Read kirikeni Fịafịa Nime 78 Bible Online

Fịafịa Nime 78 - kirikeni bible

Fịafịa Nime 78

¹Ị̀ya tomoni, à se ó telimarịye mị ọ́ nwọ poki, ọ́ pịkị tọrụkweinma à ḍukoarịye mị pịrị.

²À mun yenemi ọkwẹịn kọn-o mun aḅẹ, à pịkị ḅọrọsa gbun aye ḍuko finjiḅịa,

³wa naa pịkị nemisa aye, anị mịna ḍapụma ḍuko wa pịrị ayema.

⁴Wa àrị se mịna awọmẹnịma ḅọịma ẹkẹ; wa ḍuko ḅoḅịa ḅụọ mị pịrịḅịa, Nyanaḅọ Ḅe kụrọ mị na ọ̀ nwẹngị-a opu-a fịrịma na gbakịmaye, ọ̀ pịkị mịẹ ḅụgbiripuma ayema na.

⁵Ori oloko chụa Izrẹlapụma pịrịmẹ, ọ̀ pịkị mịẹgbẹịn aye tọn Jekọb furo ḅie awọma pịrịmẹ. Ọ̀ tọn mịna ḅieju-aḍapụma pịrịmẹ na ini oria olokoma se inia awọma telima,

⁶mịẹsosịkị ḅoḅịa ḅụọma sọ àrị ḍawọḅịa ọkụ, ini sọnị pịkị ḍuko inia awọma pịrịḅịa.

⁷Mịn ḅaraḅụ ini sọnị pịkị inia kuḅie se Tamụnọ Ḅe ḅụ gbanaḅịa, se ọ̀ mịẹsaye ma se ḅieḅarama ẹkẹ, ọkụma sịkịmamgba ọ̀ tọn ini pịrịayema kokoḅịa.

⁸Ini inia ḅieju-aḍapụma sime ọkụ sime ẹkẹ, anị tịḅịḅie kụrọ se ḅịpịpokika apụma, ini anị ngịsị kụrọma kuḅie se Tamụnọ Ḅe ḅụgbanaka apụ ma-ẹ, ini pịkị ọ̀ ḅụ ḅereni nyanakẹ.

⁹Ifrem apụma, lubu na ḍẹịn na ini nwọ ọlọmẹ, ọmụgbin ene mị ḅụ ini mangị somẹ.

¹⁰Ini Tamụnọ Ḅe na fị ọḅọkụ mị ini kokokẹ; oria olokoma sọ ini koko ḍụkụkẹ.

¹¹Ọ̀ mịẹsaye ma inia ḅieḅaramẹ, ọ̀ mịẹse ini ọrị ḅụgbiripuma ayema

¹²Tamụnọ Ḅe mịẹ ḅụgbiripuma ayema ọrị ḅieju-aḍapụma anị Zoan ḅele nyọ ḅụ Ijipt ama ḅie.

¹³Ori opu tọrụ mị se mama pẹkẹrẹ pumẹ, se ini seni anịa ḅie toluḅọrọmẹ; ọ̀ mịẹmẹ mengi ma warị agbagba chịẹ ọkụ chịẹmẹ.

¹⁴Enekakaḅụ ò soḅuno se ini pamunmẹ, anịsịkị ḍin goyegoye ḅụ fịnịḅẹlẹ-ẹ.

¹⁵Piri ele mị ḅie ọ̀ ḍụparị pufinjimẹ, se gbun nyọ mị ḅie ò mengi se ini pịrịmẹ.

¹⁶Ọ̀ mịẹmẹ ḍụparị ḅie mengi pakaḅomẹ, se anị opu mengi ideri ọkụ iderimẹ.

¹⁷Ọkụma ini pa Tamụnọ Ḅe ḅụ simịẹaḅẹ, piri ele ḅie ini pịkị kụrọtịḅị ḅie chụa Geletẹịnḅọ Ḅe pịrịmẹ.

¹⁸Ini jokoma nemima Tamụnọ Ḅe ḍaḍikimẹ anị ini inia ḅụḅẹlẹ fịaye ḅiarị sịkị.

¹⁹Ini tụḅụrụma ọkwẹịn Tamụnọ Ḅe pịrị se nwọ ḅẹmẹ, “Tamụnọ Ḅe ineda mị piri ele mị ḅie fịaye pakụmaḅo ḅe?

²⁰Karakaraye-ẹ ọ̀ ḍụparị mị gbolo se mengi anịa ḅie paka kụrọma iderimẹ; ọkụma ori ineda pịkị fịye se wa pịrị pịkị ineda nama se oria tomonima pịrịḅe?”

²¹Anịẹrẹchị Nyanaḅọ Ḅe inia ọkwẹịn ma naa sịkị ori ịganịmẹ; se fịnị ọ̀ nwọse owu se oria tomonima pakamẹ, ọ̀ nyana ini pịrị ịganị mị owoimẹ,

²²anịatịḅị ini ọ̀ ḅụ ḅereni nyanakẹ, ori ini ḍụaḅịa ḅẹ ye mị ini pịkị ḅereni ọkịkẹ.

²³Ọkụma ori ọkwẹịn ọgọnọju so mị pịrị, se tọn anị pịrịmẹ na anị anịa ḅọkọ ma finji;

²⁴so ma ḅie ọ̀ wẹrị fịayemgbọlụ se ini pịrịmẹ, anị mana se ini pịrị ini fị mị ḅụ.

²⁵Anị ḅụ ini enjẹlapụ fịye fịmẹ, Tamụnọ Ḅe pịkị ini ḅiaye mamgba seni ini pịrịmẹ.

²⁶Ọ̀ mịẹse ịrụapakapaka nyọ ḅụ fọrụ fiemẹ, ọ̀ pịkị oria kụrọ ḅụ chuku fọrụ mị jike pakụmamẹ;

²⁷ò feni se oria tomonima sẹịnmamẹ, tọrụ aka ḅụ onwun ḅaka ọkụ ḅaka feni;

²⁸àrị sokoro-sokoro inia ogboku ini pike sime nyọḅụ koro bebe akpụrụ ikowarị mamgba kelemamẹ.

²⁹Anị ḅụ tomonima yefị inia ḅụlọ ḅeinmamẹ; Tamụnọ Ḅe ini ḅiaye ma se ini pịrịmẹ.

³⁰Ọkụma anị ini na deinkorokẹ, ini anịkanịka ḅaraḅụ ḅiarịaye ma gose, ini yefịaḅẹ nwọḅẹ sọnị,

³¹Tamụnọ Ḅe ḅo ịganị nyana ini pịrị sịkị ori inia ḅie kụrọtẹịn owuapụma ḅaamẹ, Izrẹl mị ḅie iḅitẹịn asẹmẹnịma.

³²Anịẹḅẹ sọnị tomonima ini pa si mịẹ-aḅẹ; ọ̀ ḅụgbiripuma gbun aye nwọ mịẹ aḅẹ nwọḅẹ sọnị ini ò ḅerenikẹ.

³³Anịẹrẹchị ịnyọ sara kuluma ọkụ ọ̀ nwọse inia ḍin ma kulumamẹ, siaye pịkị iniaḅụ pakamẹ ḅụ nemika ḅaraḅụ.

³⁴Ori inia ḅie nweni ḅaasịkị ḅaasịkị, kirikọn apụma tọrụ pịkị ọ̀ damẹ; ini siḅụ pịkị se inia ịnyọ laḅara se ọ̀ tẹkẹmẹ.

³⁵Inia ḅiekoromamẹ na Tamụnọ Ḅe inia ḅọịnyọ-ẹ, Kụrọmamgba Nyanaḅọ Ḅe ò ḅo ḅarachụa ini pịrịpịrịmẹ.

³⁶Ọkụma inia ọkwẹịn mamgba iruo aye-ẹ; ini ḍuko gbọrị karakaraye sọ ofori-ẹ.

³⁷Ini kụrọma nyana ḅereni ọ̀ pịrịkẹ; ini ori-na-fị ọḅọkụ mị ini kokokẹ.

³⁸Ọkụma Tamụnọ Ḅe ò ḍikiḅụgerere nyana oria tomonima pịrịmẹ. Inia sima ḅụ ọ̀ ḅarasin ini pịrịmẹ, ọ̀ pịkị ini ḅaafamakẹ. Tọntọn a sịkị ḅụ ori oria ịganị mị ọlọchịẹmamẹ, pịkị oria opu ịganị dachịẹmamẹ.

³⁹Ò se ḅiekoromamẹ na ini ma anị papa ojuakpakpa chụa se fịḅịa apụ-ẹ anị fọrụ fie se ḅọrọ so-ọkụ simemẹ.

⁴⁰Piri ele mị ḅie sịkịna sịkịna ḅụ ini kụrọtịḅịḅie chụa ọ̀ pịrịmẹ; ini tọntọn-a sịkị se ò kuḅie simaye mịẹmẹ.

⁴¹Imbikia-imbikiama ini Tamụnọ Ḅe ḍaḍikimẹ, se Fịafịa Izrẹl Tamụnọ Ḅe ḅụosọye nwọ mịẹmẹ.

⁴²Ini oria opu kụrọ mị se ḅieḅaramamẹ, ọ̀ pịkị inina-tarakapụma ḅaraḅie ini ḍụa ene mị na,

⁴³pịkị ọ̀ mịẹ opuaye ma na, ḅụgbiripuma gbun ayema na, Ijipt ama mị ḅie Zoan ḅele nyọ mị ḅụ.

⁴⁴Ọ̀ tọrụ ma ḅe mengi ma pịkị tomoni oju pulo mịẹmẹ, se Ijipt apụma ḅarị ḅuḅịa mengi nyanakẹ.

⁴⁵Ori ọmụmụ se inia ogboku sẹịn se inia ḅụḅalaḅalamamẹ, ọ̀ pịkị ngụ se sẹịnmẹ se inia ama mị ḅụrụmamẹ.

⁴⁶Ori igurube fịrịma ini ḍipi ayema fị pịkị ozuma ḅaamẹ.

⁴⁷Opu kụrọ ene mgbọlụ ọ̀ nwọse inia tụmgbakị elelenda ozuma ḅaamẹ, ọ̀ pịkị opu oḅoku se figi ejema ḅaamẹ.

⁴⁸Inia nambuloma na, ikpoki nambuloma na, ike-nambuloma na, opu ene mgbọlụ ọ̀ nwọ koroma àrị ḅaamẹ, se soalagba nwọse oḅorima na ananama na ísí-a namama na ḅaamẹ.

⁴⁹Ori ini mịẹse ini opu tọrụsiọrị ḅie sọmẹ, anị oria ịganị na oria ḅalafama ịganị na ọsụn iniaḅụ sara ḅụ, anị tomoni ḅaa oku ḅoapụ ọkụ simemẹ.

⁵⁰Oria ịganị ọ̀ dachịẹmakẹ anịkanịka inia ḍumo ma wẹrịso ini pịrị, ọkụma ori amanwẹngị obi se ini ḅaamẹ.

⁵¹Ijipt ḅie furo furoma yi tatarị owuapụ awọ mamgba ọ̀ ḅaamẹ.

⁵²Anịsịkị ori anana ḍikiḍikiḅọ ḅara se oria tomonima toluma pakụmamẹ, pịkị piri ele mị ḅie ini kpa toluma ḅọrọmamẹ.

⁵³Ò deinma ini pamunmẹ, inia ḅala pịkị fakẹ; ọkụma opu tọrụ mị anị imbibile ḅo gbitipuma inina-tarakapụma gbẹịnmẹ.

⁵⁴Ori ini ọkịḅo oria fịafịa ama mị lamẹ, anị ori ḅara na inuma tụndụma.

⁵⁵Ori ama mị nyana apụma depakụmamẹ, oria tomonima sọmun-arị sịkịḅụ; inia ama mị ori anị ḍiama se Izrẹl sẹma pịrịmẹ, pịkị inia warịma se oria tomonima pịrịmẹ.

⁵⁶Ọkụma ini kụrọtịḅịḅie chụa Kụrọmamgba Nyana Tamụnọ Ḅe pịrịmẹ, se ọ̀ ḍaḍikimẹ. Oria olokoma ini kokokẹ,

⁵⁷ọkụma ini inia ḍa-apụ ma kụrọtịḅịḅie chụa pịkị nyana ḅerenika ọkụ se nyana ḅereni ọ̀ pịrịkẹ, kuḅie se ḅụgbanaḅịa ọkụ oforika ḍẹịn sime ọkụ simemẹ.

⁵⁸Ini inia oru tẹkẹ-a nyọma se ori ịganịmamẹ, ini ḅara se tẹmẹ oru ma gose ori opuma ịganịmẹ.

⁵⁹Tamụnọ Ḅe ori ịganịmẹ ori anị ọrị sịkị, anịẹrẹchị ọ̀ gbọtụma oria tomonima sịkịmẹ.

⁶⁰Shịlo ḅie oria ikowarị mị ọ̀ sarakoromamẹ, anị ọ̀ mịna ogboku sime se anga ama mị.

⁶¹Ò ḅereni mine-na-tarakapụ ma pịrịmẹ ini kụrọḅara se Ọḅọkụ Igbe mị ọkịsomẹ, anị oria kụrọ na boma ḅe elekima mị sime Ọḅọkụ Igbe mị.

⁶²Ori ịganị ọ̀ ḅarana nyana tomonima pịrịmẹ, pịkị mịẹse inina-tarakapụma ini ḅaamẹ.

⁶³Asẹmẹnịma ọmụ ḅie ini ini ḅaamẹ, iremenima ḅarị ini simeḅịapụ nyanakẹ.

⁶⁴Agbamịẹapụma ini kụrọ fị kọnmẹ, se inia erema ini ḅereni ini pịrịkẹ ini ḍụẹịn ḍin.

⁶⁵Anịḅe kuluma Nyanaḅọ Ḅe ọ̀ sịsẹmẹ mọnọ simeḅọ sịsẹ ọkụ; kụrọḅọ iruḅu se ye mịẹ ọkụ nwọ kịkẹmẹ.

⁶⁶Ori ori-na-tarakapụ ma depịkịmẹ, se iniaḅụ kuluma nyanaka ọmụḅaraiḅi nyanamẹ, se ḅụgererema ọmụḅarasi ini nwọ nyanamẹ.

⁶⁷Ọkụma ò Josẹf furoḅie apụma sịkịmẹ; Ifrem sẹ mị ọ̀ sẹlẹ ọkịkẹ.

⁶⁸Anịnakaraka ò Juda sẹ mị sẹlẹ ọkịmẹ, pịkị ori iḅiọkụma ḅẹlẹma Zaịyọn Tụndụ mị na.

⁶⁹Anịanga ori oria Oputẹkẹwarị mị namamẹ, soḅie oria warị mị sime ọkụ; sẹkiri mị chịẹ kụrọ ọkụ anị anị chịẹ kụrọ ọkụ-ẹ, anị simegbasoḅịa.

⁷⁰Ori oria fịrịnwẹngịḅọ Devid ḅe sẹlẹ ọkịmẹ; nama fịfị ịnyanya ma ḅieḅụ ori ori ọkịmẹ,

⁷¹ori oria anana ogbo mị ḍikiḍiki sime nyọ ḅụ, se ò se Izrẹl amanyanaḅọ mịẹmẹ, anị anana ḍikiḍikiḅọ ḅara se Tamụnọ-a tomonima ḍikiḍikiḅịaḅọ.

⁷²Devid ḅe yekịẹnka ḅara ọ̀ nwọse tọrụ se iniaḅụ wẹrịmẹ, pịkị yenemi ḅara se ini datekeremamẹ.