Read kirikeni Fịafịa Nime 71 Bible Online

Fịafịa Nime 71 - kirikeni bible

Fịafịa Nime 71

¹Nyanaḅọ, à ḅo ị́ ḅara ịnyasọ-ẹḅomẹ; ngịsị ḅerenima ini ị̀ nẹngịma!

²Anịatịḅị ị́rị́ karakaraye mịẹmịẹḅọ-ẹ, ḅarachụa ị̀ pịrị se ị̀ ḍụapakụmaḅo. Ị̀ poki se ị̀ ḍụa!

³Ị̀ ḍụaḅọrọma, tịḅịkikima nyọ nwọ sọ ị̀ pịrị, pịkị owuni kụrọwarị na sọ se ị̀ ḅọị; ị́rị́ ị̀ya ḅọị nyọ-ẹ, pịkị owusọ ị̀ pịrịarịḅọ-ẹ.

⁴Ị̀ Tamụnọ, sitịḅịnyana apụ ḅaraḅie, siye se jịn apụ mịẹ ḅẹlẹma apụ kụrọ ḅie na, siapụ ḅaraḅie na ị̀ ḍụa.

⁵Opu kụrọ Nyanaḅọ, à kuḅie se ị́ ḅụ gbanamẹ; kalatọkụ ḅụ à sime sịkị ngịsị à kuḅie se ị́ ḅụ gbanamẹ.

⁶Àrị ị́ ḅụ sẹrẹrẹmẹ ị̀ya ḍumo ene mamgba ḅie; ini ị̀ yi ene ngịsị ị́ sakị ị̀ kpamẹ. Sịkịmamgba àrị ị́ bomaḅịa.

⁷Ị̀ ḍumo mị, anị elekima sọ tọn apụ pịrịmẹ, anịatịḅị ị́ kụrọ agbọ sọ ị̀ pịrịmẹ.

⁸Ene mamgba àrị ị́ boma pịkị ị́ya boma mị ḍukopakụmamẹ.

⁹Mịọkụ, àrị olomu saye gose ị̀ sịkịma; ị̀ sarakoromama, mịọkụ ị̀ ḅụ ịmgbema lọkọsa sịkị.

¹⁰Ị̀rị̀na-taraka apụma ini ị̀ ḅaa ḍọkịmẹ; ini ọkwẹịn se ḅẹrẹḅia ị̀ pịrịmẹ.

¹¹Ini nwọ ḅẹmẹ, “Tamụnọ Ḅe ori ọ̀ sarakoromasam; ó ye wa ò ḍuko mun ò kun; ọ̀ ḍụaḅịaḅọ ofori-ẹ.”

¹²Opuma sikimama, Yei Tamụnọ; ị̀ Tamụnọ, jua ḅo ḅarachụa ị̀ pịrị!

¹³Ye ị̀ dapakarịapụ ma ọmụ inia ḅara si se ini fịkọsị. Ye yese ị̀ lama ḍọkịarịapụ ma inia ḅụgererema.

¹⁴Sịkịmamgba àrị ị̀ kuḅie se ị́ ḅụgbanaḅịa; àrị ị́ bomatẹịnma munḅịa.

¹⁵Àrị ị́ya iḅimịẹmịẹaye ma ḍukoḅịa; ene mamgba àrị ị́ya ḍụaḅọrọma mị ḍukoḅịa, àrị ḅakatẹịn à àrị kaịnḅoḅara mị nẹngịmẹ nwọḅẹ sọnị.

¹⁶Nyanaḅọ Tamụnọ Ḅe ịnyọ mị ḅụ à nwẹngịma munḅịa; àrị ị́ya iḅimịẹmịẹye mị ḍukopakụmaḅịa, ị́yaye mị kẹngẹ-ẹ.

¹⁷Ị́ yese ị̀ ḍiemẹ kalatọkụ ḅụ à sime sịkị ngịsị, à pịkị pa ị́ mịẹ ḅụgbiripumaye ma ḍukoaḅẹ.

¹⁸Mịọkụ àrị olomu se iḅulu chụa pịkị ị̀ tịḅị ḅịasam ḅẹsọnị, ị̀ sarakoromama, Yei Tamụnọ! Ị̀rị̀na-sime à nwọ ị́ya kụrọ na opu na ḍukopakụma ḅoḅịa ḅụọ-ḅụọ mamgba pịrị àrị sịkịḅụ.

¹⁹Ị́ya karakara mịẹmịẹye mị, Yei Tamụnọ, so ma lamẹ, ị́ opuaye mịẹsam; ị́ sime ọkụ simeḅọ ofori-ẹ.

²⁰Ị́ ḅụfụka na tọrụsiọrị na se ị̀ sẹịnmamẹ, ọkụma ị́ ịnyọ se ị̀ pịrịḅịa; iḍupu mị ḅụ, ị́ ị̀ sikimaḅịa.

²¹Ị́ ị̀ mịẹse àrị opusọtẹịn gbasoḅịa; ị́ pịkị ị̀ kuḅie kụrọmaḅịa.

²²Àrị ị́ ḅụḅẹlẹḅaraḅụ ọbọ se ị́ bomaḅịa; àrị ị́ya kụrọ ḅereni mị bomaḅịa, ị̀ Tamụnọ. Àrị ị̀ya ọbọ mị se nime chu ị́ pịrịḅịa, Izrẹl Fịafịa Ḅọ.

²³À ḅieḅẹlẹḅụ olokuḅịa à nwọ farị ị́ pịrịarị sịkị; ị̀ya ịnyọ mgba à nwọ se chuḅịa anịatịḅị ị́ ḍụamẹ.

²⁴Ene mị mgba àrị ị́ya karakara mịẹmịẹye mị ḍukoḅịa, anịatịḅị yese ị̀ lama ḍọkịarịapụ ma ini ini nẹngịmasam iniaḅụ pịkị gereresam.