁷Fomuḅara se ini pịrị, Yei Tamụnọ, ini mịẹarị siaye ma gose; ị́ya ịganịḅụ iniapụ ma nẹngịma!

⁸À ḅụfụka nyana la-ọkụ ị́ nemimẹ; ị̀ya owu-a mengi ma ḅe ḍiri ị́ ḅara omi-ẹ. Ị́ya ḍiri ḅie àrị gịẹịn koromaka?

⁹Àrị ị́ chịnḅịa ene, ị̀rị̀na-tarakapụ ma ini vinpịkị soḅịa. Mịn mị à nemimẹ na Tamụnọ Ḅe ori ị̀ ḅụ omi-ẹ—

¹⁰Nyanaḅọ Ḅe oria ḅereniye mị àrị anị bomamẹ.

¹¹Ọ̀ ḅụ à kuḅie se gbanamẹ, ị̀ ḅalafa ẹkẹ. Papa mbuḅọ ineda chese ị̀ mịẹ ḅe?

¹²Yei Tamụnọ, à ḅerenisaye mị à nwọ mịẹ ị́ pịrịḅịa; ị̀ya mịẹḅaka ḍiepịrịaye agba à nwọ se ị́ pịrịḅịa,

¹³anịatịḅị ị́ fị ḅie ị̀ ḍụasam se pịkị ọmụḅarasi ḅụ ị̀ pọkọmẹ. Anị ọkọ pakamẹ na Tamụnọ Ḅe tọrụkuḅu à nwẹngịmẹ, ḅịa ḍumo apụma ḅụ sara àrị enekuḅu mị ḅie.