Read kirikeni Fịafịa Nime 85 Bible Online

Fịafịa Nime 85 - kirikeni bible

Fịafịa Nime 85

¹Nyanaḅọ, ị́ ḍikiḅụgerere nyana ị́ya ama mị pịrịsam; Izrẹl mị ị́ anị mịẹse ye pịkị anị na tọrọkọ tọrọkọ munmẹ.

²Ị́ya tomonima inia sima ḅụ ị́ ḅarasin ini pịrịsam ini mịẹirima aye mamgba ị́ pịkị ḍikitọrụsinmẹ.

³Ịganị nyana ini pịrịḅụ ị́ dachịẹmẹ, ị́ pịkị ị́ya opu ịganị mị chịn ọkịmẹ.

⁴Wa pịkịmaḅo, Yei Tamụnọ wa ḍụaḅọ, se ḅarị kuḅie si nyana wa pịrịma!

⁵Ị́ wa ḍiki ịganị gbaso ḅe? Ị́ya ịganị mị kuluma ẹka?

⁶Wa mịẹ wa pịkị kụrọ, se mine ị́ya tomonima wa ị́ bomaḅịa.

⁷Ị́ya kunoka ḅẹlẹma mị se wa ḍie, Yei Nyanaḅọ, pịkị ị́ya ḍụaḅọrọma ḅarachụa mị se wa pịrị.

⁸À Nyanaḅọ Tamụnọ Ḅe ḍukoarịye mị poki aḅẹ; ò dein ḅereni wa pịrịmẹ, oria tomonima, wa nemikase ḅarị vinpịkị mun mịna oḅori-a nwẹngị ma kọnkẹ ḅẹḅẹ.

⁹Pikipikiye ofori-ẹ, ọ̀ ḅụkarakaramamẹ, osi se ọ̀ pịrị apụma ḍụa, oria ḍụaḅọrọma pịkị mịna ama ḅie simeḅịa.

¹⁰Ḅẹlẹma na kuḅie-se-ḅụgbana-gbẹịn na ịrịaḅịa; karakara mịẹmịẹaye na dein na jịnye jịnye oḅoloḅịa.

¹¹Tomoniḅọ ḅe nyana kụrọ ḅereni mị, sẹkiri ḅie anị wẹrị iwoḅịa, anịsịkị Tamụnọ Ḅe oria karakara mị, soḅie ḅụ wẹrị ideriḅoḅịa.

¹²Tamụnọ Ḅe ọ̀ wa mịẹse ye-mine-na-tọrọkọ-tọrọkọ munḅịa, mịna ama mị pịkị fịaye soku sịkị ḅụ iḅi fịaye pakụmaḅoḅịa.

¹³Karakara mịẹmịẹaye, Nyanaḅọ Ḅe tọrọkọ ịsụn ḅịa, se ateli mị karakarama ọ̀ pịrịḅịa.