Read kirikeni Fịafịa Nime 72 Bible Online

Fịafịa Nime 72 - kirikeni bible

Fịafịa Nime 72

¹Ị́ya karakara mịẹmịẹye ḅụ, amanyanaḅọ ḅe ḅẹrẹkọnḅịa ọkụ nwọse ò ḍie, Yei Tamụnọ; ị́ya ḅẹrẹkọn ḅara mị se ori na ḍia,

²mịẹsosịkị ọ̀ karakaraye ḅụ ḅẹrẹtọn ị́ya tomonima pịrịḅịa ọkụ, se ini pụndarịapụ ma ọ̀ pịkị karakara ḅara nwọse ini ḍikiḍikiḅịa ọkụ.

³Ye ama mị ye-anị-na lọkọlọkọḅụ tọrụḅẹlẹ nyana; ye ini karakaraye mịẹmịẹḅara mị nemi.

⁴Ye amanyanaḅọ ḅe iḅi ḅẹrẹkọn igwein apụma pịrị; ye ọ̀ ḅarachụa mịẹḅịa-ọkụ oforiapụ ma pịrị se ini pụndarịapụ ma nẹngịma.

⁵Ye ị́ya tomonima ị́ tẹkẹ ịrụa mị nwọ ḅịarị sịkị goyegoye, akalụ mị pịkị ḅịa lasịkị lasịkị ọkịmun ḅụọḅụọ la.

⁶Ye amanyanaḅọ ḅe ene kịkẹ ḅara se ozuma ḅie sime, anị nwẹnẹ nwẹnẹ ene kiri ọgọnọ sara ọkụ.

⁷Ye karakara mịẹmịẹye ama mị ḅie ḅein oria ḍumo sịkịḅụ, lọkọlọkọ na dein na pịkị ama mị ḅie sime akalụ mị ḅịarị sịkịmamgba.

⁸Oria amanyanakiri mị tọrụ saḅa mun tọrụ laḅịa, Yufretis tọrụ mị ḅụ ọkịmun sẹkiri mị ḅie kuluma nyọma la.

⁹Onwun ele ḅie apụma ọ̀ tọrọkọ tịḅịtuḅịa; ori-na-tarakapụ iniaḅụma se chama kirigbinḅịa.

¹⁰Spen na chọ ma ḅie amanyanapụma na ḍiepịrịaye se ḅo ọ̀ pịrịḅịa; Shiba na Siba na ḅe amanyanapụma ḍiepịrịaye ọkịḅo ọ̀ pịrịḅịa.

¹¹Amanyanapụ mamgba ọ̀ tọrọkọ tịḅịtuḅịa; sẹ sẹ mamgba fịrịnwẹngị ọ̀ pịrịḅịa.

¹²Ọ̀ chịn oloku igwein apụma ori ini ḍụamẹ, pịkị mịẹḅịa ọkụ ofori apụma na, ini sịkị apụma na sọnị.

¹³Ịnyọ ḅụ oforika apụma na igwein apụma na, ori ini ḍikitịḅịfoinmẹ; ye ḅụ ḅalaḅalama apụma ori inia ḍumo ma ḍụamẹ.

¹⁴Pụnda na kụrọkụrọ-amịẹmịẹaye na ḅie ori ini ḍụamẹ; inia ḍumo ọ̀ ḅụ yelamẹ.

¹⁵Amanyanaḅọ, ḍumo ḅọlọ-a ḍin la! Ye ini Arebia ḅụ ḅo goli se ọ̀ pịrị; ye ini sịkịmamgba ọ̀ tịḅị gose tẹkẹ; ye Tamụnọ Ḅe ḅẹlẹma sịkịmamgba ọ̀ ḅụgbana!

¹⁶Ye mgbọlụ-a fịaye ama ḅie ḅaka; ye fịaye chịngịma gbẹịn kelema, Lẹbanọn ḅie chịnmgbọlụma ḅara mị. Ye tomoni opuamama ḅie ḅein, anị osuein ozu ḅie ḅaka ọkụ mị.

¹⁷Ye ini ngịsị amanyanaḅọ ḅe ẹrẹ mị se ḅieḅaramama; ye oria opu mị ịrụa mị ḅọlọ la-ọkụ la. Ye sẹ sẹ mamgba Tamụnọ Ḅe na ori ini ḅẹlẹma, ori amanyanaḅọ ḅe ḅẹlẹma ḅara.

¹⁸Ọ́ Nyanaḅọ Ḅe boma, Izrẹl Tamụnọ Ḅe! Ori ngẹrị ngẹrị anị mà ḅụgbiripumaye ma mịẹye-ẹ.

¹⁹Ómine oria boma nyana ẹrẹ mị boma gbaso! Ye oria boma mị bebe tomonikiri ḅie mgba ḅein. Amẹn! Amẹn!

²⁰Jẹsi ya Devid ḅe mịanga anị oria tẹkẹma kulumaye-ẹ.