Read kirikeni Fịafịa Nime 69 Bible Online

Fịafịa Nime 69 - kirikeni bible

Fịafịa Nime 69

¹Ị̀ ḍụa, Yei Tamụnọ! Mengi mị anị iwoḅo ị̀ kọngọ lasam;

²Ọgbụdụ ḅie à ḍipi aḅẹ, kụrọ kiri pịkị ofori-ẹ; à pakaḅo gbun mengi lasam, ambura pịkị ị̀ ḅilema-ẹtọn aḅẹ.

³Ị̀ ḅụ ịnyọfasam ḅarachụa pịrịḅọ chịn olokuḅụ, ị̀ pụkọ sọ fụka aḅẹ. Ị̀ tọrụmgbọlụma giniginisam, ị́ya ḅarachụa mị koru ḅụ.

⁴Gbọrịye sọ ofori ḅụ taraka se ị̀ wẹrịma apụma, ini ḅakatẹịn ị̀ tịḅị inime ma nẹngịmẹ. Ị̀rị̀na-tarakapụma iruokọn ị̀ pụnụmamẹ, ini kụrọmẹ pịkị ị̀ ḅaa ḍọkịmẹ. Ini ị̀ mịẹmẹ furuka ḅụ à nyana ayema à nwọse ini pịrịmẹ.

⁵Ị̀ya sima ị́ tọrụkuḅu ḅọịkẹ, Yei Tamụnọ; àrị oḅoriḅọ sọ la-ọkụ ị́ nemimẹ.

⁶Ḅerenima à ḅụgerere ọkịḅo ị́ ḅereniapụma pịrị, Kụrọmamgba Nyanaḅọ, Ọmụtịḅịdaḅọ! Ḅerenima ị́ tẹkẹarịapụ ma tọrụsima ḅịaye ị̀ ḅụ ḅọrọmun ini la, Yei Izrẹl Tamụnọ!

⁷Ị́ tịḅị gose ini ị̀ wọlọmẹ, anịḅụ ḅụgerere gbitipuma ị̀ gbẹịnmẹ.

⁸Ị̀ya mịnapụma ḅie àrị igoniḅọ kịkẹmẹ, ị̀ furoḅie apụma ḅụ à jịn amaḅọ kịkẹmẹ.

⁹À nyana ị́ya Oputẹkẹwarị mị pịrị ḅẹlẹma, ị̀ ḅie fịnị kọrị ọkụ kọrịmẹ; ini se ị́ gbin àrị wọlọ ọkwẹịn ma ị̀ ḅụ mị àrị saraye-ẹ.

¹⁰Àrị ị̀ ḅụ iderima ḅurukụmamẹ, anịsọ tomoni pa ị̀ wọlọaḅẹ;

¹¹à ḍụẹịn ḍin aye ḅirimẹ, ini pịkị ị̀ ḍẹrịmẹ.

¹²Ateli ma ḅie ị̀ gboloma aye ini nwọ ḍukomẹ, iruḅu tọrụḅaa apụ pịkị ị̀ ḅụaye se nime chumẹ.

¹³Ị̀rị̀ ọkụma àrị ị́ tẹkẹḅịa, Nyanaḅọ; ị̀ pẹkẹrẹ, Tamụnọ, ị́ ḅụḅẹlẹ sịkị ḅụ. Ị̀ pẹkẹrẹ ị́ya opu ḅẹlẹma mị gose, anịatịḅị ị́ ḅereni ḍụaḅọrọma mị ị́ anị kokomẹ.

¹⁴Ọgbụdụ ḅie ḍipi mị ḅụ ị̀ ḍụaḅọrọma; ị̀rị̀na-tarakapụ ma ḅaraḅie ị̀ ḅọị, gbun tọrụ mị ḅie ị̀ ḍụaḅọrọma.

¹⁵Ḅerenima opumengi mị ḅo ị̀ gbẹịn; ḅerenima à ḍian ma ḅie simbifị anịkanịka àrị iḍupu ḅie sọfị.

¹⁶Ị̀ pẹkẹrẹ, Nyanaḅọ, ị́ya kunoka ḅẹlẹma mị ḅe opu ḅụ; ị́ya opu ḍikitịḅịfoin mị gose pịkịma ị̀ da!

¹⁷Ị́ ḅụ ḅọị ị́ya fịrịnwẹngịḅọ ḅe pịrịma; àrị opu ḅụfụkaḅie omi-ẹ, ị̀ pẹkẹrẹ mịọkụ!

¹⁸Ị̀ damaḅo se ị̀ ḍụa; ị̀rị̀na-tarakapụ ma ḅaraḅie ị̀ ḍụa.

¹⁹Ini ị̀ wọlọ laḅara ị́ nemimẹ, ini ị̀ ḅụgererema pịkị osi se ị̀ pịrịka ọkụ na; ị̀rị̀na-tarakapụ mamgba ị́ ini ọrịmẹ.

²⁰Wọlọ ị̀ kuḅie kansam, ị̀ kuḅie pịkị lọkọmẹ. À tọrụ se ị̀ eberịaḅịaḅọ ḍikimẹ, ọkụma gbọrịḅọsọ ofori-ẹ; à pịkị ị̀ kuḅie kụrọmaḅịaḅọ ḍọkịmẹ, ọkụma gbọrịḅọ sọnị àrị ọrịkẹ.

²¹Fịye ị̀ tarị sịkị, ini nweniḅa ḍiri se ị̀ pịrịmẹ; mengi ị̀ tarị sịkị, ini tụmgbakị iru se ị̀ pịrịmẹ.

²²Ye ini chụọ sara fịayema ini famaḅịaye sọ ini pịrị; ye inia osiḅụ sime alalị fịayema inia ḅịkị ọkịḅo ini pịrị.

²³Inia tọrụmgbọlụma pụnma! Inia konju ma mịẹ ịnyọ arịaḅụ fa!

²⁴Ị́ya opu ịganị se inia ọgọnọ sara, ye ị́ya ọfịrị-ịganị mị gbitipuma ini gbẹịn.

²⁵Ye inia ikowarịma ḅie gbọrịḅọ sọnị angaka ḅara ḅụ sime; ye inia ikowarịma ḅie ḍumo apụ simema.

²⁶Ị́ fomuḅara se pịrịsa apụma ini ḅụọse nwọ chụaḅẹ; ị́ ye se lama apụma, inia tọrụsiọrị ḅịpị anị ini ḅẹlẹma arịye-ẹ.

²⁷Inia si mamgba se ḍiri ḅie gịẹịn koroma; ḅereni ini pịrịma ini ị́ya ḍụaḅọrọma mị ḅụ pẹkẹrẹ nyana.

²⁸Ye ini ḍumo apụma ḍiri mị ḅie inia ẹrẹma wọlọmasin; ye ị́ya tomonima ẹrẹma sime ḍiri mị ḅie inia ẹrẹ pakaḅoma.

²⁹Ọkụma yeḅụ ọyị na kuḅie si ḅụ na àrị omi-ẹ; ị̀ dekichịẹma, Yei Tamụnọ, se ị̀ ḍụapakụmaḅo!

³⁰À nime se Tamụnọ Ḅe bomaḅịa; à mịẹḅaka se ọ̀ ḅe ḅụ oria opu mị ḍuko finjimaḅịa.

³¹Mịn mị Nyanaḅọ Ḅe ḅụḅẹlẹtẹịn nambulo se ḍiepịrịaye agbamịẹ ọ̀ pịrị mị nẹngịmẹ; mị ọ̀ ḅụḅẹlẹtẹịn ḍụḅa kpọsa opu nambulo se agbamịẹ ọ̀ pịrị mị nẹngịmẹ.

³²Ini pụndarịapụ ma mịn mị ọrịḅịa sịkị, inia ḅieḅẹlẹḅịa; Tamụnọ Ḅe tẹkẹarịapụ ma inia kuḅie kụrọḅịa.

³³Tamụnọ Ḅe, mịẹḅịa ọkụ oforiapụ ma ori ini poki pokimẹ, ọ̀ pịkị ikoli ḅie sime oria tomonima se ḅieḅaramakẹ.

³⁴Ọ́ Tamụnọ Ḅe boma, Yei so na kiri na, tọrụ ma na pịkị arịa ḅie sime aye mamgba na.

³⁵Ò Jerusalẹm mị ḍụaḅịa ọ̀ pịkị kpoto Juda amama namaḅịa. Oria tomonima anịnyọ ini angaḅịa; ini pịkị ama mị nyana ọkịḅịa,

³⁶oria fịrịnwẹngịapụma furo ḅie pakaḅo apụma anị nyanaḅịa, ọ́ ḅẹlẹma apụma pịkị anịnyọ ḅụ angaḅịa.