Read kirikeni Fịafịa Nime 68 Bible Online

Fịafịa Nime 68 - kirikeni bible

Fịafịa Nime 68

¹Tamụnọ Ḅe sịsẹ se ori-na-tarakapụ ma galagalamamẹ. Taraka se ọ̀ wẹrịmapụma, ọmụ inia ḅara si ḅụ ini mangịsomẹ.

²Fọrụ onwoin ofuro sin ọkụ anị ori ini desin ọkụ-ẹ; kandụlụ fịnị tọrọkọ sịkịrịfa ọkụ anị sitịḅịnyanapụma Tamụnọ Ḅe tọrọkọ sịkịrịfa ọkụ-ẹ.

³Ọkụma karakaraye mịẹapụ ma inia ḅieḅẹlẹmẹ, ini pịkị Tamụnọ Ḅe tọrụkuḅu ḍorokumẹ; ini pịkị ḅieḅẹlẹ oloku kọnmẹ.

⁴Ó nime chu Tamụnọ Ḅe boma, ó nime chu oria ẹrẹ mị boma; ateli karakarama ọ̀ pịrị soḅuno ma ọgọnọ nwẹngịarịḅọ ḅe. Oria ẹrẹ anị Nyanaḅọ—ọ̀ tọrụkuḅu ó ḅieḅẹlẹ!

⁵Tamụnọ Ḅe anị oria Oputẹkẹwarị mị ḅie anga ḅọ ḅe, ọ̀ tọrụ se ḍapụ na nyengiapụ na koroma fịsa awọma ḅụ wẹrịmẹ, ọ̀ pịkịna de apụ koroma fịsa eremeni ma kokomẹ.

⁶Kpọngọlọma ngẹrị sime se paka apụ nyanakapụma ini angaḅịa warị ọ̀ nwọse ini pịrịmẹ, ọ̀ pịkị tọrọkọda ikoliapụma pakụma mun ḅieḅẹlẹ ḅie chumẹ, ọkụma nyanaḅereni ọ̀ pịrịka apụma, nweni angaka kụrọ kpakịkị ama ḅie anị ini angaḅịaye-ẹ.

⁷Ye Tamụnọ, ị́ya tomonima ị́ nwọ pamun àrị sịkị, anị onwun ele mị ḅie ọ́ nwẹngị ma mun àrị sịkị,

⁸sẹkiri mị jikemẹ, so mị pịkị ene saramẹ, anị Saịnaị na Izrẹl na Tamụnọ Ḅe ḅoaḅẹ gose.

⁹Ị́ mịẹmẹ ene ḅakama ị́ya ịnyọfasa ama mị ọgọnọ koromẹ, se anị ḅo tatarị sịkị anị sime ọkụ simemẹ,

¹⁰ị́ya tomonima anịnyọ mị se inia ama mịẹmẹ; ị́ya iḅimịẹḅụ igwein apụma inia ḅụpalịmaye ma ị́ nwọ mịẹ ini pịrịmẹ.

¹¹Nyanaḅọ Ḅe kụrọ mị pịrịmẹ, se ḅaka eremeni oku mị deki nwẹngịmẹ:

¹²“Amanyanapụ na inia owunima na mangị soaḅẹ!” Ama ḅie kọn eremeni ma ini ọfọịn ḅo ayema nwọ ḍiama ọkịmẹ:

¹³ini tẹmẹ seleḅa se oḅolo elesika ma, arịa pamba ma iḅi nwananị-nwananị goli ḅaraḅịamẹ. (Cheye gose ọ́mịna ḅie da apụ anana warịma ḅie sime, owu mị koro eneḅụ?)

¹⁴Kụrọmamgba Nyanaḅọ Ḅe Zalmọn Tụndụ mị ọgọnọ amanyanapụma galagalama sịkị, ọ̀ mịẹse sino anịnyọ koromẹ.

¹⁵Bashan tụndụ mị anị Nyanaḅọ Ḅe tụndụ kịkẹmẹ, anị iḅiọkụma gelemẹ!

¹⁶Cheye gose opu ma gele nyọma ḅụ wẹrị nweni ḍikisima-o, anị Tamụnọ Ḅe sẹlẹ ọkị na, ori angaḅịa ḅẹ tụndụ mị ọgọnọ? Nyanaḅọ Ḅe anịnyọ ori anga gbasoḅịa!

¹⁷Oria tọntọn-a mẹndẹ oyiasi fịnjị, fịnjị owuni-a kporokporoma na, Nyanaḅọ Ḅe Saịnaị ḅụ ọ̀ wẹrị fịafịa nyọ mị ḅoaḅẹ.

¹⁸Ori iwo gele-a nyọma mun aḅẹ, ò kun ikoliapụma na ori na; nyanaḅereni ọ̀ pịrịka apụma ḅara ò ḍiepịrịaye ọkịḅịa. Nyanaḅọ Tamụnọ Ḅe anịnyọ ori angaḅịa.

¹⁹Ọ́ Nyanaḅọ Ḅe boma, anị eneḅeneḅene wa pụnụma iku ayema pụra arịḅọ ḅe; ori anị wa ḍụarị Tamụnọ Ḅe-ẹ.

²⁰Mịna Tamụnọ Ḅe anị nweni ḍụaḍụa Tamụnọ-ẹ; ori anị Nyanaḅọ, wa Nyanaḅọ Ḅe-ẹ, fị ḅie wa ḍụapakụma ḅo ḅọ ḅe.

²¹Pikipikiye ofori-ẹ Tamụnọ Ḅe ò ḍikiḅụnwọnwọ apụma tịḅị ma Ò puḅịa, anị nwọ inia simịẹaye ma ḅụ ḅarasin ḍụkụka apụma.

²²Nyanaḅọ Ḅe nwọḅẹmẹ, “Bashan ḅie àrị ómine-na-tarakapụma pịkịmaḅo ọ́ pịrịḅịa; ḍian ma ḅie àrị ini pịkịmaḅoḅịa,

²³mịẹsosịkị ómine inia pulo ma ḅie nwẹngịḅịa ọkụ, ọ́mịna obirima pịkị àrị ine taḅaḅịa pulo taḅaḅịa.”

²⁴Yei Tamụnọ, ị́ya ọmụḅaraiḅi mị ḅe ḅieḅẹlẹ nwẹngị mị nweni mgba anị ọrịmẹ, anị Tamụnọ ị̀ya amanyanaḅọ ḅe oria opu na nwẹngị oria fịafịa warị mị ḅie sọarị sịkị.

²⁵Nime chu apụma tọrọkọ damẹ, yefarị apụma ọḅụ damẹ, se eremeni ma inia ogbokuḅụ ọnwẹnẹ na kalagbụm na ḅụ sime kala akwa ma farịaḅẹ.

²⁶“Ọ́ Tamụnọ Ḅe boma oria tomonima koḅirima nyọ ḅụ; ọ́ Nyanaḅọ Ḅe boma ómine Jekọb furo ḅie awọ mamgba!”

²⁷Bẹnjamin, kọnjụ ḅe sẹ mị tatarị ḅomẹ, anịsịkị Juda ḅẹrẹtọn apụma na inia kpo mị na ini damẹ, Zẹbụlọnị na Naftalaị na ḅe-a tịḅịnịma ọḅụju ini ḍukomamẹ.

²⁸Ị́ya kụrọ ḍiepakụma, Yei Tamụnọ, mine gose ị́ nwẹngị kụrọ fịrị mị

²⁹Jerusalẹm ị́ya Oputẹkẹwarị mị ḅie, anị amanyanapụma ḅo ḍiepịrịaye se ị́ pịrịpịrị nyọ mị.

³⁰Ịganị Ijipt pịrị, ori nangwọ nangwọ osueinma ḅie sime owoi nama ḅe; ịganị sẹma pịrị, àrị owoi-a nambulo ogbo na arịa awọma na ọkịmun inimgba tịḅịtu pịkị ini seleḅa ma se ḅo ḍiepịrịaye agba mịẹ ị́ pịrị sịkị la. Owusọ ḅẹlẹma apụma galagalama!

³¹Ijipt ḅie ḅụ tịḅịnị ḅoḅịa; Sudan apụ ḅo tẹkẹḅụ ḅara dekichịẹma Tamụnọ Ḅe pịrịḅịa.

³²Ó nime chu Tamụnọ Ḅe boma, amanyanakiri mamgba, ó nime chu Nyanaḅọ Ḅe boma,

³³ó chu so ma ḅie nwẹngịarịḅọ ḅe pịrị, olomu ene ḅe-a so ma. Ómine oria oloku ekerearị opu pụkọ mị poki.

³⁴Ọ́ Tamụnọ Ḅe kụrọ mị ḍuko finjima; oria amanyanaḅọ opu mị ḍuko finjima Izrẹl mị saḅa koro, oria opu kụrọ mị so ma ḅie omi-ẹ.

³⁵Tamụnọ Ḅe ọ̀ ḅụgbiripuma pịkị ḅalafama ọkụ ḍiki, ori oria fịafịa tẹkẹwarị mị ḅie ḅoarị sịkị— Izrẹl Tamụnọ Ḅe! Ori ịnyọ na kụrọ na se oria tomonima pịrịmẹ. Ọ́ Tamụnọ Ḅe boma!