Read kirikeni Fịafịa Nime 92 Bible Online

Fịafịa Nime 92 - kirikeni bible

Fịafịa Nime 92

¹Anị iḅimẹ mịẹḅaka se ị́ ḅẹ, Yei Nyanaḅọ, ị́ya osiḅụ nime chu ị́ pịrị, Yei Geletẹịn Tamụnọ,

²dede goyegoye ị́ya kunoka ḅẹlẹma mị ḍukopakụma pịkị ị́ya kuḅie se gbana na gbẹịn mị na, ḍin goyegoye ḅụ,

³njalị-ḅụ-sime yefarịaye na ọbọ na se ḅẹlẹ nime chu ị́ boma.

⁴Ị́ nwẹngị opu-a fịrịma, Yei Nyanaḅọ, ị̀ ḅieḅẹlẹmamẹ; ị́ mịẹsaye ma gose, à ḅieḅẹlẹ nime chumẹ.

⁵Ị́ya fịrịma ḍụḅa ọkụ ḍiki, Nyanaḅọ! Ị́ya koroma gbun ọkụ ḍiki!

⁶Mịn mị anị oḅoriḅọ ḅe ineda nemi ẹkaye-ẹ; yenemikaḅọ ḅe ineda kaịnḅo ẹkaye-ẹ:

⁷sitịḅịnyanaḅọ ḅe ori ineda osuein sẹnị ọkụ sẹnịḅịa, siaye mịẹ apụma mịẹmịẹaye ineda inia na tọrọkọ tọrọkọ munḅịa; anị sọnị ini ini ḅaasinḅịa,

⁸anịatịḅị ị́rị́, Nyanaḅọ Ḅe opusọtẹịn gbasomẹ.

⁹Wa nemimẹ na ị́rị́na-tarakapụ ma ini fịḅịa, ị́ pịkị sitịḅịnyana apụ mamgba nẹngịmaḅịa.

¹⁰Piri nambulo kụrọ ọkụ ị́ nwọse ị̀ mịẹkụrọmasam; ị́ ḅẹlẹma se ị̀ ḅieḅẹlẹmasam.

¹¹Ị̀rị̀na-tarakapụma ḅe ọmụḅarasi mị àrị anị ọrịsam, à pịkị sitịḅịnyana apụma ḅe owupụkọ ma naamẹ.

¹²Karakaraye mịẹapụ ma enemi kọrọ mị chụa ọkụ anị ye-ini-na-iḅi-ḅịa ọkụ-ẹ; Lẹbanọn ḅie awụ chịnma sẹnị ọkụ anị ini sẹnịḅịa ọkụ-ẹ.

¹³Nyanaḅọ Ḅe warị ḅie ḍipi eje sime ọkụ ini nwọ simemẹ, anị wa Nyana Tamụnọ Ḅe Oputẹkẹwarị ḅie sopakarị eje ḅara,

¹⁴anị olomusosa sọnị anị pa chịnmgbọlụ chụaḅẹ, se anị pa pịkị kụrọ ịwọ waraḅẹ.

¹⁵Mịn mị ḍiepakụmamẹ na Nyanaḅọ Ḅe ọ̀ karakaramẹ, ị̀ ḅọịḅọ ḅe ḅụ mịẹirimaye ofori-ẹ.