Read kirikeni Fịafịa Nime 57 Bible Online

Fịafịa Nime 57 - kirikeni bible

Fịafịa Nime 57

¹Ị̀ ḍikiḅụgerere, Yei Tamụnọ, ị̀ ḍikiḅụgerere, anịatịḅị ị́rị́ ị̀ ḅọịḅịaye gose àrị ị́ damaḅomẹ. Ị́ pamba ma chukuḅie à ḅọị nyọ ḍọkịḅomẹ, ọkịmun kụrọ irisi mị fie ḅọrọ sịkị la.

²À Geletẹịn Tamụnọ Ḅe chịn mẹ, à ḅiye goyegoye mịẹ ị̀ pịrịarị Tamụnọ Ḅe.

³Soḅie ḅụ ori ị̀ pẹkẹrẹ se ị̀ ḍụaḅịa; ị̀ pụndarị apụma ori ini nẹngịmaḅịa. Tamụnọ Ḅe oria kunoka ḅẹlẹma mị na ḅereni mị na ọ̀ nwọ ḍiepakụma ị̀ pịrịḅịa.

⁴Tarakapụ ị̀ gbori kelemamẹ, tomoni pẹịpẹị chịrịḅama sime ọkụ sime apụma. Inia aka ma sụḅa na ḍẹịn na sime ọkụ simemẹ; inia ḅịpịḅieḅẹlẹ ma okola-agiji oḅu ọkụ oḅumẹ.

⁵Sotọrụḅụ ị́ya opu mị ḍiepakụma, Yei Tamụnọ, pịkị ị́ya boma mị na bebe sẹkiri mgba kelema.

⁶Ị̀rị̀na-tarakapụma ịgbọ finjima ị̀ ọbịsam ị̀ kunḅịa ẹrẹchị; ḅụḅalaḅala ị̀ nẹngịmamẹ. Ị̀ya ateli ḅie ini olulu sokumẹ, ọkụma inina-mịnaḅụ na mị sokoro anịa ḅie sọye-ẹ.

⁷À jokoma ị́ ḅụ kụrọkuḅie nyanamẹ, Yei Tamụnọ; à nime chu ị́ bomaḅịa!

⁸Ị̀ tẹmẹ sịsẹ! Ị̀ya ọbọ na kelemakoro njalị ọbọ na! Àrị ịrụa mị chịn sịsẹmaḅịa.

⁹À mịẹḅaka se ị́ ḅẹḅịa sẹ sẹma ogboku, Yei Nyanaḅọ. Tomonima ogboku àrị ị́ bomaḅịa.

¹⁰Ị́ya kunoka ḅẹlẹma mị so ma lamẹ; ị́ya karakaraye mịẹ mị sotọrụ ma lamẹ.

¹¹Sotọrụ ḅụ ị́ya opu mị na ị́ya boma mị na ḍiepakụma, sẹkiri mgba kelema, Yei Tamụnọ.