Read kirikeni Fịafịa Nime 66 Bible Online

Fịafịa Nime 66 - kirikeni bible

Fịafịa Nime 66

¹Ó ḅieḅẹlẹ oloku kọn se Tamụnọ Ḅe boma tomoni mamgba!

²Ó nime chu oria ẹrẹ mị boma; ó boma tokoni se ọ̀ pịrị!

³Ḍuko Tamụnọ Ḅe pịrị, “Ị́ mịẹaye ma opuma ḅụgbiripumamẹ! Anị ị́ya kụrọ mị opuma ḍụḅa ẹrẹchị ị́rị́na-tarakapụ ma ḅalafa ḅụ ị́ tọrọkọ tịḅị tumẹ.

⁴Sẹkiri ḅie simeḅọ goyegoye ị́ tẹkẹmẹ; ini nime chu ị́ pịrịmẹ, ini nime chu ị́ya ẹrẹ bomamẹ.”

⁵Ḅo Tamụnọ Ḅe mịẹsaye ma ḍiki, tomonima ogboku ọ̀ nwẹngị-a ḅụgbiripumaye ma.

⁶Ori opu tọrụ mị pịkịḅo kpoinkpoin kiri mịẹmẹ; mịna ḅieju-aḍapụma ini ḅụọ nwọse nwẹngị tọrụ mị saḅamẹ. Anịnyọ mịna ḅieḅẹlẹmẹ, ọ̀ mịẹye mị gose.

⁷Oria kụrọḅụ ọ̀ ḅẹrẹtọn gbasoḅịa, ọ̀ tọrụmgbọlụma pịkị sẹma ḅụ omi-ẹ. Ye olokokanye mịẹapụ ma sịsẹ ọ̀ dapakama.

⁸Sẹ mamgba mịna Tamụnọ Ḅe boma; ó ye nweni ọ́mịna boma mị naa.

⁹Ọ̀ mịẹse wa ḍumomẹ, ngịsị ò ḅerenikẹ wa ḅịkị.

¹⁰Ị́ wa ḍaḍikisam Tamụnọ; ini se fịnị ḅie fọị seleḅa ḅo iḅiye sọ ọkụ, anị ị́ wa ḍaḍiki ọkụ-ẹ.

¹¹Ị́ mịẹse wa ḍẹịn ḅie koromẹ, ị́ pịkị ikuaye nwọse mịna kokuogbo gbanamẹ.

¹²Ị́ mịẹmẹ mine-na-tarakapụ ma wa nanga kọsịmamẹ; wa fịnị ḅie na opumengi ḅie na tolu ḅọrọmẹ, ọkụma mịọkụ ị́ wa se ḅo ḍumo ḅie chusam.

¹³À dọkịma ḍiepịrịaye agba se ị́ya warị ḅoḅịa; à ḅereni ị́ pịrịye ma à nwọse ḅo ị́ pịrịḅịa.

¹⁴À ḅụfụka ḅie sime sịkị à ḅereniye mị à nwọse ḅo ị́ pịrịḅịa.

¹⁵À se agbamịẹ ẹbẹ ọgọnọ dọkịmaḅịa anana à nwọse ị́ pịrịḅịa; ayamburama nambulo na oḅori na à nwọse agbamịẹḅịa, anịsịkị onwoin mị anị iwo somunḅịa.

¹⁶Ó ḅo poki ómine Tamụnọ Ḅe osi apụ mamgba, ọ̀ mịẹ ị̀ pịrịayema à nwọ ḍuko ọ́ pịrịḅịa.

¹⁷Àrị owu ọ̀ pịrịmẹ ḅarachụa ị̀ pịrịḅịaye gose; à nime chu ò bomamẹ.

¹⁸Àrị ị̀ya sima ḅụ ḅarasinka ọkụma, mgbọkụ Nyanaḅọ Ḅe ori ị̀ poki ẹkẹ.

¹⁹Ọkụma Tamụnọ Ḅe ò jokoma ị̀ naamẹ; ori ị̀ya tẹkẹ mị pokimẹ.

²⁰À Tamụnọ Ḅe bomamẹ, anịatịḅị ori ị̀ya tẹkẹ mị sịkịkẹ, ọ̀ pịkị ọ̀ nyana ị̀ pịrị oria kunoka ḅẹlẹma mị ọlọ chịẹmakẹ.