Read kirikeni Fịafịa Nime 88 Bible Online

Fịafịa Nime 88 - kirikeni bible

Fịafịa Nime 88

¹Nyanaḅọ Tamụnọ, ị̀ ḍụaḅọrọmaḅọ, ene mị mgba àrị owumẹ, à pịkị ḍin ḅie ị́ tọrọkọ ḅomẹ.

²Ị̀ya tẹkẹ na; à kọn àrị ḅarachụa ḅi owu mị poki!

³Ḅụfụka ḅakama ị̀ ḅụ omi-ẹ, anị mịẹso sịkị à fị na kpekimẹ.

⁴Fị-ọtọn apụ mamgba sime ọkụ anị à sime ọkụ-ẹ; ị̀ya ịnyọ mgba fasosam.

⁵Fịapụ ma ogboku ini ị̀ se sarakoromamẹ; ini ḅaasa apụ inia iḍupuma ḅie ḅọlọlọ sime ọkụ anị à sime ọkụ-ẹ, anị ị́ gbọtụma se ḅieḅaramasa apụma, ị́ ḅarị ine ḅarachụa pịrịḅịa ọkụ oforika apụma.

⁶Ị́ ị̀ se gbun iḍupu mị ḅie gbin chusam, kanakanatẹịn pịkị gbuntẹịn olulu mị ḅie.

⁷Ị́ya ịganị ikuma ị̀ya ọgọnọ gbana wara aḅẹ, à pịkị anịa ambura ma chukuḅie kọsịsam.

⁸Ị́ mịẹmẹ ị̀ya ikiapụ ma ị̀ sarakoromamẹ; ị́ mịẹse ini ị̀ sịkịmẹ, à sọgbisirisam à pịkị ḅarị ineda mangịso-ẹkẹ;

⁹tọrụsiọrịḅụ ị̀ tọrụmgbọlụma ḅụ ịnyọ fasam. Nyanaḅọ, eneḅeneḅene àrị ị́ chịn olokumẹ, à pịkị tẹkẹ ḅụ ị̀ ḅarama dekichịẹma ị́ damẹ.

¹⁰Ị́ ị́ya ḅụgbiripuma fịrịma nwẹngị fịsapụ pịrịḅe? Ini sịsẹ se ị́ bomaḅe?

¹¹Ị́ya kunoka ḅẹlẹma mị ḅe ḅẹrẹ ini nwọ ḍuko-ao iḍupu mị ḅie, anịkanịka fị ḅie ini ị́ya kuḅie-se-ḅụgbana gbẹịn ḅẹrẹ mị nwọ ḍukoḅe?

¹²Ị́ya ḅụgbiripuma fịrịma anị kanakana nyọ mị ḅie ini ọrịḅe, anịkanịka ị́ya iḅimịẹ mị, anị tomoni se ḅieḅaramasa ama mị ḅie ini nemiḅe?

¹³Nyanaḅọ, ḅarachụa gose àrị ị́ chịnmẹ; dede goyegoye àrị ị́ tẹkẹmẹ.

¹⁴Cheye gose ị́ ị̀ sịkị-ao, Nyanaḅọ? Cheye gose ị́ ị̀ ḅụ pịkịmaso-ao?

¹⁵Ị̀ya kalasịkị ngịsị à tọrụsiọrịsam, à pịkị fị-na-kpekimẹ; ị̀ ḅụ ịnyọfasam ị́ya fomuḅara ma ḅe iku mị gose.

¹⁶Ị́ya opu ịganị mị ị̀ kọsịmamẹ; ị́ se ị̀ pakarị ḅalafama owu mị ị̀ ḅaasam.

¹⁷Ene mị ḅie mgba ini ị̀ kelemamẹ, opu mengi nyọ kelema ọkụ; angana anganaḅụ ini ị̀ gbẹịnmẹ.

¹⁸Ị̀rị̀ na kpekitẹịn ikiapụ ma ị́ ini mịẹse ini ị̀ sarakoromasam, kanakana kẹngẹ anị ị̀ya ikiaḅọ-ẹ.