Read kirikeni Fịafịa Nime 80 Bible Online

Fịafịa Nime 80 - kirikeni bible

Fịafịa Nime 80

¹Wa poki, Yei Anana ḍikiḍikiḅọ ḅara se Izrẹl mị ḍikiḍikiarịḅọ; wa naa, ị́ya anana ogbo mị pamun-arịḅọ. Ị́ya emine ọgọnọ ị́ simemẹ, ḍumo nyana se pamba chụaye ma ọgọnọju ḅụ,

²ị́ ḅụḍiepakụma Ifrem sẹ mị na, Bẹnjamin sẹ mị na, pịkị Manasẹ sẹ mị na pịrị. Ị́ya kụrọ mị se wa ḍie; ḅo wa ḍụa!

³Wa pịkịmaḅo, Yei Tamụnọ! Ị́ya ḍikiḅụgerere mị se wa ḍie, se wa ḍụaḅọrọma nyanaḅịa!

⁴Nyanaḅọ Tamụnọ, Kụrọmamgba Nyanaḅọ, ị́ ịganị ị́ya tomoni ma tẹkẹma pịrị mun nde sịkị laḅe?

⁵Ngịrị ị́ nwọse fịye mịẹ wa pịrị fịsam, pịkị owu-a mengi ḅie ḅein opu ọmọngọ na se wa pịrịmẹ wa ḅu-ẹ.

⁶Ị́ ḅereni mine kelema sẹma pịrịmẹ, ini mịna kirima gose mine na owusọ-ẹ; mine-na-tarakapụ ma wa wọlọmẹ.

⁷Mine se pịkịmaḅo, Kụrọmamgba Nyana Tamụnọ! Ị́ya ḍikiḅụgerere mị se wa ḍie, se wa ḍụaḅọrọma nyanaḅịa!

⁸Ijipt ḅie ị́ tụmgbakị elelenda chịn ọkị pakụmaḅomẹ; ị́ jịn a sẹma depakụmamẹ se anị se inia kiri ḅụ ḍipimẹ.

⁹Anị sopakaḅịa nyọ ị́ nwọ tẹlịma anị pịrịmẹ; anịa kuno ma kiriḅie sọmun se àrị finjima kiri mị mgba kelemamẹ.

¹⁰Anị tịḅịkikimaye sọ chịngịma pịrịmẹ; anịa ịkpangị ma àrị finjima gololo awụ chịn ma gbẹịnmẹ.

¹¹Anị anịa ịkpangị ma finjima mun Mẹditirenia Tọrụ mị lamẹ, pịkị ọkịmun Yufretis Tọrụ mị na lamẹ.

¹²Nde ị́ gose anị kelema onu mị kan koromaye? Mịọkụ anịanga sịkị ḅọrọḅọ goyegoye ineda anị chụa tụmgbakị elelenda ma furuḅịa;

¹³piri oporopo anị nanga kiri pịrịmẹ, pịkị piri nama anịa ḅụ ye kọn fịaḅẹ.

¹⁴Tọrụ pịkị wa da Kụrọmamgba Nyana Tamụnọ! Soḅie wẹrị tu wa ḍiki; ḅo ị́ya tomonima ḍụa!

¹⁵Ḅo mị ị́ ḍipi tụmgbakị elelenda ozu mị ḍụa, mị anịa kalasịkịḅụ ị́ mịẹ sẹnịma se ḅo opuma kụrọye sọye mị!

¹⁶Mine-na-tarakapụ ma ini fịnị se anịaḅụ chụa se anị pẹlẹgbinsam; ịganị tọrụ se ini ḍiki se ini ḅaasin!

¹⁷Ḅalafama aye ḅie ini ḍụa, ị́ sẹlẹ ọkịsa apụma ini ḅọị, anị ị́rị́ ḅarana mịẹ kụrọma sẹ mị.

¹⁸Wa ḅarị ngịsị ị́ ḅụ pịkịma soẹkẹ; mịẹ wa ḍumo, se wa ị́ bomaḅịa.

¹⁹Wa ọkị pịkịmaḅo, Nyanaḅọ Tamụnọ, Kụrọmamgba Nyanaḅọ. Ị́ya ḍikiḅụgerere mị se wa ḍie, anịsịkị wa ḍụaḅọrọma nyanaḅịa.