Read kirikeni Fịafịa Nime 90 Bible Online

Fịafịa Nime 90 - kirikeni bible

Fịafịa Nime 90

¹Yei Nyanaḅọ, sịkịmamgba ị́rị́ mịna warị-ẹ.

²Ma ị́ chịngịma tẹmẹka sịkị ngịsị anịkanịka tomonikiri mị ma ḅo ḅụọnyana chịẹka sịkị ngịsị, ị́rị́ anị kuluma nyanaka Tamụnọ Ḅe-ẹ, ị́ pịkị Tamụnọ sọ gbasoḅịa.

³Ị́ ḍuko tomoniḅọ ḅe pịrịmẹ na ò vinpịkịḅo ọ̀ tatarị sime ọkụ sime; ị́ ọ̀ pịkị ḅo fọn mịẹmẹ.

⁴Kụra mẹndẹ oyiasi fịnjị, ị́ ḅụ gbọrị ene ọkụ simemẹ; àrị ḅọrọsa ḅịa mị sime ọkụ simemẹ, ḍin mị ḅie kalasịkị sime ọkụ simemẹ.

⁵Opumengi ḅara ị́ nwọse wa pụra somẹ; wa ḅọlọ ḍawọ nẹngịkẹ. Dede ḅie ḅịpị toluma pakarị ịwọ ịnyanya wa nwọ kịkẹmẹ,

⁶anị sẹnị se iḅi ịnyanya chụaye mị, se ḅo saso laḅịa sịkị àrị samịna se pịkị fịsam.

⁷Ị́ kọn ịganị ḅụ wa fịmẹ; ị́ya opu ịganị mịna ḅalafamamẹ.

⁸Ị́ mịna sima se ị́ tọrọkọ koromamẹ, wa ḅọịma mịẹ-a sima mịẹsosịkị ị́ àrị ọrịḅịa ọkụ.

⁹Ị́ya ịganị mịna ḍumo ma pẹlẹ kpụlụmamẹ, miniminima kọn ọkwẹịn mụmamụma ma fa ọkụ simemẹ.

¹⁰Kụra tesi oyi fịnjị anị wa nyanaye-ẹ— wa kụrọmẹ ḅẹḅẹ kụra inein-a si-ẹ; anịẹḅẹ sọnị àrị se ḅo wa pịrịaye anị ḅụfụka na kururu na-ẹ; ḍumo mị ḅọlọkẹ ḅọrọsam, se wa sosam.

¹¹Tụḅọ ị́ya ịganị mị ḅe kụrọ laye nemi? Tụḅọ ị́ya opu ịganị mị se ḅoḅịa ḅalafa mị nemi?

¹²Mịna ḍumo kpụlụ laḅara se wa telima, mịẹsosịkị wa ḅo yenemiapụ sọḅịa ọkụ.

¹³Ị́ya ịganị mị ḅọlọ nde sịkị laḅe? Ḍikitịḅịfoin nyana, Yei Nyanaḅọ, ị́ya fịrịnwẹngịapụma pịrị!

¹⁴Dede goyegoye ḅụ ị́ya kunoka ḅẹlẹma mị se mịna ḅie ḅeinma, mịẹsosịkị wa nime chu pịkị ḅieḅẹlẹḅịa mịna ḍumo ene mamgba ḅụ.

¹⁵Wa tọrụsiọrị kụra ma ḅie ị́ se wa pịrị kururu la-ọkụ la ḅẹlẹma nwọse mịọkụ wa pịrị.

¹⁶Ye mine ị́ya fịrịnwẹngịapụma ị́ nwẹngị opu-a fịrịma ọrị; ye mịna furoḅie pakaḅo ḅịa apụma ị́ya boma mị ḅe opu mị ọrị.

¹⁷Nyanaḅọ mịna Tamụnọ, ye ị́ya ḅẹlẹma ma mine na sime. Wa mịẹye goyegoye ḅụ, tọrọkọ-tọrọkọ mun se wa pịrị!