Read kirikeni Fịafịa Nime 59 Bible Online

Fịafịa Nime 59 - kirikeni bible

Fịafịa Nime 59

¹Ị̀rị̀na-tarakapụma ḅaraḅie ị̀ ḍụa, ị̀ Tamụnọ; ị̀ dapakarịapụ ma ḅaraḅie ị̀ ḅọị!

²Ini siaye mịẹapụ ma ḅaraḅie ị̀ ḍụa; ini niniapụ ma ḅaraḅie ị̀ ḍụa!

³Ḍiki! Ini ị̀ ḅaaḅịa ẹrẹchị koruaḅẹ; siaye mịẹapụ koḅirimaḅẹ tụḅụrụ ị̀ daḅịaye gose. À mịẹ siye anịkanịka à mịẹ irimaye gosekẹ,

⁴anịkanịka à mịẹsima ḅụ gbọrịye gosekẹ, Yei Nyanaḅọ, se ini be inia nyọma mun aḅẹ.

⁵Sịsẹ, Kụrọmamgba Nyana Tamụnọ, se ḅo ị̀ ḍụa; ị́rị́ ḅarana yema ọrị, Izrẹl Tamụnọ! Sịsẹ se fomuḅara se oru tẹkẹ apụma pịrị; ḍikitịḅịfoin nyana sitịḅịnyana ịbafị apụma pịrịma!

⁶Sasoḅiri ini pịkịmaḅo opuama mị ḅie nwẹngịma ḅọrọ, se obiri oloku ọkụ olokumẹ.

⁷Inia wọlọ ọkwẹịn ma na inia ẹrẹma ḅịpị ma na poki. Inia ḅẹlẹ ma inia ḅịpịḅie okola-agiji sime ọkụ simemẹ, anịẹḅẹsọ ini nwọ chịnmẹ na gbọrịḅọ sọ ini kọn àrị ọkwẹịn ma naakẹ.

⁸Ọkụma ị́ ini ḍẹrịmẹ, Nyanaḅọ; ị́ oru tẹkẹ apụ mamgba kombomẹ.

⁹Ị́ nyana ịnyọḅụ à ḅiekpọ nyanamẹ; ị́rị́ ị̀ya ḅọị nyọ-ẹ, Yei Tamụnọ.

¹⁰Ị̀ Tamụnọ Ḅe ori ị̀ ḅẹlẹmamẹ, ọ̀ pịkị ị̀ damaḅoḅịa; ọ̀ mịẹḅịa àrị ọrị na ọmụ ị̀rị̀na-tarakapụ ma ḅara simẹ.

¹¹Ini ḅaama, Yei Tamụnọ, anị ofori ị̀ya tomonima inia ḅieḅaraḅịa. Ị́ya ịnyọ se ini galagalama se ini inuma, Yei Nyanaḅọ, mịna ḅọịnyọ.

¹²Si iniaḅịpị ḅọkọ ma ḅụ omi-ẹ; inia ọkwẹịn mamgba siaye-ẹ; ye inia opuamịẹmịẹaye ma ini ọlọ! Anịatịḅị wori na iruo na anị sime ini pịrịye-ẹ,

¹³ị́ya ịganịḅụ ini ḅaasin; gbọtụma ini ḅaasin. Anịsịkị ọrụḅọḅọ nemiḅịa na Tamụnọ Ḅe anị Izrẹl ḅie ḅẹrẹtọn arịye-ẹ, oria ḅẹrẹtọn mị pịkị wasama sẹkiri mgba kelemamẹ.

¹⁴Ị̀rị̀na-tarakapụma sasoḅiri ini pịkịmaḅo, se opuama mị ḅie nwẹngịma ḅọrọ se obiri oloku ọkụ olokumẹ,

¹⁵fịye gose nwẹngịma ḅọrọ àrị obiri sime ọkụ, fịye pụkọtankaḅụ ḅie ḍarị àrị obiri ḅara mị.

¹⁶Ọkụma àrị ị́ya ịnyọ mị gbakịma nime chuḅịa; dede goyegoye àrị oloku nime chuḅịa ị́ya kunoka ḅẹlẹma mị gose. Ị́ ḅọị nyọ sọ ị̀ pịrịsam, ị̀ya tọrụsiọrị sịkị ḅụ ị́ tịḅị kikima nyọ sọ ị̀ pịrịmẹ.

¹⁷Àrị ị́ bomaḅịa, owusọ ị̀ pịrịarịḅọ. Ị̀ya ḅụkikima nyọ anị Tamụnọ Ḅe-ẹ, ị̀ ḅẹlẹma Tamụnọ Ḅe.