Read kirikeni Fịafịa Nime 74 Bible Online

Fịafịa Nime 74 - kirikeni bible

Fịafịa Nime 74

¹Cheye gose ị́ mịn ḅarase wa sarakoroma, Yei Tamụnọ? Ị́ya ịganị, ị́ya tomonima ọgọnọ sime gbasoḅe?

²Ị́ya tomonima se ḅiekoroma, anị ḅọlọsa sịkị ngịsị ị́ sẹlẹ ọkịsa apụma, omoniapụ sọ sime se ị́ pọkọpakụmaḅo se ị́ ḅarakuḅu sẹ mịẹapụ ma. Zaịyọn Tụndụ mị se ḅiekoroma, anị gbọrị sịkị ị́ anga nyọ mị.

³Mà ini kansarasa nyọma ḅie nwẹngị ḅọrọ; mine na taraka apụma, Oputẹkẹwarị mị ḅie simeye goyegoye ini sima famasam.

⁴Ị́rị́na-tarakapụ ma, ị́ya Oputẹkẹwarị mị ḅụ ini ọmụḅaraiḅi ḅieḅẹlẹ oloku kọnsam; ini inia ịkpata ma se anị nyọ kpọsam, se ḍiepakụma na ọmụ inia ḅara iḅimẹ.

⁵Chịnpẹlẹ apụ sime ọkụ anị ini sime ọkụ-ẹ, inia apala ma se ejema pẹlẹ gbin aḅẹ.

⁶Warị ma ḅụ odochụa ḍụpọ-a pẹkẹrẹ mamgba ini inia apala ma na, opu ikulele amana ma na nwọse àrị fomu kanmẹ.

⁷Ini ị́ya Oputẹkẹwarị mị sumagbin se fịnị se anịaḅụ chụamẹ; wa ị́ tẹkẹtẹkẹ nyọ mị ini pụlamasam.

⁸Ini ḅimẹ ini gbọtụma wa ḅaafama; ama mị ḅie osi nyana nyọ goyegoye ini dọkịma kiripịrịmẹ.

⁹Wa osi nyana pịrị elekima mamgba fasam; ịkịankoro apụ ḅụ kọnḅọ ḅarị ofori-ẹ, mịn mị sime mun laḅịa sịkị gbọrịḅọ sọnị pịkị nemikẹ.

¹⁰Yei Tamụnọ, mine-na-tarakapụ ma ị́ ḍẹrị mun nde sịkị laḅe? Ini ị́ya ẹrẹ mị wọlọ gbasoḅe?

¹¹Cheye gose ị́ ḅarachụa wa pịrị ḍụkụka? Cheye gose ị́ ị́ ḅarama se ị́ya ọḅụju koroma-ao?

¹²Ọkụma sakị sịkị ngịsị ị́rị́ mịna amanyanaḅọ-ẹ, Yei Tamụnọ; tọntọn-a sịkị ị́ nwọse wa ḍụasam.

¹³Ị́ya opu kụrọḅụ ị́ tọrụ mị pumẹ, ị́ pịkị tọrụ mị ḅie sime opu ḅalafama namama tịḅị ma kọsịmamẹ;

¹⁴ị́rị́ Leviatan sọnọma tịḅịnyana wu ḅe tịḅị ma kọsịmamẹ, se oria oju mịnị mị se piri ele ḅie-a namama pịrị pẹịmẹ.

¹⁵Ị́rị́ kiri chuku ḅie mengi ma mịẹ pakụmamẹ, se mengi ḅo iderimẹ; ị́rị́ opu-a tọrụ ma mịẹ samịnamamẹ.

¹⁶Ị́rị́ ḍin mị na enekaka mị na tẹmẹmẹ; ị́rị́ ịrụa mị na akalụ mị na se arịa kiri ḅụ koromamẹ;

¹⁷ị́rị́ sẹkiri mị simeḅịa nyọ tọn koromamẹ; ị́rị́ otoku sịkị na fọngụ sịkị na mịẹmẹ.

¹⁸Ọkụma se ḅiekoroma, Yei Nyanaḅọ, na ị́rị́na-tarakapụ ma ini ị́ ḍẹrịaḅẹ, anị fiemẹ na ini Tamụnọ nemikẹ, ini pịkị ị́ ḍikisimamẹ.

¹⁹Ị́ya tomoni, ḅarachụa pịrịḅọ nyanaka apụma, sarakoroma akụ tẹmẹ nyana inina-tarakapụma pịrịma; ị́ya tomoni ini ḅụfụka se pịrịarịapụ ma se ḅieḅaramama!

²⁰Wa ị́rị́na-fị ọḅọkụ mị se ḅiekoroma. Kụrọkụrọ-amịẹmịẹaye ama mị ḅie pịkị kanakana ịkọlị mamgba ḅụ omi-ẹ.

²¹Ḅerenima ini pụndarịapụ ma ḅụgerere ḅie sọ; ye igwein apụma na, mịẹḅịa-ọkụ ofori apụma na ị́ boma.

²²Ị́ ḅụ jike sịsẹma, Tamụnọ, se owusọ ị́ya karakara mị pịrị! Ḅiekoroma na oru nemika apụ ene mamgba ị́ ḍẹrịaḅẹ.

²³Ị́rị́na-tarakapụ ma kọn àrị ịganị oloku ma se ḅieḅaramama, anị ị́rị́na-tarakapụ ma ḅe nyọ fiema mị, sịkịmamgba.